نۇرغۇن دۆلەتلەر ۋە خەلقئارالىق رەھبەرلەر 20 ھەربىي خادىم بار بولغان بىر تۈركىيە ھەربىي يۈك ئايروپىلانىنىڭ گىرۇزىيەدە چۈشۈپ كېتىشىدىن كېيىن تۈركىيەگە تەزىيە بىلدۈردى.

مۇداپىئە مىنىستىرلىقى سەيشەنبە كۈنى ئېلان قىلغان باياناتىدا، ئايروپىلاننىڭ ئەزەربەيجاندىن تۈركىيەگە قايتىۋاتقاندا گىرۇزىيەدە چۈشۈپ كەتكەنلىكىنى بىلدۈردى.

مىنىستىرلىقنىڭ باياناتىدا: «ئەزەربەيجاندىن دۆلىتىمىزگە كېلىش ئۈچۈن ھاۋاغا كۆتۈرۈلگەن C-130 تىپلىق ھەربىي يۈك ئايروپىلانىمىز گىرۇزىيە-ئەزەربەيجان چېگراسىدا چۈشۈپ كەتتى» دېگەن ئىبارىلەر ئىشلىتىلدى.

دۇنيا رەھبەرلىرىنىڭ بىر قىسىم تەزىيە ئۇچۇرلىرى تۆۋەندىكىچە؛

ئامېرىكا

ئامېرىكانىڭ سۈرىيە ئالاھىدە ئەلچىسى ۋە تۈركىيە باش ئەلچىسى توم بارراك: «بۈگۈن يۈز بەرگەن تۈركىيە قوراللىق كۈچلىرى ئايروپىلانىنىڭ پاجىئەلىك ھالدا چۈشۈپ كېتىشىدىن چوڭقۇر قايغۇردۇق» دېدى. بارراك ھاياتىدىن ئايرىلغان ئەسكەرلەرنىڭ ئائىلىلىرىگە ۋە تۈركىيە خەلقىگە تەزىيە بىلدۈردى ھەمدە «ئامېرىكا ئىتتىپاقىشىمىز تۈركىيە بىلەن ھەمدەمدە» دېدى.

قاتار

قاتار ئەمىرى شەيخ تەمىم بىن ھەمەد ئال سانى جۇمھۇر رەئىس رەجەپ تاييىپ ئەردوغانغا تەزىيە ئۇچۇرى ئەۋەتىپ، ۋەقەدە ھاياتىدىن ئايرىلغانلار ئۈچۈن قايغۇسىنى ئىپادىلىدى.

ئىئوردانىيە

ئىئوردانىيە تاشقى ئىشلار مىنىستىرلىقى تۈركىيە ھەربىي يۈك ئايروپىلانى ۋەقەسىدە قازا قىلغانلار ئۈچۈن تۈركىيە ھۆكۈمىتى ۋە خەلقىگە «چوڭقۇر تەزىيە» بىلدۈردى. باياناتچى فۇئاد ماجالى، ئىئوردانىيەنىڭ تۈركىيە بىلەن ھەمدەمدە ئىكەنلىكىنى ۋە قازقىلغانلارنىڭ ئائىلىلىرىگە تەزىيە بىلدۈرىدىغانلىقىنى تەكىتلىدى.

شىمالىي قىبرىس تۈرك جۇمھۇرىيىتى

شىمالىي قىبرىس تۈرك جۇمھۇرىيىتى جۇمھۇر رەئىسى تۇفان ئەرگۈرمان ۋەقەنى چوڭقۇر قايغۇ بىلەن ئاڭلىغانلىقىنى بىلدۈرۈپ، ئائىلىلەرگە، يېقىنلىرىغا ۋە تۈركىيەگە تەزىيە ۋە سەۋر تىلىدى. باش مىنىستىر ئۈنال ئۈستەل ۋە تاشقى ئىشلار مىنىستىرى تەھسىن ئەرتۇغرۇلئوغلۇمۇ تەزىيە ئۇچۇرلىرىنى ئورتاقلىشىپ، قىبرىس تۈركلىرىنىڭ تۈركىيە بىلەن ھەمدەمدە ئىكەنلىكىنى ۋە قازا قىلغان ئەسكەرلەر ئۈچۈن دۇئا قىلغانلىقىنى ئىپادىلىدى.

