ئىراننىڭ دىنىي رەھبىرى، ئامېرىكا پىرېزىدېنتى دونالد ترامپنى ئامېرىكا ھەربىي ھۇجۇملىرىنىڭ ئىراننىڭ يادرو مۇئەسسەسەلىرىگە قارشى قولغا كەلتۈرگەن مۇۋەپپەقىيەتلىرىنى مۇبالىغە قىلىش بىلەن ئەيىبلەپ، بۇ ھۇجۇملارنىڭ ھېچقانداق مۇھىم نەتىجىگە ئېرىشەلمىگەنلىكىنى تەكىتلىدى.
ئەلى خامەنېي يەكشەنبە كۈنى ئۆزىنىڭ رەسمىي X ئادرېسىدا بايانات ئېلان قىلىپ: «ئامېرىكا پىرېزىدېنتى ۋەقەلەرنى ھەددىدىن زىيادە مۇبالىغە قىلدى، ئۇنىڭ بۇنداق قىلىشقا ئېھتىياجى بارلىقى ئوتتۇرىغا چىقتى» دېدى.
ئۇ سۆزىنى داۋاملاشتۇرۇپ: «بۇ سۆزلەرنى ئاڭلىغان ھەر بىر كىشى، بۇ ئىشلارنىڭ ئارقىسىدا باشقىچە بىر ھەقىقەتنىڭ يوشۇرۇنغانلىقىنى چۈشىنىپ يەتتى. ئۇلار ھېچ ئىش قىلالمىدى، شۇڭا ھەقىقەتنى يوشۇرۇش ئۈچۈن مۇبالىغىگە يۈزلەندى» دېدى.
بۇنىڭدىن ئىلگىرى ترامپ «فوكس خەۋەرلىرى» قانىلىنىڭ زىيارىتىنى قوبۇل قىلغاندا: «بىز ھۇجۇم قىلدۇق. ئۇلارنىڭ يادرو ئىقتىدارىنى ۋەيران قىلدۇق ۋە ھۇجۇمنى توختاتتۇق. بۇ ئاجايىپ بىر ئىش بولدى. ئۇلار بۇنىڭدىن كۆپ ئىلگىرىلىسە بولمايتتى... بۇ ناھايىتى جىددىي ئۆتكەن 12 كۈن بولدى — ئىنتايىن، ئىنتايىن جىددىي كۈنلەر ئىدى» دېگەن.
13-ئىيۇن ئىسرائىلىيەنىڭ ئىراننىڭ ھەربىي، يادرو ۋە پۇقرالار ئەسلىھەلىرىگە ھاۋا ھۇجۇمى قوزغىشى بىلەن ئىككى دۆلەت ئوتتۇرىسىدا توقۇنۇش پارتلىغانىدى. ئىران سەھىيە مىنىستىرلىقىنىڭ ئاشكارىلىشىچە، بۇ ھۇجۇملاردا كەم دېگەندە 606 ئادەم قازا قىلىپ، 5332 ئادەم يارىلانغان.
بۇنىڭغا جاۋابەن تېھران ئىسرائىلىيەگە باشقۇرۇلىدىغان بومبا ۋە ئۇچقۇچىسىز ھاۋا ئاپپاراتلىرى بىلەن ھۇجۇم قىلغان. ئىبرانىي ئۇنىۋېرسىتېتىنىڭ سانلىق مەلۇماتىغا ئاساسلانغاندا، بۇ ھۇجۇملاردا كەم دېگەندە 29 ئادەم ھاياتىدىن ئايرىلغان ۋە 3400 دىن ئارتۇق ئادەم يارىلانغان.
ئامېرىكا توقۇنۇش كەسكىنلەشكەن مەزگىلدە ئىراننىڭ فوردوۋ، ناتانز ۋە ئىسفاھاندىكى يادرو ئەسلىھەلىرىنى بومباردىمان قىلغان.
بۇ توقۇنۇش 24-ئىيۇن كۈچكە ئىگە بولغان ۋە ئامېرىكا تەرىپىدىن قوللانغان ئۇرۇش توختىتىش كېلىشىمى بىلەن ئاخىرلاشقانىدى.
