تۈركىيە سودا ھەيئىتى، ئىككى تەرەپلىك سودا مۇناسىۋەتلىرىنى ۋە بولۇپمۇ ۋاشىنگتوننىڭ يېقىنقى مەزگىلدە يولغا قويغان ئۆزئارا جاۋاب قايتۇرۇش پرىنسىپىغا ئاساسلانغان سودا سىياسەتلىرىنى مۇزاكىرە قىلىش ئۈچۈن ئامېرىكادا زىيارەتتە بولدى.
تۈركىيە سودا مىنىستىرلىقى بۇ زىيارەت ھەققىدە دۈشەنبە كۈنى بايانات ئېلان قىلدى.
22 -ماي ئېلىپ بېرىلغان بۇ زىيارەت، تۈركىيە سودا مىنىستىرى ئۆمەر بولاتنىڭ ئاپرېل ئېيىدا ئامېرىكا سودا مىنىستىرى ھوۋارد لۇتنىك ۋە ئامېرىكا سودا ۋەكىلى باش ئەلچى جەمىسون گىرىر بىلەن ئۆتكۈزگەن تور يىغىنىدىن كېيىن ئېلىپ بېرىلدى.
ترامپ ئاپرېل ئېيىنىڭ بېشىدا ئىمزالىغان پىرېزىدېنتلىق پەرمانى ئارقىلىق، دۇنيادىكى بارلىق دۆلەتلەرگە ئۆزئارا جاۋاب قايتۇرۇش پىرىنسىپىغا ئاساسەن تاموژنا بېجى يۈرگۈزدى. پەرمانغا ئاساسەن، بارلىق دۆلەتلەرگە كەم دېگەندە %10 لىك ئاساسىي تاموژنا بېجى يۈرگۈزۈلىدىغان بولۇپ، كانادا، مېكسىكا، خىتاي ۋە ياۋروپا ئىتتىپاقىغا ئەزا دۆلەتلەرگە ئوخشاش بەزى دۆلەتلەر بولسا تېخىمۇ يۇقىرى نىسبەتتە باج تۆلەيدىغان دۆلەتلەر كاتېگورىيەسىگە كىرگۈزۈلدى.
تۈركىيەمۇ %10 لىك تاموژنا بېجىغا تارتىلىدىغان دۆلەتلەر قاتارىدىن ئورۇن ئالىدۇ.
تۈركىيە سودا مىنىستىر مۇئاۋىنى مۇرات تۇزجۇ باشچىلىقىدىكى ھەيئەت، ئامېرىكا سودا ۋەكىلىنىڭ مۇئاۋىنى بىرايانت ترىك ۋە باشقا ئەمەلدارلار بىلەن كۆرۈشۈش ئۈچۈن پايتەخت ۋاشىنگتوندا زىيارەتتە بولدى.
مىنىستىرلىق يىغىننىڭ ئامېرىكانىڭ يېقىنقى مەزگىلدىكى ئۆزئارا جاۋاب قايتۇرۇش پىرىنسىپىغا ئاساسلانغان سودا سىياسەتلىرىنىڭ دۇنياۋى تەسىرى ۋە بۇ مەزگىلدە ئىككى تەرەپلىك سودىنى ئىلگىرى سۈرۈش ئۈچۈن تاشلىنىدىغان يېڭى سىياسەت قەدەملىرىگە مەركەزلەشكەنلىكىنى بىلدۈردى.
بۇنىڭدىن باشقا، زىيارەت جەريانىدا، تۈركىيە-ئامېرىكا سودا مۇناسىۋەتلىرىدە يېقىنقى ئون يىلدا قولغا كەلتۈرۈلگەن تەرەققىيات سۈرئىتىنى داۋاملاشتۇرۇش ۋە 100 مىليارد دوللارلىق ئىككى تەرەپ سودا ھەجىمى نىشانىغا يېتىش ئۈچۈن تاشلىنىدىغان قوشۇمچە قەدەملەرنىڭ مۇزاكىرە قىلىنغانلىقى تەكىتلەندى.
دونالد ترامپنىڭ 2019-يىللىق ۋەزىپە ئۆتەش مەزگىلىدە، تۈركىيە جۇمھۇر رەئىسى رەجەپ تاييىپ ئەردوغان بىلەن ترامپ، ئىككى تەرەپلىك سودا ھەجىمىنى 100 مىليارد دوللارغا يەتكۈزۈشكە قوشۇلغانىدى. ئىككى دۆلەت ئوتتۇرىسىدىكى سودا ھەجىمى 2024-يىلى تەخمىنەن 32 مىليارد دوللار ئەتراپىدا ئىدى.
مىنىستىرلىق يەنە، ئىككى تەرەپنىڭ تۈركىيە بىلەن ئامېرىكا ئوتتۇرىسىدا دېگۈدەك ھەممە ساھەدە ئۆزئارا سودا ۋە مەبلەغ سېلىش پۇرسەتلىرىنىڭ بارلىقىنى، ھەمدە يېڭى تېخنولوگىيەلەر، يېڭىلىق يارىتىش، ئىشلەپچىقىرىش، سۈنئىي ئەقىل ۋە تور بىخەتەرلىكى قاتارلىق ساھەلەردە زور يوشۇرۇن كۈچنىڭ بارلىقىنى مۇئەييەنلەشتۈرگەنلىكىنى بىلدۈردى.
باياناتتا: «دۆلەت مۇداپىئەسى ۋە ئېنېرگىيە ساھەلىرى، ھەمكارلىقنىڭ تېز تەرەققىي قىلىۋاتقان باشقا مۇھىم ساھەلىرىدۇر» دېگەن ئۇچۇرلارغا ئورۇن بېرىلدى.
