نامايىشنى ئۇيۇشتۇرغۇچىلار: «سايلام ئېيىدا پايتەختتە قىزىل سىزىق سىزىش ئارقىلىق، گوللاندىيەدىكى سىياسەتچىلەر ۋە پۇقرالارنى ئىسرائىلىيەگە قارشى قەتئىي ئىرادە بىلەن تېخىمۇ كۈچلۈك نارازىلىق بىلدۈرۈشكە چاقىرىمىز» دېدى.
ئامىستېردام كوچىلىرىدا غەززەددە داۋاملىشىۋاتقان ئىرقىي قىرغىنچىلىق ئۇرۇشىغا قارشى گوللاندىيە ھۆكۈمىتىنىڭ تېخىمۇ كۈچلۈك تەدبىر قوللىنىشىنى تەلەپ قىلغان كەڭ كۆلەملىك «قىزىل سىزىق» نامايىشى ئۆتكۈزۈلدى.
تەشكىللىگۈچىلەرنىڭ باياناتىغا قارىغاندا، يەكشەنبە كۈنى ئۆتكۈزۈلگەن نامايىشقا 250 مىڭغا يېقىن ئادەم قاتناشقان. NOS رادىيوسىنىڭ بىلدۈرۈشىچە، بۇ يېقىنقى يىللاردىن بۇيان گوللاندىيەدە ئۆتكۈزۈلگەن ئەڭ چوڭ نامايىشلاردىن بىرى ئىكەن.
قىزىل رەڭلىك كىيىم كىيگەن نامايىشچىلار ھۆكۈمەتنىڭ ئىسرائىلىيەگە تۇتقان پوزىتسىيەسىگە قارشى سىمۋوللۇق «قىزىل سىزىق» سىزىش مەقسىتىدە، پايتەختتىكى مۇزېي مەيدانىغا (Museumplein) يىغىلغاندىن كېيىن يۈرۈش قىلدى.
تەشكىللىگۈچىلەر ماي ۋە ئىيۇن ئايلىرىدا لاھېي شەھىرىدە ئۆتكۈزۈلگەن ئالدىنقى قېتىملىق «قىزىل سىزىق» نامايىشلىرىغا ئايرىم-ئايرىم ھالدا 100 مىڭ ۋە 150 مىڭ ئادەمنىڭ قاتناشقانلىقىنى بىلدۈردى. ئۇلار ئۈچىنچى قېتىملىق «قىزىل سىزىق» نامايىشى ئۆتكۈزۈشىنىڭ سەۋەبىنى «ئۇرۇشنى توختىتىش ئۈچۈن ناھايىتى ئاز ئىش قىلىندى» دەپ چۈشەندۈردى.
تەشكىللىگۈچىلەر تەرىپىدىن ئېلان قىلىنغان باياناتتا مۇنداق دېيىلدى:
«سايلام ئېيىدا پايتەختتە قىزىل سىزىق سىزىش ئارقىلىق، سىياسەتچىلەر ۋە گوللاندىيە خەلقىنى ئىسرائىلىيەگە قارشى قەتئىي ئىرادە بىلەن تېخىمۇ كۈچلۈك نارازىلىق بىلدۈرۈش ھەم تەدبىر قوللىنىشقا چاقىرىمىز.»
خەلقئارا كەچۈرۈم تەشكىلاتى، ئوكىسفام نوۋىب، پاكس ۋە كىشىلىك ھوقۇق مۇنبىرى قاتارلىق 130 دىن ئارتۇق كىشىلىك ھوقۇق تەشكىلاتى بۇ يۈرۈشنى قوللىدى. شۇنداقلا، بىرنەچچە يەھۇدىي تەشكىلاتى ئىسرائىلىيەنىڭ سىياسەتلىرىگە نارازىلىق بىلدۈرۈش ۋە بۇ سىياسەتلەرنىڭ پۈتۈن يەھۇدىي جەمئىيەتلىرىگە ۋەكىللىك قىلالمايدىغانلىقىنى تەكىتلەش ئۈچۈن نامايىشقا قاتناشتى.
«ئىرقىي قىرغىنچىلىقنى قوللاشنى توختىتىڭلار»
نامايىشچىلار گوللاندىيەنىڭ «ئىرقىي قىرغىنچىلىقنى قوللاشنى توختىتىشى» ۋە ئىسرائىلىيەنىڭ 2023-يىلى ئۆكتەبىردىن بۇيان 67 مىڭدىن ئارتۇق كىشىنى ئۆلتۈرگەن غەززە ئۇرۇشىدا دەرھال ئۇرۇش توختىتىشقا چاقىرىق قىلىشى كېرەكلىكى بىلدۈرۈلگەن ۋىۋىسكا ۋە تاختىلارنى ئېلىپ ماڭدى.
