تۈركىيە دۆلەت مۇداپىئە مىنىستىرلىقى تۈركىيەنىڭ پاراخوتلىرىنىڭ ئېھتىياج تۇغۇلغان تەقدىردە، مۇناسىۋەتلىك ئورگانلار ۋە خەلقئارا تەرەپلەر بىلەن ماسلىشىپ، ئىزدەش - قۇتقۇزۇش ئىقتىدارلىرىنى جارى قىلدۇرۇشقا تەييار ئىكەنلىكىنى بىلدۈردى.
مىنىستىرلىقنىڭ چارشەنبە كۈنى ئاممىۋى ئورتاقلىشىش تور بېتى «NSosyal» سەھىپىسىدە ئېلان قىلىنغان باياناتىدا مۇنداق دېيىلدى:
«تۈركىيە خەلقئارا قانۇن ۋە ئىنسانپەرۋەرلىك قىممەت قاراشلىرى دائىرىسىدە، ھازىر شەرقىي ئاقدېڭىزدا كېتىۋاتقان پۇقراۋى پاراخوتلار بىلەن ئېلىپ بېرىلىۋاتقان ئىنسانپەرۋەرلىك ياردەم پائالىيەتلىرىنىڭ بىخەتەر داۋاملىشىشىنى يېقىندىن كۆزەتمەكتە.
رايوندا دائىم ھەر خىل مەشىق ۋە مانېۋىرلارنى ئېلىپ بېرىۋاتقان پاراخوتلىرىمىز ئىزدەش - قۇتقۇزۇش ئىقتىدارىغا ئىگە بولۇپ، ئېھتىياج تۇغۇلغاندا مۇناسىۋەتلىك ئورگانلار ۋە خەلقئارا تەرەپلەر بىلەن ماسلىشىپ، ئىنسانپەرۋەرلىك ياردەم ۋەزىپىلىرىنى قوللاشقا تەيياردۇر.
تۈركىيە بۈگۈنگىچە داۋاملاشتۇرۇپ كەلگىنىدەك، بۇنىڭدىن كېيىنمۇ ئىنسانپەرۋەرلىك قىممەت قاراشلىرىنى قوغداش، بىگۇناھ پۇقرالارنىڭ بىخەتەرلىكى ئۈچۈن ھەر يەردە ۋە ھەرقانداق ئەھۋالدا زىممىسىگە يۈكلەنگەن مەسئۇلىيەتلىرىنى ئادا قىلىشنى قەتئىي داۋاملاشتۇرىدۇ.»
