ئىسرائىلىيەنىڭ غەززەدە يۈرگۈزۈۋاتقان ئىرقىي قىرغىنچىلىقىنىڭ ئىككىنچى يىلىدا، جۇمھۇر رەئىسلىك مەھكىمىسى ئۇچۇر – ئالاقە ئىشلىرى ئىدارىسىنىڭ باشلىقى بۇرھانەتتىن دۇران خەلقئارا جەمئىيەتنى ئادالەتنىڭ ۋەيران بولۇشى ۋە بارغانسېرى يامانلىشىۋاتقان ئىنسانىي تىراگېدىيە ھەققىدە ئاگاھلاندۇردى.
تۈركىيە جۇمھۇرىيىتى جۇمھۇر رەئىسلىك مەھكىمىسى ئۇچۇر – ئالاقە ئىشلىرى ئىدارىسىنىڭ باشلىقى بۇرھانەتتىن دۇران، سەيشەنبە كۈنى ئىسرائىلىيەنىڭ ھۇجۇملىرىنىڭ ئىككىنچى يىلىدا 67 مىڭدىن ئارتۇق ئىنسان ھاياتىدىن ئايرىلغان ئۆلۈم ۋەقەلىرىنى خاتىرىلەش ئۈچۈن ئېلان قىلغان باياناتىدا، ئىسرائىلىيەنىڭ غەززەدىكى ھەربىي ھەرىكەتلىرىنى سىستېمىلىق ئىرقىي قىرغىنچىلىق ۋە ئىشغالىيەت دەپ ئاتىدى.
دۇران تۈركىيەنىڭ ئاممىۋى ئورتاقلىشىش تور بېتى NSosyal سەھىپىسىدە ئېلان قىلغان باياناتىدا، بۇ ئەھۋالنىڭ «پەقەت پەلەستىن خەلقىنىڭ پاجىئەسىلا ئەمەس، بەلكى خەلقئارا تەرتىپ، قانۇن ۋە ئىنسانىي قىممەت قاراشلار ۋەيران بولغان ۋە گۇمان تۇغدۇرۇۋاتقان نومۇس قىلارلىق بىر ھۆججەت» ئىكەنلىكىنى بىلدۈردى. شۇنداقلا خەلقئارا جەمئىيەتنىڭ سۈكۈت قىلىشىنىڭ ئەدلىيە مېخانىزمىلىرىنىڭ يىمىرىلگەنلىكىنى يەنە بىر قېتىم ئىسپاتلاپ بەرگەنلىكىنى تەكىتلىدى.
دۇران سەيشەنبە كۈنىنىڭ ئىسرائىلىيەنىڭ 2023 – يىلى 7 – ئۆكتەبىردە غەززەگە باشلىغان ھۇجۇملىرى ۋە ئۇنىڭدىن كېيىن ئېلىپ بارغان ئىرقىي قىرغىنچىلىقىنىڭ ئىككىنچى يىللىقى ئىكەنلىكىنى ئەسكەرتىپ مۇنداق دېدى: «بومباردىمانلار، قورشاۋ ۋە سىستېمىلىق ۋەيرانچىلىق ئون مىڭلىغان پۇقرانىڭ، ئاياللارنىڭ ۋە بالىلارنىڭ جېنىغا زامىن بولدى. پۈتكۈل دۇنيانىڭ كۆز ئالدىدا بىر خەلق ياشاۋاتقان تۇپراقلىرىدىن، ئەڭ ئەقەللىي ئىنسانىي ھەق - ھوقۇقلىرىدىن مەھرۇم قالدۇرۇلدى. غەززەدە يۈز بەرگەن ۋەقەلەر بىر <توقۇنۇش> ئەمەس، ئەكسىچە سىستېمىلىق شەكىلدە ئېلىپ بېرىلىۋاتقان ئىرقىي قىرغىنچىلىقتۇر، ئىشغالىيەتتۇر.»
دۇران تۈركىيەنىڭ دەسلەپتىن تارتىپلا بۇ ھەقىقەتنى ئوچۇق - ئاشكارا ھالدا ئوتتۇرىغا قويۇپ كېلىۋاتقانلىقىنى، ھەمدە ئادالەت، ئىنساننىڭ ئىززەت – ھۆرمىتى ۋە زۇلۇمغا ئۇچرىغۇچىلارنى قوللاپ كېلىۋاتقانلىقىنى ئەسكەرتىپ مۇنداق دېدى:
«جۇمھۇر رەئىسىمىز رەجەپ تاييىپ ئەردوغاننىڭ رەھبەرلىكىدە، دىپلوماتىك مۇنبەرلەردە ۋە ئىنسانىي ياردەم ساھەسىدە بۇ پوزىتسىيە قەتئىي داۋاملاشتۇرۇلماقتا. تاكى پەلەستىنلىكلەرنىڭ ئاۋازى ئاڭلانغانغا، ئەدلىيە رېئاللىققا ئايلانغانغا قەدەر بۇ كۈرەش ئۈزلۈكسىز داۋاملىشىدۇ.»
ئۇ يەنە، رايوندا داۋاملىشىۋاتقان ئىنسانىي تىراگېدىيەنىڭ بارغانسېرى يامانلىشىۋاتقانلىقى تەكىتلەنگەن «تۈگىمەس ئىرقىي قىرغىنچىلىق: غەززە» ناملىق بىر ۋىدېيونىمۇ ئورتاقلاشتى.
