ئىسرائىلىيە ئاخبارات ۋاسىتىلىرىنىڭ خەۋەر قىلىشىچە، ياۋروپا دائىرىلىرى ئىسرائىلىيەنى ئىشغال ئاستىدىكى ئىيوردان دەرياسىنىڭ غەربىي قىرغىقىنىڭ بەزى جايلىرىنى بېسىۋېلىش پىلانى توغرىسىدا قاتتىق ئاگاھلاندۇرغان.
ئىسرائىلىيەنىڭ «‹قانال 2› تېلېۋىزىيەسى» نىڭ خەۋەر قىلىشىچە، بىرنەچچە ياۋروپا ئەمەلدارى يەكشەنبە كۈنى، ئىشغالىيەت ئاستىدىكى پەلەستىن زېمىنلىرىنىڭ بىر قىسمىنى بېسىۋېلىش ئېھتىماللىقىنى ئوتتۇرىغا قويغان ئىسرائىلىيە ھۆكۈمىتىنى قاتتىق ئاگاھلاندۇرغان.
دائىرىلەر: «بېنيامىن نېتانياھۇ ۋە ئۇنىڭ ھۆكۈمىتى ئوتتۇرا شەرق رايونىدا بەرپا قىلىنغان ھەممە نەرسىنى يوقىتىشنى خالىسا، ئۇنىڭ ئاقىۋەتلىرىگە بەرداشلىق بېرىشكە مەجبۇر بولىدۇ» دەپ ئاگاھلاندۇرغان.
بۇ ئاگاھلاندۇرۇش، ئەنگلىيە، كانادا ۋە ئاۋىستىرالىيەنىڭ پەلەستىن دۆلىتىنى ئېتىراپ قىلىش قارارىغا جاۋابەن، ئىسرائىلىيەنىڭ يېقىندا ئىيوردان دەرياسىنىڭ غەربىي قىرغىقىدىكى بەزى رايونلارنى بېسىۋېلىشى مۇمكىنلىكىنى بىلدۈرگەن ئىرقىي قىرغىنچى نېتانياھۇنىڭ باياناتىدىن كېيىن ئوتتۇرىغا چىقتى.
ئىرقىي قىرغىنچى نېتانياھۇ ئىسرائىلىيە باش مىنىستىرلىق مەھكىمىسى ئېلان قىلغان بىر سىنلىق باياناتتا، پەلەستىننى ئېتىراپ قىلغان دۆلەتلەرنىڭ «تېررورىزمغا مۇكاپات بەرگەنلىكىنى» ئىلگىرى سۈردى.
نېتانياھۇ ئىسرائىلىيەنىڭ پەلەستىن دۆلىتىنىڭ قۇرۇلۇشىنى ئۇزۇن ۋاقىتتىن بۇيان توسۇپ كەلگەنلىكىنى تەكىتلەپ، بۇنى داۋاملاشتۇرىدىغانلىقىغا ۋەدە بەردى.
ئىرقىي قىرغىنچى نېتانياھۇ يەنە، ئىشغال ئاستىدىكى پەلەستىن زېمىنلىرىدا قانۇنسىز ھالدا بەرپا قىلىنغان يەھۇدىي ئولتۇراق رايونلىرىنىڭ سانىنى ھازىردىن باشلاپ ئىككى ھەسسە كۆپەيتكەنلىكىنى ماختانغان ھالدا تىلغا ئالدى ۋە بۇلارنى كېڭەيتىشنى داۋاملاشتۇرىدىغانلىقىنى ۋەدە قىلىپ، ئىسرائىلىيەنىڭ پەلەستىن دۆلىتىنىڭ قۇرۇلۇشىغا يول قويمايدىغانلىقىنى جاكارلىدى.