پاكىستان

پاكىستان باش مىنىستىرى شەھباز شەرىف X ھېساباتىدا ھەمبەھىرلىگەن ئۇچۇرىدا تۈركىيە C-130 ئايروپىلانىنىڭ گىرۇزىيەدە چۈشۈپ كېتىشىدىن چوڭقۇر قايغۇرغانلىقىنى بىلدۈردى. «ئەزىز قېرىندىشىم جۇمھۇر رەئىس رەجەپ تاييىپ ئەردوغانغا، ئايروپىلاندىكىلەرنىڭ ئائىلىلىرىگە ۋە تۈرك قېرىنداشلىرىمىزغا سەمىمىي تەزىيە بىلدۈرىمەن. بۇ ماتەم پەيتىدە دىققىتىمىز ۋە دۇئالىرىمىز ئۇلار بىلەن بىللە» دېدى. پاكىستان تاشقى ئىشلار مىنىستىرلىقىمۇ پاكىستاننىڭ تۈرك قېرىنداشلىرى بىلەن تولۇق ھەمدەمدە ئىكەنلىكىنى بىلدۈردى.

ئافغانىستان

ئافغانىستان تاشقى ئىشلار مىنىستىرلىقىمۇ تۈركىيە ھەربىي يۈك ئايروپىلانىنىڭ چۈشۈپ كېتىشىدىن چوڭقۇر قايغۇرغانلىقىنى ئىپادىلىدى. «كابۇل قېرىنداش تۈركىيە ھۆكۈمىتىگە ۋە خەلقىگە شۇنداقلا قازا قىلغانلارنىڭ ئائىلىلىرىگە سەمىمىي تەزىيە بىلدۈردى» دېدى.

قازاقىستان

قازاقىستان پىرېزىدېنتى قاسىم-جومەرت توقايېۋمۇ تۈركىيە جۇمھۇر رەئىسىگە ئەۋەتكەن ئۇچۇرىدا تۈرك خەلقىگە ۋەقازا قىلغانلارنىڭ ئائىلىلىرىگە «چوڭقۇر تەزىيە» بىلدۈردى.

ناتو

ناتو باش كاتىپى مارك رۇتتې X دە ئېلان قىلغان ئۇچۇرىدا: «ئىتتىپاقدىشىمىز تۈركىيەگە ۋە بۈگۈن بىر تۈركىيە ھەربىي ئايروپىلانىنىڭ پاجىئەلىك ھالدا چۈشۈپ كېتىشى بىلەن ھاياتىدىن ئايرىلغانلارنىڭ يېقىنلىرىغا ئەڭ چوڭقۇر تەزىيەلەرنى بىلدۈرىمىز» دېگەن ئىبارىلەرنى ئىشلەتتى. رۇتتې تۈركىيە قوراللىق كۈچلىرىنىڭ ۋە ئىتتىپاقدىكى بارلىق فورما كىيگەن ئەر-ئاياللارنىڭ ھەر كۈنى بىخەتەرلىكنى تەمىنلەش ئۈچۈن قىلغان خىزمەتلىرىگە چوڭقۇر مىننەتدارلىق ۋە ھۆرمەت بىلدۈرگەنلىقىنىمۇ قوشۇمچە قىلدى.

ئىتالىيە

ئىتالىيە تاشقى ئىشلار مىنىستىرى ئانتونىيو تاجىنىمۇ تۈركىيەگە ھەمدەمدە بولۇش ئۇچۇرى ئەۋەتتى. تاجىنى X دە ئورتاقلاشقان ئۇچۇرىدا، ئەزەربەيجاندىن تۈركىيەگە قاراپ ئۇچۇۋاتقاندا گىرۇزىيە زېمىنىدا بىر تۈركىيە C-130 تىپلىق ھەربىي يۈك ئايروپىلانىنىڭ چۈشۈپ كېتىشىدىن چوڭقۇر قايغۇرغانلىقىنى بىلدۈردى. تاجىنى ۋەقەدە ھاياتىدىن ئايرىلغانلارنىڭ ئائىلىلىرىگە تەزىيە بىلدۈردى ۋە ۋەقە يۈز بەرگەن جايدا ئىشلەۋاتقان تۈرك خەلقى، دائىرىلەر، قوراللىق كۈچلەر ۋە قۇتقۇزۇش ئەترىتىگە قوللاپ قۇۋۋەتلەيدىغانلىقىنى ئىپادىلىدى.

