7 دۆلەت گۇرۇھى تاشقى ئىشلار مىنىستىرلىرى غەززەنى قايتا قۇرۇش ۋە ئىككى دۆلەتلىك ھەل قىلىش چارىسىنى ئاساس قىلغان ئۇزۇن مۇددەتلىك تىنچلىق ئۈچۈن ئەرەب ئىتتىپاقداشلىرى بىلەن ھەمكارلىشىشقا تەييار ئىكەنلىكلىرىنى بىلدۈردى.
7 دۆلەت گۇرۇھى تاشقى ئىشلار مىنىستىرلىرى ئۇكرائىنانى قوللاشنى كۈچەيتىش، غەززەگە ئىنسانپەرۋەرلىك ياردەم بېرىش ۋە غەززەدە ئۇرۇش توختىتىش چاقىرىقىدا بولدى، شۇنداقلا ھايتىدا يېڭى خەلقئارالىق بىخەتەرلىكنى ساقلاش ئىش بېجىرىش ئورنى تەسىس قىلىش پىلانىنى تەستىقلىدى.
چارشەنبە كۈنى نىيۇ يوركتا چاقىرىلغان بىرلەشكەن دۆلەتلەر تەشكىلاتى ئومۇمىي كېڭىشى يىغىنى ئارىلىقىدا ئۆتكۈزۈلگەن يىغىندىن كېيىن ئېلان قىلىنغان بىرلەشمە باياناتتا، كانادا، فىرانسىيە، گېرمانىيە، ئىتالىيە، ياپونىيە، ئەنگلىيە، ئامېرىكا قوشما ئىشتاتلىرى ۋە ياۋروپا ئىتتىپاقى ئەللىرىنىڭ تاشقى ئىشلار مىنىستىرلىرى، رۇسىيەنىڭ ئېستونىيە، پولشا ۋە رۇمىنىيە ھاۋا تەۋەلىكىنى بېسىۋېلىشىنى قوبۇل قىلغىلى بولمايدىغانلىقىنى جاكارلىدى، ھەمدە بۇنداق ھەرىكەتلەرنىڭ خەلقئارالىك خەۋپسىزلىكنى ئاجىزلاشتۇرۇش خەۋپىنى توغدۇرىدىغانلىقى توغرىسىدا ئاگاھلاندۇردى.
ئۇلار «ئۇزۇن مۇددەتلىك تىنچلىق ئورنىتىش، كۈچلۈك، مۇستەقىل، ئىگىلىك ھوقۇقلۇق ۋە گۈللەنگەن ئۇكرائىنا» غا بولغان ۋەدىسىدە چىڭ تۇرىدىغانلىقلىرىنى يەنە بىر قېتىم تەكىتلەپ، كىيېۋنىڭ بىخەتەرلىكىگە كاپالەتلىك قىلىش ئۈچۈن ئامېرىكا قوشما ئىشتاتلىرى بىلەن داۋاملىق ھەمكارلىشىدىغانلىقلىرىنى بىلدۈردى.
مىنىستىرلار رۇسىيەگە قارشى تېخىمۇ كۆپ ئىقتىسادىي تەدبىر قوللىنىشنى مۇزاكىرە قىلغانلىقلىرىنى، ئۈچىنچى دۆلەتلەر ئارقىلىق بېرىلگەن قوللاشلارغا قارشى ھەرىكەت قوللىنىشنى پىلانلىغانلىقلىرىنى ۋە رۇسىيەنىڭ توڭلىتىپ قويۇلغان مال – مۈلۈكلىرىنى ئۇكرائىنانى قوللاش ئۈچۈن ئىشلىتىش توغرىسىدىكى مۇزاكىرىلەرنىڭ داۋاملىشىشىدىن ئىنتايىن خۇرسەن ئىكەنلىكلىرىنى بايان قىلدى.
ئىككى دۆلەتلىك ھەل قىلىش چارىسى ئاساسىدىكى ئۇزۇن مۇددەتلىك تىنچلىق
7 دۆلەت گۇرۇھى ئوتتۇرا شەرق رايونىنىڭ ۋەزىيىتى ھەققىدە مۇزاكىرە ئېلىپ باردى. جۈملىدىن غەززەدىكى پۇقرالارنىڭ زور ئازاب-ئوقۇبەتلىرىنى يېنىكلىتىش ئۈچۈن جىددىي ئىنسانپەرۋەرلىك ياردەم بېرىشنىڭ مۇھىملىقىنى تەكىتلەپ، بارلىق گۆرۈگە ئېلىۋېلقنغانلارنىڭ قويۇپ بېرىلىشىنى تەلەپ قىلدى.
