موسكۋا بىريۇسسېلنىڭ رۇسىيەگە قارشى 19-قېتىملىق ئېمبارگو پىلانىنى تەستىقلىشىغا قارىماي، «يۈزەكى» ھەل قىلىش چارىلىرىغا قارشى ئاگاھلاندۇرۇش بەرمەكتە.
رۇسىيە تاشقى ئىشلار مىنىستىرلىقى دۈشەنبە كۈنى ئېلان قىلغان باياناتىدا، ئۇكرائىنادىكى ئۇرۇشنى ئاخىرلاشتۇرۇش ئۈچۈن تۈزۈلگەن ھەرقانداق تېنچلىق كېلىشىمىدىن مەقسەتنىڭ ئۇزۇن مۇددەتلىك ھەل قىلىش چارىسىغا كاپالەتلىك قىلىش ئۈچۈن، توقۇنۇشنىڭ «ئاساسىي سەۋەبلىرى» نى ھەل قىلىش بولۇشى كېرەكلىكىنى بىلدۈردى. بۇ بايانات ياۋروپا ئىتتىپاقىنىڭ موسكۋاغا قارىتا يېڭى ئېمبارگو پىلانىنى تۈزۈۋاتقان بىر مەزگىلدە ئوتتۇرىغا چىقتى.
رۇسىيە تاشقى ئىشلار مىنىستىرلىقىنىڭ باياناتچىسى مارىيا زاخاروۋا دۆلەتلىك تاس خەۋەر ئاگېنتلىقىغا بەرگەن باياناتىدا مۇنداق دېدى:
«بىز توقۇنۇشنى ئۇزارتىشنى ئەمەس، ئەكسىچە توقۇنۇشنىڭ ئاساسىي سەۋەبلىرىنى ھەل قىلىشنىڭ مۇھىملىقىنى ئوتتۇرىغا قويۇپ كېلىۋاتىمىز. دەرۋەقە، بۇ كېلىشىمنىڭ ئاساسى ئۇزۇن مۇددەتلىك تېنچلىققا كاپالەتلىك قىلىدىغان بىر ھەل قىلىش چارىسى بولۇشى كېرەك.»
رۇسىيەگە يېڭى ئېمبارگولار
بۇ باياناتلار ياۋروپا ئىتتىپاقى تاشقى ئىشلار مىنىستىرلىرىنىڭ لىيۇكسېمبۇرگدا بىر يەرگە جەم بولغان ۋاقتىدا ئېلان قىلىندى. ياۋروپا ئىتتىپاقى تاشقى سىياسەت ئىشلىرى مەسئۇلى كاجا كاللاس، ياۋروپا ئىتتىپاقنىڭ رۇسىيەگە قارىتا 19-قېتىملىق ئېمبارگو پىلانىنىڭ مۇشۇ ھەپتە تەستىقلىنىشىنىڭ مۇمكىنلىكىنى بىلدۈردى.
كاللاس يەنە، ئامېرىكا پىرېزىدېنتى ترامپ بىلەن رۇسىيە پىرېزىدېنتى ۋىلادىمىر پۇتىن ئوتتۇرىسىدا بۇداپېشتتا ئۆتكۈزۈلۈشى كۈتۈلۈۋاتقان ئۇچرىشىشنى تەنقىد قىلىپ، بۇ پىكىرنى «ياخشى بولمىغان» بىر ئۆزگىرىش دەپ ئاتىدى.
2022-يىلى فېۋرال ئېيىدا رۇسىيە بىلەن ئۇكرائىنا ئوتتۇرىسىدا ئۇرۇش پارتىلىغاندىن بۇيان، ياۋروپا ئىتتىپاقى موسكۋانىڭ مالىيە، ئېنېرگىيە ۋە مۇداپىئە ساھەلىرىنى، شۇنداقلا كىرېمىلگە يېقىن مۇھىم ئەمەلدارلار ۋە بايلارنى نىشان قىلغان بىرنەچچە ئېمبارگو پىلانىنى يولغا قويدى.
