ئەرەب دۆلەتلىرى ۋە تەشكىلاتلىرى بەزى غەرب دۆلەتلىرى، جۈملىدىن ئەنگلىيە، كانادا، ئاۋىستىرالىيە ۋە پورتۇگالىيە تەرىپىدىن پەلەستىن دۆلىتىنىڭ رەسمىي ئېتىراپ قىلىنىشىنى قىزغىن قارشى ئالدى.
سەئۇدى ئەرەبىستان تەرىپىدىن يەكشەنبە كۈنى بۇ ھەقتە ئېلان قىلىنغان باياناتتا مۇنداق دېيىلدى:
«بۇ دوست دۆلەتلەر تىنچلىق يولىنى قوللاش ۋە ئىككى دۆلەتلىك ھەل قىلىش چارىسىنى ئاساس قىلغان قانۇنلۇق ب د ت قارارلىرى بويىچە ئىلگىرىلەش توغرىسىدىكى سەمىمىي ۋەدىسىنى يەنە بىر قېتىم ئىسپاتلىدى.»
كۇۋەيت تاشقى ئىشلار مىنىستىرلىقىنىڭ بۇ ھەقتە ئېلان قىلىنغان باياناتىدا، بۇ قەدەمنىڭ ناھايىتى مۇھىملىقى تەكىتلىنىپ مۇنداق دېيىلدى:
«بۇ، خەلقئارا جەمئىيەتنىڭ رايوندا تىنچلىق ئورنىتىش ۋە ئىككى دۆلەتلىك ھەل قىلىش چارىسى ئاساسىدا پەلەستىن دۆلىتى قۇرۇش تىرىشچانلىقلىرىنى قوللاشقا تۆھپە قوشىدۇ. رايوندا بىخەتەرلىك، مۇقىملىق ۋە گۈللىنىشنىڭ داۋاملىشىشى ئۈچۈن باشقا بارلىق دۆلەتلەرنىڭمۇ مۇشۇنىڭغا ئوخشاش قەدەملەرنى تاشلىشىغا توغرا كېلىدۇ.»
ئومانمۇ بۇ ئۆزگىرىشنى «ئىككى دۆلەتلىك ھەل قىلىش چارىسى ئاساسىدا پەلەستىن دۆلىتى قۇرۇش ۋە رايونلۇق بىخەتەرلىك ھەم تىنچلىق ئورنىتىش يولىدا تاشلانغان ناھايىتى مۇھىم بىر قەدەم» دەپ ئاتىدى.
ئومان تاشقى ئىشلار مىنىستىرلىقى تېخى پەلەستىننى ئېتىراپ قىلمىغان دۆلەتلەرنى «پەلەستىن خەلقىنىڭ 1967 – يىلقى چېگرا لىنىيەلىرى ئاساسىدا، پايتەختى شەرق قۇددۇس بولغان مۇستەقىل پەلەستىن دۆلىتى قۇرۇش توغرىسىدىكى قانۇنلۇق ھوقۇقىنى كاپالەتكە ئىگە قىلىش ئۈچۈن» پەلەستىن دۆلىتىنى ئېتىراپ قىلىشقا چاقىردى.
ئىيوردانىيە خان جەمەتى سارىيىنىڭ بۇ ھەقتە ئېلان قىلغان باياناتىغا قارىغاندا، ئىيوردانىيە پادىشاھى 2 - ئابدۇللاھ نىيۇ يوركتىكى ئۇچرىشىشلىرى داۋامىدا ئاۋىستىرالىيە باش مىنىستىرى ئانتونىي ئالبانېس بىلەن كۆرۈشۈپ، ئاۋىستىرالىيەنىڭ پەلەستىن دۆلىتىنى ئېتىراپ قىلىش قارارىنى ماختىغان.
ئىيوردانىيە تاشقى ئىشلار ۋىزارىتى ئەنگلىيە، كانادا ۋە ئاۋىستىرالىيەنىڭ پەلەستىننى رەسمىي ئېتىراپ قىلىش قارارىنىڭ «ئىشغالىيەتنى ئاخىرلاشتۇرۇش ۋە پەلەستىن خەلقىنىڭ ئىككى دۆلەتلىك ھەل قىلىش چارىسى ئاساسىدا پەلەستىن دۆلىتى قۇرۇش توغرىسىدىكى ۋاز كېچىلمەس ھوقۇقىنى ئەمەلگە ئاشۇرۇشى يولىدا كۆرسىتىلىۋاتقان خەلقئارالىق تىرىشچانلىقلارغىمۇ ماس كېلىدىغانلىقىنى» يەنە بىر قېتىم تەكىتلىدى.
پارس قولتۇقى ھەمكارلىق كېڭىشى بۇ باياناتلارنى «ئادالەت ۋە خەلقئارا قانۇننىڭ ئىجرا قىلىنىشى يولىدىكى مۇھىم بىر قەدەم ھەم تارىخىي ئۆزگىرىش» دەپ ئاتىدى.
ئەنگلىيە، كانادا، ئاۋىستىرالىيە ۋە پورتۇگالىيە ب د ت ئومۇمىي كېڭىشى يىغىنىدىن ئىلگىرى پەلەستىن دۆلىتىنى رەسمىي ئېتىراپ قىلدى.
نۆۋەتتە ب د ت غا ئەزا دۆلەتلەرنىڭ تەخمىنەن تۆتتىن ئۈچى پەلەستىننى ئېتىراپ قىلماقتا. ئىرېلاندىيە، ئىسپانىيە ۋە نورۋېگىيە ئالدىنقى يىلى بۇ ئېتىراپ قىلىشنى رەسمىيلەشتۈرگەن ئىدى.
