20 دۆلەت گۇرۇھى باشلىقلار يىغىنى جەنۇبىي ئافرىقانىڭ يوھاننېسبۇرگ شەھىرىدە باشلاندى؛ جەنۇبىي ئافرىقا پىرېزىدېنتى سىرىل رامافوسا (Cyril Ramaphosa) ئىككى كۈنلۈك يىغىن ئۈچۈن يىغىلغان ۋەكىللەرگە قارىتا تۇنجى نۇتقىنى سۆزلىدى.
جەنۇبىي ئافرىقانىڭ «ھەمكارلىق، باراۋەرلىك ۋە سىجىللىق» تېمىسىغا ئاساسەن، پرېتورىيەنىڭ رەئىسلىكىدە ئافرىقا قىتئەسىدە تۇنجى قېتىم ئۆتكۈزۈلۈۋاتقان 20 دۆلەت گۇرۇھى باشلىقلار يىغىنىنىڭ، تۆۋەن كىرىملىك دۆلەتلەرنىڭ قەرزىنى يېنىكلىتىشكە مەركەزلىشىشى كۈتۈلمەكتە؛ بۇ (قەرز مەسىلىسى)، تەرەققىي قىلىۋاتقان دۇنيا مىقياسىدا سىغدۇرۇشچان ئىقتىسادىي ئېشىشنىڭ (بارلىق قاتلاملارنى ئۆز ئىچىگە ئالغان تەرەققىياتنىڭ) ئالدىدىكى مۇھىم توسالغۇلاردىن بىرى دەپ قارالماقتا.
رەھبەرلەر يىغىندا يەنە كىلىماتقا ماسلىشىش ۋە پاكىزە ئېنېرگىيەگە ئۆتۈش قاتارلىق باشقا مۇھىم مەسىلىلەرنىمۇ مۇزاكىرە قىلىدۇ.
كۈنتەرتىپتە ئىچكى ھەمكارلىق ۋە بۇ گەۋدىنىڭ ئىستراتېگىيەلىك يۆنىلىشىگە ئائىت مۇنازىرىلەر ئورۇن ئالغان بولۇپ، رەھبەرلەر ئىككى كۈنلۈك يىغىن جەريانىدا بىر قاتار ئىككى تەرەپلىك سۆھبەتلەرنىمۇ ئېلىپ بارىدۇ.
مۇناسىۋەتلىك ئۇچۇرلارTRT World - Türkiye's Erdogan, other world leaders arrive in Johannesburg to attend G20 summit
ئامېرىكا G20 غا قاتناشمىدى
تەۋسىيە
جەنۇبىي ئافرىقا تاشقى ئىشلار مىنىستىرى رونالد لامولا دۆلىتىدە ئۆتكۈزۈلىدىغان تارىخىي G20 باشلىقلار يىغىنىغا 42 دۆلەتنىڭ قاتنىشىشىنىڭ كۈتۈلۈۋاتقانلىقىنى ئېيتتى.
G20 نىڭ قۇرغۇچى ئەزالىرىدىن بولغان ئامېرىكا بۇ يىللىق باشلىقلار يىغىنىنى بايقۇت قىلدى.
مۇشۇ ئاينىڭ بېشىدا ئامېرىكا پىرېزىدېنتى دونالد ترامپ جەنۇبىي ئافرىقانى ئاق تەنلىكلەر ئاھالىسىگە قارىتا «كىشىلىك ھوقۇق دەپسەندىچىلىكى قىلىش» بىلەن ئەيىبلەپ، يوھاننېسبۇرگقا ئامېرىكالىق ئەمەلدار ئەۋەتمەيدىغانلىقىنى ئېلان قىلغان ئىدى.
جەنۇبىي ئافرىقا ھۆكۈمىتى بولسا بۇ دەۋالارنى قايتا-قايتا ئاساسسىز دەپ رەت قىلدى.
بۇ يىل ۋاشىنگتون بىلەن پرېتورىيە ئوتتۇرىسىدىكى مۇناسىۋەتلەر، ھەم تاشقى سىياسەت ھەمدە ئىچكى سىياسەت مەسىلىلىرىدىكى پىكىر ئىختىلاپلىرى سەۋەبىدىن ئەڭ تۆۋەن سەۋىيەگە چۈشۈپ قالدى.
1999-يىلى قۇرۇلغان 20 دۆلەت گۇرۇھى 19 دۆلەت بىلەن ئىككى رايونلۇق تەشكىلات — ياۋروپا ئىتتىپاقى ۋە ئافرىقا ئىتتىپاقىدىن تەركىب تاپىدۇ.
مۇناسىۋەتلىك ئۇچۇرلارTRT World - Guterres urges G20 to push for Sudan ceasefire, stop arms flow
