ئۇكرائىنانىڭ شەرقىي شىمالىدىكى خاركىۋ رايونىنىڭ ۋالىيسى ئولېگ سىنېگۇبوۋ، رۇسىيەنىڭ رايوندا ئېلىپ بارغان ھۇجۇملىرىدا تۆت كىشىنىڭ ھاياتىدىن ئايرىلغانلىقىنى ۋە 10 كىشىنىڭ يارىلانغانلىقىنى ئۇقتۇردى.

ئولېگ سىنېگۇبوۋ سەيشەنبە كۈنى ئاممىۋى ئورتاقلىشىش تاراتقۇسى تېلېگرام (Telegram) سەھىپىسىدە ئېلان قىلغان باياناتىدا: «دۈشمەن چۇگۇيىۋ شەھىرىنى ئوققا تۇتتى»، دېدى ۋە 22 ياشلىق بىر ئايالنى ئۆز ئىچىگە ئالغان تۆت كىشىنىڭ ھاياتىدىن ئايرىلغانلىقىنى بىلدۈردى.

سىنېگۇبوۋ يەنە: «ئوت ئاپىتىنى كەلتۈرۈپ چىقارغان ھۇجۇملار كەم دېگەندە 18 ئاپتوموبىلغا زىيان يەتكۈزدى؛ كۆپ قەۋەتلىك بىنالارنىڭ دېرىزىلىرى چېقىلىپ، بىنالارنىڭ ئالدى تەرىپى زىيانغا ئۇچرىدى» دېدى.

خاركىۋ شەھەر باشلىقى ئىگور تېرېخوۋ بولسا 10 كىشىنىڭ يارىلانغانلىقىنى خەۋەر قىلدى.

رۇسىيەنىڭ ئۇكرائىنادىكى ھۇجۇملىرى يېقىنقى ئايلاردا تېخىمۇ كۈچەيدى. ئۇكرائىنا بۇ ھۇجۇملارغا جاۋابەن، رۇسىيە تېرروتېرىيەسىنىڭ ئىچكى قىسىملىرىغا ئۇچقۇچىسىز ھاۋا ئاپپاراتلىرى بىلەن ھۇجۇم قىلدى. تېرېخوۋ، ئۇكرائىنانىڭ ئۇچقۇچىسىز ھاۋا ئاپپاراتى ھۇجۇملىرىنىڭ كۆپىنچە ھەربىي ۋە ئېنېرگىيە ئەسلىھەلىرىنى نىشان قىلغانلىقىنى ئېيتتى.

 تىنچلىق تىرىشچانلىقلىرى

ھۇجۇملار ئۇكرائىنا پىرېزىدېنتى ۋولودىمىر زېلېنسكىينىڭ تۆت يىلدىن بۇيان داۋاملىشىۋاتقان ئۇرۇشنى ھەل قىلىش مەسىلىسىدە ئەنگلىيە، فىرانسىيە ۋە گېرمانىيە رەھبەرلىرى بىلەن لوندوندا ئۆتكۈزگەن سۆھبەتلىرىدىن كېيىن، پايتەخت كىيېۋغا قايتىپ كەلگەن ۋاقتىدا يۈز بەردى.

ۋاشىنگتوننىڭ ئىرانغا قاراتقان ئۇرۇشقا ھەل قىلىش چارىسى تېپىشقا ئەھمىيەت بېرىشى سەۋەبىدىن، ئۇكرائىنا بىلەن رۇسىيە ئوتتۇرىسىدا ئامېرىكا باشچىلىقىدا ئېلىپ بېرىلىۋاتقان تىنچلىق تىرىشچانلىقلىرى قىسمەن توختاپ قالدى.

زېلېنسكىي دۈشەنبە كۈنى، ئامېرىكا ئەلچىلىرى ستىۋ ۋىتكوف ۋە جارېد كۇشنېر بىلەن «ئىجابىي» سۆھبەت ئۆتكۈزگەنلىكىنى ھەمدە ئالدىمىزدىكى ھەپتىلەردە ئۇكرائىنا ئۇرۇشىنى ھەل قىلىش ئۈچۈن خىزمەت ئىشلەشكە تەييار ئىكەنلىكىنى ئېيتقان ئىدى.

بىرلەشكەن دۆلەتلەر تەشكىلاتىنىڭ ئاپرېل ئېيىدا ئېلان قىلغان مۆلچەرىگە قارىغاندا، 2022-يىلىدىن بۇيان ئۇكرائىنانىڭ تۈرلۈك رايونلىرىدا كەم دېگەندە 15 مىڭ 850 پۇقرا ھاياتىدىن ئايرىلغان.

بىرلەشكەن دۆلەتلەر تەشكىلاتىنىڭ سانلىق مەلۇماتلىرىغا ئاساسلانغاندا، رۇسىيەنىڭ كونتروللۇقىدىكى رايونلاردا 2800 دىن ئارتۇق پۇقرا ھاياتىدىن ئايرىلغان، ئۇكرائىنا ۋە رۇسىيە ئىشغالىيىتى ئاستىدىكى رايونلاردا 44 مىڭ 800 دىن ئارتۇق كىشى يارىلانغان.