دۇنيا مىقياسىدا 400 دىن ئارتۇق ناخشىچى ۋە سەنئەتچى ئەسەرلىرىنى ئىسرائىلىيەنىڭ رەقەملىك سۇپىلىرىدىن قايتۇرۇۋېلىشنى نىشان قىلغان مەدەنىيەت جەھەتتىن بايقۇت قىلىش ھەرىكىتىگە قاتناشقانلىقلىرىنى جاكارلىدى. بۇ بايقۇت قىلىش ھەرىكىتى غەززەدە پەلەستىنلىكلەرگە قارىتىلغان ئىرقىي قىرغىنچىلىققا جاۋاب قايتۇرۇشنى مەقسەت قىلىدۇ.
ئىسرائىلىيەنىڭ ھۇجۇملىرى ئاستىدا ئاچارچىلىققا دۇچ كېلىۋاتقان پەلەستىنلىكلەرنىڭ، بولۇپمۇ بالىلارنىڭ سۈرەتلىرى دۇنيا جامائەتچىلىكىنىڭ قاتتىق غەزەپ – نەپرىتىنى قوزغاپ، دەرھال ھەرىكەتكە ئۆتۈش چاقىرىقلىرىنىمۇ كۈچەيتتى.
«‹Haaretz› گېزىتى» نىڭ خەۋىرىگە قارىغاندا، « No Music for Genocide) <ئىرقىي قىرغىنچىلىق ئۈچۈن مۇزىكا يوق> شوئارى بىلەن باشلانغان بۇ ھەرىكەت، سەنئەتچىلەرنى ئەسەرلىرىنى ئىسرائىلىيە سۇپىلىرىدىن قايتۇرۇۋېلىشقا چاقىرماقتا.
بايقۇت قىلىش ھەرىكىتىگە ئەنگىلىيەنىڭ Massive Attack گۇرۇپپىسى، شوتلاندىيەنىڭ Primal Scream گۇرۇپپىسى، ئامېرىكانىڭ Indie گۇرۇپپىسى، ياپونىيەنىڭ Japanese Breakfast گۇرۇپپىسى، ئامېرىكالىق ناخشىچى-ناخشا تېكىستى يازغۇچىسى Carole King، ياپونىيەنىڭ مودا چولپىنى Rina Sawayama ۋە دانىيەلىك سەنئەتچى MØ قاتارلىق داڭلىق شەخسلەر قاتناشتى.
سەنئەت بىلەن ئاقلىنىشقا بولمايدۇ!
بۇ ھەرىكەتنى ئۇيۇشتۇرغۇچىلارنىڭ باياناتىدا، بايقۇت قىلىش ھەرىكىتنىڭ Sony، Universal ۋە Warner قاتارلىق چوڭ مۇزىكا شىركەتلىرىنىمۇ رۇسىيە ئۇكرائىناغا تاجاۋۇز قىلغاندىن كېيىن تاشلىغان قەدەم-باسقۇچلىرىنى تەكرارلاشقا ۋە ئىسرائىلىيەگىمۇ ئوخشاش بېسىم ئىشلىتىشكە زورلاشنى نىشان قىلغانلىقى تەكىتلەندى.
باياناتتا مۇنداق دېيىلدى:
«مەدەنىيەتنىڭ يالغۇز بومبىلارنى توختىتىشقا كۈچى يەتمەيدۇ. ئەمما مەدەنىيەت سىياسىي بېسىمنى رەت قىلىشقا، ئاممىۋى پىكىرنى قوزغىتىپ، ئادالەت يۆنىلىشىدە تەسىر كۆرسىتىشكە ۋە ئىنسانىيەتكە قارشى جىنايەت سادىر قىلغان ھەرقانداق دۆلەت ياكى شىركەتنىڭ سەنئەت ئارقىلىق ئاقلىنىشى ۋە نورماللىشىشىنىڭ ئالدىنى ئېلىشقا تۆھپە قوشالايدۇ.»
بايقۇت قىلىش ھەرىكىتى ئىسرائىلىيەنىڭ غەززەدە داۋاملاشتۇرۇۋاتقان ئىرقىي قىرغىنچىلىق ھەرىكەتلىرى ھەم ھۇجۇملىرىغا قارشى دۇنيا مىقياسىدا ئۆتكۈزۈلۈۋاتقان نامايىش، مەدەنىيەت، تەنتەربىيە ۋە سەنئەت پائالىيەتلىرى دولقۇنىنىڭ بىر قىسمى دەپ قارالماقتا.
