تۈركىيە ھاۋا يوللىرى شىركىتى بوئېڭ شىركىتىدىن 25 ى تاللاش خاراكتېرلىك بولۇپ جەمئىي 75 دانە B787-9 ۋە B787-10 تىپلىق ئايروپىلان سېتىۋېلىشنى قارار قىلغانلىقىنى بىلدۈردى.
تۈركىيە ھاۋا يوللىرى شىركىتىنىڭ جۈمە كۈنى ئېلان قىلغان باياناتىدا، 75 دانە بوئېڭ B787 تىپلىق ئايروپىلان زاكاز قىلىنىدىغانلىقى ۋە موتور ئىشلەپچىقارغۇچى CFM International بىلەن كېڭىشىش ئارقىلىق 150 دانە 737-8/10 MAX تىپلىق ئايروپىلان سېتىۋېلىش سۆھبەتلىرىنىڭ تاماملىنىش ئالدىدا تۇرۇۋاتقانلىقى بىلدۈرۈلدى.
تۈركىيەنىڭ بىردىنبىر پاي چېكى بازىرى بولغان، پاي چېكى، قەرز ۋاسىتىلىرى، تۇغۇندى مەھسۇلاتلار ۋە باشقا پۇل-مۇئامىلە مۈلۈكلىرى سېتىلىدىغان ئىستانبۇل بورساسىدا ئېلان قىلىنغان باياناتتا، تۈركىيە ھاۋا يوللىرى شىركىتىنىڭ بوئېڭ شىركىتىدىن 75 دانە B787-9 ۋە B787-10 تىپلىق ئايروپىلان سېتىۋېلىش قارارى چىقارغانلىقى ئەسكەرتىلدى.
شىركەت بۇ ئايروپىلانلارنى 2029-يىلدىن 2034-يىلغىچە تاپشۇرۇپ بېرىلىشىنىڭ پىلانلىنىۋاتقانلىقىنى ئۇقتۇردى.
ئايروپىلانلارنىڭ موتورى، زاپاس موتورلىرى ۋە موتور ئاسراش مۇلازىمەتلىرى توغرىسىدا Rolls-Royce ۋە GE Aerospace بىلەن سۆھبەتلەرنىڭ داۋاملىشىۋاتقانلىقى قەيت قىلىندى.
تۈركىيە ھاۋا يوللىرى شىركىتى يەنە، 150 دانە 737-8/10 MAX تىپلىق ئايروپىلان سېتىۋېلىش ئۈچۈن بوئېڭ شىركىتى بىلەن سۆھبەتلەرنى تاماملىغانلىقىنى تەكىتلىدى.
737-8/10 MAX تىپلىق ئايروپىلان زاكازلىرىنىڭ موتور ئىشلەپچىقارغۇچى CFM International بىلەن ئېلىپ بېرىلىدىغان سۆھبەتلەرنىڭ مۇۋەپپەقىيەتلىك ئاخىرلىشىشىغا باغلىق بولىدىغانلىقى بىلدۈرۈلدى.
شىركەت تەرىپىدىن ئېلان قىلىنغان باياناتتا مۇنداق دېيىلدى:
«مۇناسىۋەتلىك زاكازلار بىلەن بىرلىكتە، 2035-يىلىغا بارغاندا پۈتۈن فىلوتىمىزنىڭ يېڭى ئەۋلاد ئايروپىلانلاردىن تەشكىل تېپىشى، بۇ ئارقىلىق تىجارەت ئۈنۈمىمىزنىڭ كۈچەيتىلىشى ۋە يىللىق ئوتتۇرىچە ئېشىش نىسبىتىمىزنىڭ %6 ئەتراپىدا بولۇشى نىشان قىلىنماقتا.»
