ئىستانبۇل شەھەر باشلىقى ئەكرەم  ئىمامئوغلۇ چارشەنبە كۈنى (2025-يىلى 19-مارت) نازارەت ئاستىغا ئېلىنغاندىن كېيىن، شەھەرلىك ھۆكۈمەت ئۈستىدىن باشلانغان چىرىكلىك تەكشۈرۈشى دائىرىسدە رەسمىي قولغا ئېلىندى.

ئىستانبۇل جۇمھۇرىيەت باش تەپىش ئىدارىسى بۇ توغرىدا: «جۇمھۇرىيەت باش تەپتىش ئىدارىسى تەرىپىدىن باشلانغان تەكشۈرۈشلەر رامكىسىدا، سۇلھى جىنايى ئىشلار سوت مەھكىمىسى ئىمامئوغلۇنى قانۇنغا خىلاپ تەشكىلات قۇرۇش ۋە باشچىلىق قىلىش، پارا ئېلىش، قانۇنغا خىلاپ ھالدا خۇسۇسىي ئۇچۇرلارنى ساقلاش، سودا توختاملىرىغا پىتنە-پاسات ئارىلاشتۇرۇش قاتارلىق جىنايەتلەر بىلەن ئەيىبلەپ قولغا ئېلىشقا؛ تېررورلۇق بىلەن ئەيىبلىنىپ قولغا ئېلىشقا كېرەك يوقلۇقىغا ھۆكۈم قىلدى» دەپ بايانات ئېلان قىلدى.

ئىستانبۇل جۇمھۇرىيەت باش تەپتىش ئىدارىسى ئىمامئوغلۇ بىلەن بىرلىكتە 99 گۇماندار ئۈستىدىن قانۇنغا خىلاپ تەشكىلات قۇرۇش ۋە باشچىلىق قىلىش، قانۇنسىز تەشكىلاتقا ئەزا بولۇش، پارا ئېلىش، ئومۇمنىڭ مال-مۈلكىنى ئۈستىگە ئۆتكۈزۈۋېلىش، قويمىچىلىق قىلىش، خۇسۇسىي ئۇچۇرلارنى قانۇنسىز ھالدا ساقلاش، ھۆكۈمەت قۇرۇلۇشلىرىغا خېرىدار چاقىرىشتا قانۇنسىزلىق قىلىش قاتارلىق جىنايەتلەر بىلەن ئەيىبلەپ تەكشۈرۈشنى باشلىغان ئىدى.

گۇماندارلار جۈمە ۋە شەنبە كۈنلىرى (22-23-مارت) ساقچى ئىدارىسىدىكى سوراقتىن كېيىن، سۇلھى جىنايى ئىشلار سوت مەھكىمىسى تەرىپىدىن سوتقا تارتىلغان ئىدى.

ئىمامئوغلۇ تېررورلۇق تەشكىلاتى پ ك ك| ك ج ك چېتىلىش بىلەن ئەيىبلەنگەندىن باشقا، «شەھەر مۇرەسسەسى» دەپ ئاتالغان پ ك ك| ك ج ك تېررورلۇق تەشكىلاتىنىڭ شەھەرلەردە تەسىرىنى كۈچەيتىشنى مەقسەت قىلىپ قۇرغانلىقى ئىلگىرى سۈرۈلگەن تەشكىلاتقا ئەزا بولۇش جىنايەتلىرى بىلەن ئەيىبلەنمەكتە.

تەكشۈرۈش دائىرىسىدە، ئىمامئوغلۇنىڭ مەسلىھەتچىسى ۋە ئىستانبۇل شەھەرلىك ھۆكۈمەتنىڭ قارمىقىدىكى مېديا چەكلىك شىركىتىنىڭ باشلىقى مۇرات ئونگۇن، ئىمامئوغلۇ قۇرۇلۇش شىركىتىنىڭ مۇدىرى تۇنجاي يىلماز قاتارلىق كىشىلەرمۇ قولغا ئېلىندى.

ئىمامئوغلۇ ۋە باشقا گۇماندارلارنىڭ ئەيىبلەشلەرنى رەت قىلغانلىقى بىلدۈرۈلدى.