ياپونىيە تاشقى ئىشلار ۋەزىرى تاكېشى ئىۋايا ب د ت يىغىنىدا سۆز قىلىپ، پەلەستىننى ئېتىراپ قىلىشنىڭ «ئەمەلگە ئېشىشى ياكى ئەمەلگە ئاشماسلىقى مەسىلىسى ئەمەس، بەلكى قاچان ئەمەلگە ئېشىشى مەسىلىسى» ئىكەنلىكىنى بىلدۈردى.
ياپونىيە ئىسرائىلىيە پەلەستىندە ئىككى دۆلەتلىك ھەل قىلىش يولىنى توسۇپ قويىدىغان قەدەملەرنى تاشلىسا، «يېڭى تەدبىرلەرنى ۋە جاۋاب قايتۇرۇشنى» ئويلىشىدىغانلىقى توغرىسىدا ئىسرائىلىيەنى ئاگاھلاندۇردى.
ياپونىيە تاشقى ئىشلار ۋەزىرى تاكېشى ئىۋايا بىرلەشكەن دۆلەتلەر تەشكىلاتى ئومۇمىي كېڭىشىنىڭ نىيۇ يوركتا پەلەستىن مەسىلىسى توغرىسىدا چاقىرىلغان يىغىنىدا مۇنداق دېدى:
«ياپونىيە پەلەستىن خەلقىنىڭ مۇستەقىل دۆلىتىنى قۇرۇش ئارزۇسىنى تولۇق قوللايدۇ.
ئەگەر ئىسرائىلىيە ئىككى دۆلەتلىك ھەل قىلىش يولىنى ئەمەلگە ئاشۇرۇشقا توسقۇنلۇق قىلىدىغان تېخىمۇ كۆپ قەدەملەرنى تاشلىسا، ياپونىيە يېڭى تەدبىرلەرنى قوللىنىشقا ۋە جاۋاب قايتۇرۇشقا مەجبۇر بولىدۇ.»
ئىۋايا توكيونىڭ ئۇزۇن ۋاقىتتىن بۇيان ئىككى دۆلەتلىك ھەل قىلىش يولىنى قوللاپ كېلىۋاتقانلىقىنى تەكىتلەپ مۇنداق دېدى:
«مېنىڭ دۆلىتىم ئۈچۈن پەلەستىن دۆلىتىنى ئېتىراپ قىلىش مەسىلىسى، ئەمەلگە ئېشىشى ياكى ئەمەلگە ئاشماسلىقى مەسىلىسى ئەمەس، بەلكى قاچان ئەمەلگە ئېشىشى مەسىلىسىدۇر.»
ئالدىنقى بىرنەچچە ھەپتە ئىچىدە ئاۋسترالىيە، كانادا، ئەنگلىيە، فىرانسىيە، بېلگىيە ۋە باشقا نۇرغۇن دۆلەتلەر پەلەستىننى رەسمىي ئېتىراپ قىلغان بولسىمۇ، ئەمما ياپونىيە ھازىرغىچە پەلەستىننى ئېتىراپ قىلىش چاقىرىقلىرىغا قارشى تۇرۇپ كەلگەن ئىدى.
ھالقىلىق بۇرۇلۇش نۇقتىسى
ئىۋايا مۇنداق دېدى:
«غەززەدىكى ئىنسانىي كىرىزىسنىڭ بارغانسېرى يامانلىشىپ كېتىشى، ئىشغال ئاستىدىكى ئىيوردان دەرياسىنىڭ غەربىي قىرغىقىدىكى قانۇنسىز ئولتۇراق رايون بەرپا قىلىش پائالىيەتلىرىنىڭ كۆپىيىپ كېتىشى ۋە ئىسرائىلىيەنىڭ پەلەستىن زېمىنلىرىنى بېسىۋېلىش ھەرىكەتلىرىنى قەتئىي قوبۇل قىلغىلى بولمايدۇ.
ياپونىيە بۇ ھەرىكەتلەرنى قاتتىق ئەيىبلەيدۇ ۋە ئىسرائىلىيەنى بۇ خىلدىكى بارلىق بىر تەرەپلىمىلىك پائالىيەتلىرىنى دەرھال توختىتىشقا چاقىرىدۇ.
دەرۋەقە، بۇ ئەھۋال ئىككى دۆلەتلىك ھەل قىلىش يولىنىڭ ئاساسىغا تەھدىت شەكىللەندۈرىدىغان ھالقىلىق ۋە ئەندىشىلىك بۇرۇلۇش نۇقتىسىغا بېرىپ يەتتى. بۇ ھەقتە ئىسرائىلىيەنى ئاگاھلاندۇرىمىز.»
ياپونىيەنىڭ ئىسرائىلىيەنىڭ ئىشغالىيىتى ئاستىدىكى ئىيوردان دەرياسىنىڭ غەربىي قىرغىقىنى قايتا قۇرۇشقا مۇھىم تۆھپىلەرنى قوشقانلىقىنى ئەسكەرتكەن ئىۋايا، توكيونىڭ «كەڭ دائىرىلىك تەۋسىيەلىرىنى تېخىمۇ ئەستايىدىللىق بىلەن ئىزچىل داۋاملاشتۇرىدىغانلىقىنى» بىلدۈردى ۋە پەلەستىن بىلەن ئىسرائىلىيەنىڭ تىنچلىق ئىچىدە ھەر دائىم بىرلىكتە ياشىشىنىڭ زۆرۈرلۈكىنى تەكىتلىدى.
ئالدىنقى يىلى ئىيۇل ئېيىدا ياپونىيە ئىشغال ئاستىدىكى ئىيوردان دەرياسىنىڭ غەربىي قىرغىقىدىكى پەلەستىنلىكلەرگە قارىتىلغان زوراۋانلىققا چېتىشلىق بولغان ئىسرائىلىيە پۇقراسى 4 يەھۇدىي كۆچمەنگە تۇنجى قېتىم ئېمبارگو يۈرگۈزگەن ئىدى.
بۇ يىغىن، ب د ت ئومۇمىي كېڭىشى يىغىنىنىڭ 80 – نۆۋەتلىك يىغىنىنىڭ ئېچىلىشىدىن بىر كۈن بۇرۇن ۋە ب د ت تەتقىقاتچىلىرى: «ئىسرائىلىيە 2023 – يىلى ئۆكتەبىردىن بۇيان 65 مىڭ 300 دىن ئارتۇق پەلەستىنلىكنى ئۆلتۈرگەن ۋە غەززەدە ئىرقىي قىرغىنچىلىق يۈرگۈزگەن» دەپ يەكۈن چىقىرىشىدىن بىرنەچچە كۈن كېيىن ئۆتكۈزۈلدى.
