تۈركىيە جۇمھۇرىيىتى جۇمھۇر رەئىسى رەجەپ تاييىپ ئەردوغاننىڭ رەپىقىسى ئەمىنە ئەردوغان، ئۇدا ئىككى يىلدىن بۇيان غەززەنىڭ 20 مىڭدىن ئارتۇق بالىنى ئۆز ئىچىگە ئالغان 67 مىڭ 160 نەپەر بىگۇناھ كىشى ئۆلتۈرۈلگەن بىر قەبرىستانلىققا، ئىنسانىيەتنىڭ ۋىجدانى كۆمۈلگەن تۇپراقلارغا ئايلانغانلىقىنى بىلدۈردى.
ئەمىنە ئەردوغان ئىسرائىلىيەنىڭ غەززەدىكى ئىرقىي قىرغىنچىلىقىنىڭ ئىككىنچى يىللىقىنى خاتىرىلەپ ئېلان قىلغان باياناتىدا، ئىسرائىلىيەنى پەلەستىن خەلقىنى پۈتۈن دۇنيانىڭ كۆز ئالدىدا يوقىتىشقا ئۇرۇنۇش بىلەن ئەيىبلىدى.
ئەمىنە ئەردوغان تۈركىيەنىڭ ئاممىۋى ئورتاقلىشىش تور بېتى NSosyal سەھىپىسىدە ئېلان قىلغان باياناتىدا مۇنداق دېدى:
«ئەخلاق كومپاسىنى يوقاتقان بىر دۆلەت بولغان ئىسرائىلىيە پۈتكۈل دۇنيانىڭ كۆز ئالدىدا پەلەستىن خەلقىنى يوقىتىشقا ئۇرۇنماقتا.
لېكىن، زالىمنىڭ زۇلمى كۆپەيگەنسېرى ئىرقىي قىرغىنچىلىققا قارشى بىر گەۋدىلەشكەن قەلبلەرنىڭ ساداسىمۇ تېخىمۇ كۈچلۈك ياڭرىماقتا. غەززە ئاخىرقى ئىككى يىلدا 20 مىڭدىن ئارتۇق بالىنى ئۆز ئىچىگە ئالغان 67 مىڭ 160 بىگۇناھ كىشى ئۆلتۈرۈلگەن بىر قەبرىستانلىققا، ئىنسانىيەتنىڭ ۋىجدانى تىرىك كۆمۈلگەن تۇپراقلارغا ئايلاندى. ئىسرائىلىيەنىڭ ھۇجۇملىرىدا بىرەر ئەخلاقىي، قانۇنىي، ئىنسانىي ۋە ئەخلاقىي ئۆلچەممۇ قالمىدى.»
ئەمىنە ئەردوغان مۇھاسىرە ئاستىدىكى رايونغا قاراپ يولغا چىققان ئاخىرقى غەززەگە ياردەم بېرىش پاراخوت ئەترىتى ھەققىدە توختىلىپ، دۇنيانىڭ ھەرقايسى جايلىرىدىن كەلگەن پىدائىيلارنىڭ غەززە ئۈچۈن ھاۋا، قۇرۇقلۇق ۋە دېڭىز ئارقىلىق سەپەرۋەر بولغانلىقىنى بىلدۈرۈپ مۇنداق دېدى:
«ۋىجدانلىق ھەر بىر كىشىنى تاكى ئۇزۇن مۇددەتلىك ۋە ئادىل تىنچلىق ئورنىتىلغانغا قەدەر بۇ كۈرەشكە قاتنىشىشقا، پەلەستىن ئۈچۈن ھەمنەپەس بولۇشقا چاقىرىمەن.
ئىسرائىلىيەنىڭ ھۇجۇملىرىدا شېھىت قىلىنغان پەلەستىنلىك قېرىنداشلىرىمىزغا ئاللاھتىن رەھمەت تىلەيمەن، زۇلۇمغا قارشى پىداكارلىق بىلەن كۈرەش قىلىۋاتقان پەلەستىن خەلقىگە ئاللاھتىن خاتىرجەملىك ۋە غەلىبە ئاتا قىلىشىنى تىلەيمەن.»
باياناتتا يەنە، ئەردوغاننىڭ غەززە توغرىسىدىكى ئىلگىرىكى نۇتۇقلىرىنى ۋە رايوندىكى ۋەيرانچىلىقنى كۆرسىتىپ بېرىدىغان كۆرۈنۈشلەرنى ئۆز ئىچىگە ئالغان بىر ۋىدېيوغىمۇ ئورۇن بېرىلدى.
