تۈركىيە ۋە ئامېرىكا ئەمەلدارلىرى سۆھبەتنىڭ ئۈنۈملۈك بولغانلىقىنى ھەمدە ۋاشىنگتوندىكى ئۇچرىشىشتا دىيالوگ ۋە ماسلىشىشنىڭ مۇھىملىقىنى تەكىتلىدى.

تۈركىيەنىڭ ئامېرىكا قوشما ئىشتاتلىرىدا تۇرۇشلۇق ئەلچىسى سەدات ئۆنال چارشەنبە كۈنى ۋاشىنگتوندا سېناتور ئېلىسا سلوتكىن بىلەن كۆرۈشتى؛ ھەر ئىككى تەرەپ سۆھبەتكە «ئۈنۈملۈك» دەپ باھا بەردى.

تۈركىيە ئەلچىخانىسى ئىجتىمائىي تاراتقۇ سۇپىسى X تىكى ھېسابىدا ئۇچۇر ھەمبەھرىلەپ: «سۆھبەتتە تۈركىيە بىلەن ئامېرىكا ئوتتۇرىسىدىكى ھەر ئىككى تەرەپ ئورتاق قىزىقىدىغان مەسىلىلەر، ئىككى تەرەپلىك ھەمكارلىق ھەمدە رايون خاراكتېرلىك ۋە خەلقئارالىق نۆۋەتتىكى تەرەققىياتلار مۇزاكىرە قىلىندى.» دېگەنلەرنى قەيت قىلدى.

ئەلچىخانىنىڭ بىلدۈرۈشىچە، ئۆنال بىلەن سلوتكىن ئىككى دۆلەت ئوتتۇرىسىدىكى دىيالوگ ۋە ماسلىشىشنى داۋاملاشتۇرۇشنىڭ مۇھىملىقىنىمۇ تەكىتلىگەن. يېپىق شەكىلدە ئۆتكۈزۈلگەن بۇ ئۇچرىشىش ھەققىدە باشقا تەپسىلاتلار ئاشكارىلانمىدى.

F-35 پىلانى

يېقىنقى مەزگىلدە جۇمھۇر رەئىس ئەردوغان تۈركىيەنىڭ ئامېرىكا باشچىلىقىدىكى F-35 ئۇرۇش ئايروپىلانى پىروگراممىسىغا قايتىدىن قوبۇل قىلىنىشى ھەققىدىكى چاقىرىقىنى يەنە بىر قېتىم تەكرارلىدى؛ ئۇ بۇ قەدەمنىڭ ۋاشىنگتون بىلەن بولغان مۇناسىۋەتنى كۈچەيتىدىغانلىقىنى ۋە شىمالىي ئاتلانتىك ئەھدى تەشكىلاتى — ناتونىڭ بىخەتەرلىك رامكىسىنى قوللايدىغانلىقىنى ئىلگىرى سۈردى.

ئەردوغان بىلۇمبېرگ (Bloomberg) غا بەرگەن يازما باياناتىدا، تۈركىيەنىڭ پىروگراممىدىن چىقىرىۋېتىلىشىنى «ئادالەتسىزلىك» دەپ سۈپەتلىدى ۋە دونالد ترامپنىڭ قايتىدىن ئامېرىكا پىرېزىدېنتى بولۇپ سايلىنىشىنىڭ مۇناسىۋەتلەرنى «تېخىمۇ ئەقىلگە مۇۋاپىق ۋە قۇرۇلمىلىق ئاساستا» قايتىدىن تىكلەش پۇرسىتى يارىتىدىغانلىقىنى ئېيتتى.

ئۇ يەنە تۈركىيەنىڭ F-35 ئايروپىلانلىرىغا ئېرىشىشىنىڭ «مۇھىم ۋە زۆرۈر» ئىكەنلىكىنى تىلغا ئېلىپ، F-16 سېتىپ بېرىشكە ئالاقىدار سۆھبەتلەرنىڭ، ئۇزۇن يىللاردىن بۇيان داۋاملىشىۋاتقان خەلق بانكىسى (Halkbank) دېلوسىنىڭ ۋە ئامېرىكانىڭ تۈركىيەنى سۇيۇقلاندۇرۇلغان تەبىئىي گاز (LNG) بىلەن تەمىنلىشىنى كۆپەيتىشى توغرىسىدىكى سۆھبەتلەرنىڭمۇ داۋاملىشىۋاتقانلىقىنى سۆزلىرىگە ئىلاۋە قىلدى.