رۇسىيەنىڭ سابىق پىرېزىدېنتى دىمىترىي مېدۋېدېۋ رۇسىيە بىلەن بولغان ئۇرۇشنىڭ كەڭ كۆلەملىك قىرغۇچى قوراللارنى ئىشلىتىشكە سەۋەب بولىدىغان ئۇرۇشقا ئايلىنىپ كېتىش خەۋپىنىڭ بارلىقى توغرىسىدا ياۋروپانى ئاگاھلاندۇردى، ھەمدە ياۋروپا رەھبەرلىرىنى جىددىيچىلىك تېخىمۇ ئەۋج ئېلىپ كېتىۋاتقان مەزگىلدە ئىغۋاگەرچىلىكتىن ساقلىنىشقا چاقىردى.
رۇسىيەنىڭ سابىق پىرېزىدېنتى دىمىترىي مېدۋېدېۋ دۈشەنبە كۈنى ئېلان قىلغان باياناتىدا، ياۋروپانىڭ رۇسىيە بىلەن ئۇرۇش قىلىشقا قۇربى يەتمەيدىغانلىقىنى، لېكىن ئەگەر رەھبەرلەر بۇنداق خاتالىق سادىر قىلسا، بۇنىڭ كەڭ كۆلەملىك قىرغۇچى قوراللار ئىشلىتىلىدىغان بىر تۇقۇنۇشقا ئايلىنىپ كېتىدىغانلىقىنى ئېيتتى.
مېدۋېدېۋ ئاممىۋى ئورتاقلىشىش تور بېتى تېلېگرام سەھىپىسىدە ئېلان قىلغان باياناتىدا، رۇسىيەنىڭ بۇنداق ئۇرۇشقا، بولۇپمۇ «سوغۇق ۋە كونا ياۋروپا» بىلەن بولغان ئۇرۇشقا ئېھتىياجى يوقلۇقىنى بىلدۈرۈپ مۇنداق دېدى:
«ياۋروپا دۆلەتلىرىنىڭ رۇسىيە بىلەن ئۇرۇش قىلىشقا قۇربى يەتمەيدۇ. شۇنداقتىمۇ ھالاكەتلىك ئۇرۇشنىڭ يۈز بېرىش چىقىش ئېھتىماللىقى ناھايىتى يۇقىرى.
دەرۋەقە، بۇنداق توقۇنۇشنىڭ كەڭ كۆلەملىك قىرغۇچى قوراللار ئىشلىتىلىدىغان ئۇرۇشقا ئايلىنىپ كېتىش خەۋپى رېئاللىققىمۇ پۈتۈنلەي ئۇيغۇندۇر.»
نۆۋەتتە رۇسىيە خەۋپسىزلىك كېڭىشىنىڭ مۇئاۋىن رەئىسى بولۇپ ۋەزىپە ئۆتەۋاتقان مېدۋېدېۋ، ياۋروپا دۆلەتلىرىدە كەلگۈسى بەش يىل ئىچىدە رۇسىيە بىلەن بولغان ئۇرۇش ئېھتىماللىقى توغرىسىدىكى پەرەزلەرنى تۈگىتىش كېرەكلىكىنى تەكىتلىدى ھەمدە بۇنىڭ موسكۋانىڭ مەنپەئەتلىرىگىمۇ زىت كېلىدىغانلىقىنى بىلدۈردى.
ئۇ يەنە ياۋروپا ئىقتىسادىنىڭ «ئاجىز ۋە ئامېرىكاغا بېقىندى» ئىكەنلىكىنى ئىلگىرى سۈرۈپ، بۇ قىتئەنى «سالاھىيىتىنى يوقىتىش ۋە تاجاۋۇزچى كۆچمەنلەر ئىچىدە ئېرىپ كېتىش» بىلەن ئەيىبلىدى.
2008-2012-يىللىرى ئارىسىدا رۇسىيە پىرېزىدېنتى بولغان مېدۋېدېۋ، ئۇكرائىنا ئۇرۇشى جەريانىدا غەرب ھۆكۈمەتلىرىگە قارشى قاتتىق بايانلىرى بىلەن تونۇلغان ئىدى.
مېدۋېدېۋنىڭ ئەڭ يېڭى باياناتى، ياۋروپادا دۆلەت مۇداپىئە خىراجەتلىرى ۋە خەۋپسىزلىك تەييارلىقلىرى توغرىسىدىكى مۇنازىرىلەرنىڭ كۆپىيىپ كېتىشىدىن كېيىن ئېلان قىلىندى.