ئىسرائىلىيەنىڭ غەززەدە داۋاملاشتۇرۇۋاتقان ئۇرۇشىنى توختىتىش چاقىرىقىنى يەنە بىر قېتىم تەكرارلىغان 7 دۆلەت گۇرۇھى، غەززەنى قايتا قۇرۇش ۋە ئىككى دۆلەتلىك ھەل قىلىش چارىسىنى ئاساس قىلغان ئۇزۇن مۇددەتلىك تىنچلىق ئورنىتىش ئۈچۈن ئەرەب ئىتتىپاقداشلىرى بىلەن ھەمكارلىشىشقا تەييار ئىكەنلىكىنى بىلدۈردى.
ب د ت نىڭ ھايتىدا تەسىس قىلىنغۇسى ئىش بېجىرىش ئورنى
كارىب دېڭىزىغا مۇناسىۋەتلىك باياناتتا، ئامېرىكا قوشما ئىشتاتلىرى ۋە پانامانىڭ ھايتى ئۈچۈن بىرلەشكەن دۆلەتلەر تەشكىلاتى ياردەم بېرىش ئىش بېجىرىش ئورنى تەسىس قىلىش تىرىشچانلىقلىرىنىڭ تولىمۇ خۇشاللىنارلىق ئەھۋال ئىكەنلىكى قەيت قىلىندى. بۇ ئىش بېجىرىش ئورنى ھازىرقى كۆپ دۆلەتلىك خەۋپسىزلىك ۋاكالەتخانىسىنى قوللاپ، شايكىلارنى تارقىتىۋېتىش، ئۇل ئەسلىھەلەرنىڭ بىخەتەرلىكىگە كاپالەتلىك قىلىش ۋە ھايتى دائىرىلىرى بىلەن ھەمكارلىشىپ مۇقىملىقنى ئەسلىگە كەلتۈرۈش مەسئۇلىيىتىنى ئۈستىگە ئالىدىغان يېڭى بىر كۈچكە ئايلاندۇرىدۇ.
ئىران ۋە يادرو قوراللىرىنىڭ كەڭ تارقىلىشىنىڭ ئالدىنى ئېلىش
مىنىستىرلار ئىراننى يادرو قوراللىرىنىڭ كەڭ تارقىلىشىنىڭ ئالدىنى ئېلىش پىرىنسىپلىرىغا تولۇق ئەمەل قىلىشقا، خەلقئارا ئاتوم ئېنېرگىيەسى ئورگىنى بىلەن ھەمكارلىقنى ئەسلىگە كەلتۈرۈشكە ۋە تېھراننىڭ يادرو قوراللىرىغا ئىگە بولۇشىنىڭ ئالدىنى ئالىدىغان «كۈچلۈك، ئۇزۇن مۇددەتلىك ۋە خەلقئارالىق» بىر كېلىشىم ھاسىل قىلىش ئۈچۈن ۋاشىنگتون بىلەن بىۋاسىتە سۆھبەت ئۆتكۈزۈشكە چاقىردى.
مىنىستىرلار يەنە ئەنگلىيە، فىرانسىيە ۋە گېرمانىيەنىڭ يادرو كېلىشىمىدە بەلگىلەنگەن «تېزلەشتۈرۈش» مېخانىزمىنى ئىشقا كىرىشتۈرۈش قارارىنى قوللايدىغانلىقىنى بىلدۈردى.
ھىندى-تىنچ ئوكيان خەۋپسىزلىكى
7 دۆلەت گۇرۇھى ئەركىن ۋە ئوچۇق ھىندى-تىنچ ئوكيان رايونىنىڭ بىخەتەرلىكىنى قوغداش توغرىسىدىكى ۋەدىسىدە چىڭ تۇرىدىغانلىقلىرىنى يەنە بىر قېتىم تەكىتلەپ، شەرقىي ۋە جەنۇبىي خىتاي دېڭىزىدا، شۇنداقلا تەيۋەن بوغۇزىدا «كۈچ ياكى بېسىم ئارقىلىق بىر تەرەپلىمە ھالدا ھازىرقى ئەھۋالنى ئۆزگەرتىۋېتىش ئۇرۇنۇشلىرى» غا قارشى تۇرىدىغانلىقىنى بىلدۈردى.
مىنىستىرلار يەنە شىمالىي كورېيەنىڭ يادرو قورالسىزلىنىشىنى ۋە ياپونىيەنىڭ تۇتۇپ كېتىلگەن پۇقرالىرى مەسىلىسىنى ھەل قىلىشنى قوللايدىغانلىقلىرىنى يەنە بىر قېتىم تەكىتلىدى.
