بىر ئامېرىكا ئەمەلدارىنىڭ باياناتىغا ئاساسلانغاندا، ئامېرىكانىڭ يادرو زاپاسلىرىنى قوغداشقا مەسئۇل ئورگىنى، ھۆكۈمەتنىڭ قايتا ئېچىلىشى ئۈچۈن ئۆتكۈزۈلگەن دۆلەت مەجلىسىنىڭ ئاۋاز بېرىش پائالىيىتى مەغلۇب بولغاندىن كېيىن، خىزمەتچى خادىملىرىنىڭ كۆپىنچىسىنى مەجبۇرىي دەم ئېلىشقا چىقىرىشقا باشلىغان.
خامچوت كىرىزىسى 4 – ھەپتىگە قەدەم قويغاندا، دۆلەتلىك يادرو بىخەتەرلىك ئىدارىسى (NNSA) دىكى تەخمىنەن 1400 خىزمەتچى خادىمغا ھەقسىز دەم ئېلىشقا چىقىرىلغانلىقى توغرىسىدا ئۇقتۇرۇش ئەۋەتىشكە باشلىغان.
ئېنېرگىيە مىنىستىرلىقىنىڭ باياناتچىسى بۇ ھەقتە ئېلان قىلغان باياناتىدا مۇنداق دېدى:
«دېموكراتلار كەلتۈرۈپ چىقارغان ھۆكۈمەت ئىشلىرىنىڭ توختىتىلىشى سەۋەبىدىن، بۈگۈندىن باشلاپ تەخمىنەن 1400 دۆلەتلىك يادرو بىخەتەرلىك ئىدارىسى فېدېراتسىيە خىزمەتچى خادىمى دەم ئېلىشقا چىقىرىلىدۇ، تەخمىنەن 400 دۆلەتلىك يادرو بىخەتەرلىك ئىدارىسى فېدېراتسىيە خىزمەتچى خادىمى مۈلۈكنى قوغداش ۋە ئىنسان ھاياتىنىڭ بىخەتەرلىكى ئۈچۈن خىزمەت قىلىشنى داۋاملاشتۇرىدۇ.»
«ئاتوم ئالىملىرى گېزىتى» نىڭ خەۋىرىگە قارىغاندا، ئامېرىكانىڭ 5177 يادرو ئۇرۇش بومبىسى بار بولۇپ، بۇنىڭ تەخمىنەن 1770 ى ئورۇنلاشتۇرۇلغان.
60 مىڭ تارماق ئورۇننى نازارەت قىلىشقا مەسئۇل بولغان دۆلەتلىك يادرو بىخەتەرلىك ئىدارىسى بۇ قوراللارنىڭ لايىھىلىنىشى، ئىشلەپچىقىرىلىشى، قوغدىلىشى ۋە بىخەتەرلىكىگە كاپالەتلىك قىلىشقا مەسئۇل.
CNN نىڭ خەۋەر قىلىشىچە، دەم ئېلىشقا چىقىرىش ئالدى بىلەن تېكساس ئىشتاتىدىكى پانتېكس ۋە تېننېسسى ئىشتاتىدىكى Y-12 غا ئوخشىغان يادرو قوراللىرى قۇراشتۇرۇلىدىغان مۇئەسسەسەلەرگە تەسىر كۆرسىتىدىكەن.
ئامېرىكا ھازىرغا قەدەر ئەڭ ئۇزۇن ھۆكۈمەت تاقىلىپ قېلىش باسقۇچىنى باشتىن كەچۈرمەكتە.
پىرېزىدېنت دونالد ترامپ دېموكراتلار پارتىيەسىگە ھۆكۈمەتنى قايتىدىن ئېچىش ئۈچۈن، جۇمھۇرىيەتچىلەر پارتىيەسى بىلەن ئوخشاش يۆنىلىشتە ئاۋاز بېرىش ئۈچۈن بېسىمنى كۈچەيتتى.
ترامپ مۇنداق دېدى: «دېموكراتلار پارتىيەسىنىڭ تېخىمۇ ئاز قايمۇقۇشىنى ۋە يېقىندا ئاۋازغا قويۇشقا قاتنىشىشىنى ئۈمىد قىلىمىز.»
ئاۋام پالاتاسىنىڭ رەئىسى مايك جونسون مەجبۇرىي دەم ئېلىشنىڭ «ئامېرىكا خەلقى ئۈچۈن خەتەر» پەيدا قىلىدىغانلىقىنى ئېيتتى.
مۇتەخەسسىسلەرنىڭ قارىشىچە، ئامېرىكانىڭ يادرو تەييارلىقىدا رەقىبلىرىدىن ئارقىدا قېلىشى دۆلەتنىڭ «ئەڭ ئاخىرقى بۈيۈك دەرىجىدىن تاشقىرى كۈچ» ئورنىغا «ناھايىتى ئېغىر» تەھدىت شەكىللەندۈرىدىكەن.
