ئىسرائىلىيە جۈمە كۈنى ئېلان قىلغان باياناتىدا، ئۇرۇش توختىتىش كېلىشىمىنىڭ 2025 – يىلى 10 – ئۆكتەبىر چۈشتە (گىرىنۋىچ ۋاقتى ئەتىگەن سائەت 09:00 دا) يولغا قويۇلغانلىقىنى ئۇقتۇردى.
ئىسرائىلىيە ئارمىيەسىنىڭ ئانادولۇ ئاگېنتلىقىغا ئەۋەتكەن يازما باياناتىدا: «ئۇرۇش توختىتىش كېلىشىمى ئىسرائىلىيە ۋاقتى چۈش سائەت 12:00 دە يولغا قويۇلدى. چۈش سائەت 12:00 دىن باشلاپ، قىسىملار ئۇرۇش توختىتىش كېلىشىمى ۋە تۇتقۇن قىلىنغانلارنى قايتۇرۇش دائىرىسىدە بېكىتىلگەن يېڭى ھەربىي ئورۇنلاشتۇرۇش لىنىيەسى بويىچە ئورۇنلاشتى» دېيىلدى.
باياناتتا، قىسىملارنىڭ جەنۇبتىكى قوماندانلىق رايونىغا ئورۇنلاشتۇرۇلغانلىقى ۋە «ھەرقانداق جىددىي تەھدىتنى تۈگىتىش ئۈچۈن خىزمەتلىرىنى داۋاملاشتۇرىدىغانلىقى» بىلدۈرۈلدى، لېكىن تېخىمۇ كۆپ تەپسىلاتلار بېرىلمىدى.
رايوندىن خەۋەر بەرگەن ئانادولۇ ئاگېنتلىقى مۇخبىرىنىڭ بىلدۈرۈشىچە، ئۇرۇش توختىتىش باشلىنىشى بىلەن بىرلىكتە، ئۆي – ماكانلىرىدىن ئايرىلىپ قالغان مىڭلىغان پەلەستىنلىكلەر ئىسرائىلىيە ئارمىيەسىنىڭ ئەررەشىد ۋە سەلاھۇددىن يوللىرىنىڭ ئۆتۈشكە ئوچۇق ئىكەنلىكىنى جاكارلىشىدىن كېيىن، غەززە رايونىنىڭ جەنۇبىدىن غەززە شەھىرىگە ئەررەشىد يولى ئارقىلىق قايتىشقا باشلىغان.
ئىسرائىلىيە ئارمىيەسى جۈمە كۈنى غەززەدىن باسقۇچلۇق ئەسكەر چېكىندۈرۈشنىڭ تۇنجى باسقۇچىنى باشلىدى. ئىسرائىلىيە تاراتقۇلىرىنىڭ خەۋىرىگە قارىغاندا، ئامېرىكا پىرېزىدېنتى دونالد ترامپنىڭ غەززە ئۇرۇشىنى ئاخىرلاشتۇرۇش پىلانىدا بەلگىلەنگەن رايونلارغا چېكىنىش جەريانى 24 سائەت ئىچىدە تاماملىنىدىكەن.
ئىسرائىلىيە ئارمىيەسى رادىيوسىنىڭ خەۋىرىگە قارىغاندا، ترامپنىڭ پىلانى بويىچە ئېلىپ بېرىلىۋاتقان باسقۇچلۇق چېكىنىش جۈمە كۈنى چۈشتىن كېيىن تاماملىنىدىكەن.
