رۇسىيە دۆلەت مۇداپىئە مىنىستىرلىقى ئۇكرائىنانىڭ ئودېسسا پورتىدىكى يېقىلغۇ ئامبارلىرى بىلەن ھەربىي يۈك توشۇيدىغان بىر يۈك پاراخوتىنىڭ ئوققا تۇتۇلغانلىقىنى خەۋەر قىلدى.
مىنىستىرلىق تەرىپىدىن ئېلان قىلىنغان باياناتتا، رۇسىيە قوراللىق كۈچلىرىنىڭ تۈنۈگۈن كەچتە ئۇكرائىنانىڭ پورت ئۇل ئەسلىھەلىرى بىلەن ئۇكرائىنا ئارمىيەسىنىڭ ئېھتىياجى ئۈچۈن ئىشلىتىلىۋاتقان دېڭىز ۋاسىتىلىرىغا قارىتىلغان ھۇجۇملىرىنى داۋاملاشتۇرغانلىقى بىلدۈرۈلدى.
ھۇجۇملاردا ھاۋادىن قويۇپ بېرىلىدىغان يۇقىرى ئېنىقلىقتىكى قوراللار ۋە ئۇچقۇچىسىز ھاۋا ئاپپاراتلىرىنىڭ ئىشلىتىلگەنلىكى، ئودېسسا پورتىدا ئۇكرائىنا ئارمىيەسى ئىشلىتىشنى پىلانلىغان يېقىلغۇ ئامبارلىرىنىڭ ئوققا تۇتۇلغانلىقى بايان قىلىندى.
بۇنىڭدىن باشقا، ئودېسسانىڭ جەنۇبىدا، ئۇكرائىنادىكى پورتلارنىڭ بىرىگە ھەربىي يۈك توشۇۋاتقانلىقى بىلدۈرۈلگەن يۈك پاراخوتىنىڭمۇ نىشانغا ئېلىنغانلىقى ئۇقتۇرۇلدى.
مىنىستىرلىق تەرىپىدىن ئېلان قىلىنغان يەنە بىر باياناتتا، كېچىچە ئۇكرائىناغا تەۋە ئايروپىلان تىپىدىكى 371 ئۇچقۇچىسىز ھاۋا ئاپپاراتىنىڭ ھاۋا مۇداپىئە كۈچلىرى تەرىپىدىن توسۇپ قېلىنىپ، بىر تەرەپ قىلىنغانلىقى بىلدۈرۈلدى.
ئۇچقۇچىسىز ھاۋا ئاپپاراتلىرىنىڭ بېلگورود، بىرىيانسك، ۋورونېژ، ۋولگوگراد، كۇرسك، روستوۋ، تۇلا، كراسنودار رايونلىرى، داغىستان، تاتارسىتان جۇمھۇرىيەتلىرى بىلەن قىرىم يېرىم ئارىلى، ئازوۋ ۋە قارادېڭىز تەۋەلىكىدە بىر تەرەپ قىلىنغانلىقى ئىپادىلەندى.