ئېستونىيە

ئېستونىيە گىرۇزىيە-ئەزەربەيجان چېگراسىغا يېقىن بىر رايوندا يۈز بەرگەن تۈركىيە ھەربىي يۈك ئايروپىلانىنىڭ پاجىئەلىك ھالدا چۈشۈپ كېتىشى سەۋەبىدىن تۈركىيەگە سەمىمىي تەزىيە بىلدۈردى. تاشقى ئىشلار مىنىستىرلىقى ھاياتىدىن ئايرىلغان خادىملارنىڭ ئائىلىلىرى ۋە يېقىنلىرىغا چوڭقۇر تەزىيە بىلدۈرگەنلىكىنى، بۇ قىيىن مەزگىلدە تۈركىيە بىلەن تولۇق ھەمدەمدە ئىكەنلىكىنى قەيت قىلدى.

لىتۋانىيە

لىتۋانىيە تاشقى ئىشلار مىنىستىرلىقى گىرۇزىيە-ئەزەربەيجان چېگراسىدا يۈز بەرگەن تۈركىيە ھەربىي يۈك ئايروپىلانىنىڭ پاجىئەلىك ھالدا چۈشۈپ كېتىشىدىن چوڭقۇر قايغۇرغانلىقىنى بىلدۈردى. لىتۋانىيە بۇ قىيىن مەزگىلدە ئىتتىپاقداشلىرى تۈركىيە بىلەن ھەمدەمدە ئىكەنلىكىنى ۋە ۋەقەدە قازا قىلغانلارنىڭ ھەممىسىگە سەمىمىي تەزىيە بىلدۈرگەنلىكىنى ئىپادىلىدى.

رۇمىنىيە

رۇمىنىيە تاشقى ئىشلار مىنىستىرلىقى بىر تۈركىيە ھەربىي ئايروپىلانىنىڭ گىرۇزىيە-ئەزەربەيجان چېگراسىغا يېقىن بىر رايوندا پاجىئەلىك ھالدا چۈشۈپ كېتىشىدىن چوڭقۇر قايغۇرغانلىقىنى ئېلان قىلدى. رۇمىنىيە تۈركىيەگە ۋە ھاياتىدىن ئايرىلغان خادىملارنىڭ ئائىلىلىرىگە سەمىمىي تەزىيە بىلدۈرگەنلىكىنى ۋە تۈرك دوستلىرى بىلەن بۇ قىيىن پەيتتە بىرگە ئىكەنلىكىنى بىلدۈردى.

مالتا

مالتا تاشقى ئىشلار مىنىستىرى يان بورگ تۈرك ئايروپىلانىنىڭ گىرۇزىيەدىكى ۋەقەسى سەۋەبىدىن چوڭقۇر قايغۇرغانلىقىنى بىلدۈرۈپ، ھاياتىدىن ئايرىلغانلارنىڭ ئائىلىلىرىگە ۋە يېقىنلىرىغا سەمىمىي تەزىيە بىلدۈرگەنلىكىنى بىلدۈردى. بورگ تۈرك خەلقىنىڭ باشتىن كەچۈرگەن ئازابىنى ئورتاقلاشقانلىقىنى ئىپادىلىدى.

كوسوۋو

كوسوۋو جۇمھۇر رەئىسى ۋجوسا ئوسمانىمۇ بىر ھەربىي ئايروپىلاننىڭ پاجىئەلىك ھالدا چۈشۈپ كېتىشىدىن كېيىن جۇمھۇر رەئىس رەجەپ تاييىپ ئەردوغانغا، تۈركىيە قوراللىق كۈچلىرىگە ۋە تۈركىيە خەلقىگە ئەڭ چوڭقۇر تەزىيە بىلدۈردى.

ياپونىيە، فىرانسىيە، روسىيە، گوللاندىيە، گرېتسىيە، گېرمانىيە ۋە ئۇكرائىنا قاتارلىق ھەر قايسى دۆلەتلەرمۇ ئەنقەرەدىكى دىپلوماتىك ۋەكىللىك ئورۇنلىرى ئارقىلىق قايغۇلىرىنى بىلدۈردى.