باش ۋەزىر دىك شۇف ئاممىۋى ئورتاقلىشىش تور بېتى X سەھىپىسىدە ئېلان قىلغان باياناتىدا، نامايىشچىلارنىڭ «غەزەپ - نەپرەتلىرى، ئەندىشىلىرى ۋە ئۈمىدسىزلىك تۇيغۇلىرىنى» چۈشەنگەنلىكىنى ئىپادىلەپ مۇنداق دېدى:
«غەززەدىكى تىل بىلەن تەسۋىرلەپ بەرگىلى بولمايدىغان ئازاب-ئوقۇبەتلەرنى نە قوبۇل قىلغىلى، نە ئاقلىغىلى بولمايدۇ. ھۆكۈمىتىمىز سىياسىتىنى ئۆزگەرتىشىشى ئۈچۈن ئىسرائىلىيەگە بېسىم ئىشلىتىۋاتىدۇ، شۇنداقلا ئۇرۇش توختىتىشقا ياردەمچى بولۇش ئۈچۈن ناھايىتى زور تىرىشچانلىق كۆرسىتىۋاتىدۇ.
ترامپنىڭ ئۇرۇش توختىتىش تەكلىپى ئۈمىد بېغىشلىماقتا. گوللاندىيە قاتار ۋە مىسىرنىڭ ئۇرۇشنى ئاخىرلاشتۇرۇش تىرىشچانلىقلىرىنى قوللىماقتا.
غەززەدىكى ئۇرۇش توختىشى ۋە ئوتتۇرا شەرقتە ئۇزۇن مۇددەتلىك ھەم ئادىل تىنچلىق ئورنىتىلىشى كېرەك.»
باشقا جايلاردىكى نامايىشلار
ئىسپانىيەدە 21 پائالىيەتچىنىڭ قايتىپ كېلىشى بىلەن، پۈتۈن دۆلەت مىقياسىدا ئون مىڭلىغان كىشى غەززەدىكى ئىرقىي قىرغىنچىلىق ئۇرۇشىغا قارشى نامايىش ئۆتكۈزدى.
پاكىستاننىڭ سودا پايتەختى كاراچىدا ئون مىڭلىغان كىشى، ئىسرائىلىيەنىڭ غەززەگە قىلغان ھۇجۇمىنىڭ ئىككىنچى يىللىقىنى خاتىرىلەش ۋە قورشاۋ ئاستىدىكى رايوندا داۋام قىلىۋاتقان ئىرقىي قىرغىنچىلىق ئۇرۇشىغا قارشى خەلقئارا جەمئىيەتنىڭ سۈكۈت قىلىشىنى بۇزۇشقا چاقىرىش ئۈچۈن يەكشەنبە كۈنى كوچىلارغا چىقىپ نامايىش ئۆتكۈزدى.
ئۈچ رەڭلىك پەلەستىن بايرىقىنى لەپىلدەتكەن ۋە ئەنئەنىۋى كەففىيە (پەلەستىننىڭ مىللىي ئەنئەنىسى ۋە كۈرىشىنىڭ سىمۋولى بولغان) شارپىلىرىنى تاقىغان ئەرلەر، ئاياللار ۋە بالىلار پاكىستان مىقياسىدا يېڭى بىر نامايىش دولقۇنىنىڭ بىر قىسمى سۈپىتىدە شەھەرنىڭ ئاساسلىق كوچىسى شاھار – ئى فەيسەلدە نامايىش ئۆتكۈزدى.
بۇ نامايىش پاكىستاندا يېقىنقى ئايلاردا نۇرغۇن نامايىش يۈرۈشلىرىگە رەھبەرلىك قىلغان ئاساسىي ئېقىمدىكى دىنىي – سىياسىي پارتىيە جامائەت ئىسلامى (ئىسلام جامائىتى) تەشكىلاتى تەرىپىدىن ئۇيۇشتۇرۇلدى.
تۈركىيەدە بولسا، ئىستانبۇل ۋە ئەنقەرەدە بىر يەرگە جەم بولغان كەڭ خەلق ئاممىسى، قورشاۋ ئاستىدىكى رايوندىكى ئىسرائىلىيەنىڭ ئىرقىي قىرغىنچىلىقىغا قارشى تۈركىيە ۋە پەلەستىن بايراقلىرىنى لەپىلدەتكەن ھالدا نامايىش ئۆتكۈزدى.
