ئىران پىرېزىدېنتى مەسئۇد پەزەشكىيان ئامېرىكانى ئىران ئىسلام جۇمھۇرىيىتىنىڭ ئۆز مەيدانىدا چىڭ تۇرۇشىنى توسۇش بىلەن ئەيىبلىدى.
پەزەشكىيان يەكشەنبە كۈنى Fox News قانىلى بىلەن ئۆتكۈزگەن ۋە قانال تەرىپىدىن ئېلان قىلىنغان سۆھبىتىدە، خەلقئارالىق ئېمبارگولارنىڭ قايتا يولغا قويۇلغانلىقىغا قارىماي، ئىراننىڭ يادرو قوراللىرى ھەققىدە ئىزدەنمەيدىغانلىقىنى بىلدۈردى.
پەزەشكىيان: «بىز ھېچقاچان تىنچلىقنى نىشان قىلىدىغان يادرو پىروگراممىسىدىن باشقا يوللار ھەققىدە ئىزدەنمىدۇق. يادرو قوراللىرى ياكى ھەرقانداق كەڭ كۆلەملىك قىرغۇچى قوراللارغا ئورۇن يوق. بىز ھېچقاچان يادرو قوراللىرىغا ئىگە بولۇش يولىدا ئىزدەنمىدۇق ۋە ئەسلا ئىزدەنمەيمىز» دېدى.
ئاخىرقى ھۇجۇملاردىن كېيىن ئىسرائىلىيە ئىستىخباراتىنىڭ دۆلەتكە سىڭىپ كىرگەنلىكى توغرىسىدىكى سوئالغا جاۋاب بەرگەندە، ئىسرائىلىيەنى ئەيىبلىگەن پەزەشكىيان: «بۇ ئىسرائىلىيەنىڭ تاجاۋۇزچى ئىكەنلىكىنى كۆرسىتىدۇ» دېدى، ھەمدە تېل ئاۋىۋنىڭ ھۇجۇملىرىنىڭ خەلقئارا قانۇن ۋە كېلىشىملەرنى خالىغانچە دەپسەندە قىلغانلىقىنى بىلدۈردى.
«Snapback» (ئەسلىگە قايتىش مېخانىزمى)
يەكشەنبە كۈنى ئەتىگەندە، فىرانسىيە، گېرمانىيە ۋە ئەنگلىيە بىرلەشكەن دۆلەتلەر تەشكىلاتى خەۋپسىزلىك كېڭىشىنىڭ 2231-نومۇرلۇق قارارىغا ئاساسەن «ئەسلىگە قايتىش مېخانىزمى» نى ئىشقا كىرىشتۈردى. بۇ مېخانىزم ئىراننىڭ مەجبۇرىيەتلىرىنى ئادا قىلالمىغان ئەھۋالدا ئېمبارگولارنىڭ 30 كۈن ئىچىدە قايتا يولغا قويۇلۇشىنى تەقەززا قىلىدۇ.
بۇ يىلنىڭ باشلىرىدا ئامېرىكا ۋە ئىسرائىلىيەنىڭ ئىرانغا قاراتقان ھۇجۇملىرىدىن كېيىن، تېھران بىرلەشكەن دۆلەتلەر تەشكىلاتىنىڭ يادرو كۆزەتكۈچىسى بولغان خەلقئارا ئاتوم ئېنېرگىيەسى ئورگىنى (UAEA) بىلەن ھەمكارلىشىشنى توختاتقان ھەمدە ئورگاننىڭ ئۆزىگە قارشى بىر تەرەپلىمىلىك قىلغانلىقىنى ئىلگىرى سۈرگەن ئىدى.
ئامېرىكانىڭ بۇ يىلنىڭ باشلىرىدا ئېلىپ بارغان ھەربىي ھۇجۇملىرى ئىراننىڭ يادرو مۇئەسسەسەلىرىنى نىشان قىلدى. ترامپ ھاكىمىيىتى دائىرىلىرى بۇ ھۇجۇملارنىڭ ئىراننىڭ ئوران قويۇلدۇرۇش مۇئەسسەسەلىرىنى پۈتۈنلەي ۋەيران قىلغانلىقىنى ئىلگىرى سۈرگەن بولسىمۇ، ئىران زىياننىڭ كۆلىمىنى تالاش-تارتىشلىق دەپ قارىماقتا.
يەكشەنبە كۈنى ئۈچ دۆلەت تېھراننى يادرو مەجبۇرىيەتلىرىنى خالىغانچە دەپسەندە قىلىش بىلەن ئەيىبلىگەنلىكىدىن كېيىن، ئېمبارگولار ئون يىلدىن كېيىن تۇنجى قېتىم قايتا يولغا قويۇلدى. بۇ تەدبىرلەر تېھراننىڭ يادرو ۋە باللىستىك باشقۇرۇلىدىغان بومبا پىروگراممىلىرىغا مۇناسىۋەتلىك پائالىيەتلەرنى چەكلەش بىلەن بىر ۋاقىتتا، دۆلەت ئىقتىسادىغا تېخىمۇ كەڭ تەسىر كۆرسىتىشى مۆلچەرلەنمەكتە.
