كۇبانىڭ ۋاشىنگتوندىكى ئەڭ يۇقىرى دەرىجىلىك دىپلوماتى باش ئەلچى ليانىس توررېس رىۋېرا كۇبالىقلارنىڭ ئامېرىكانىڭ ھەرقانداق يوشۇرۇن ھەربىي ھەرىكىتىگە قارشى ئۆزلىرىنى قوغدايدىغانلىقىنى ئېيتتى.
ئۇ جۈمە (2026-يىلى 15-ماي) كۈنى ئېلان قىلىنغان «The Hill» خەۋەر تور بېكىتىنىڭ زىيارىتىنى قوبۇل قىلغاندا: «بىز ئۆزىمىزنى قوغداشقا تەييارلىق قىلىۋاتىمىز» دېدى.
ئۇ يەنە: «بىزنىڭ تەييارلىق قىلىش ئۇسۇلىمىز ھۇجۇم خاراكتېرلىك ئەمەس. بىز ئامېرىكا زېمىنىغا ياكى ئامېرىكا خەلقىگە قارىتا بىرىنچى بولۇپ ھەرىكەت قوللىنىشقا تەييارلىق قىلىۋاتقىنىمىز يوق. بىز ئۇنداق قىلىشنى خالىمايمىز» دېدى.
توررېس رىۋېرا ھەرقانداق ھەربىي ھەرىكەتنىڭ «قانلىق پاجىئە» بولۇشى مۇمكىنلىكىنى ئاگاھلاندۇرۇپ، كۇبانىڭ «كۇبالىقلارنىڭ كۇبادا ئۆلۈشىنى» ياكى «بىرەر ئامېرىكا ئەسكىرىنىڭ ئۆلۈشىنى» خالىمايدىغانلىقىنى ئەسكەرتتى.
ئۇ بۇ سۆزلىرىنى كۇبا ئامېرىكانىڭ قامال قىلىشى ئاستىدا ئېغىر يېقىلغۇ يېتىشمەسلىك ۋە ئۇزۇن مۇددەتلىك توك توختاپ قېلىش مەسىلىسىگە دۇچ كېلىۋاتقان بىر پەيتتە ئېيتتى.
ئۇ كۇبانىڭ «ئىگىلىك ھوقۇقى، مۇستەقىللىقى ۋە ئۆز تەقدىرىنى ئۆزى بەلگىلەش ھوقۇقى» ئۈستىدە سۆھبەتلىشىشكە بولمايدىغانلىقىنى يەنە بىر قېتىم تەكىتلىدى، شۇنىڭ بىلەن بىرگە، ھاۋانانىڭ ئامېرىكا ئۈچۈن تەھدىت ئەمەسلىكىدە چىڭ تۇردى.
ئۇ: «بىز پەقەت ئۆز كېلەچىكىمىزنى كۇبالىقلار خالىغان ئۇسۇلدا بەلگىلەش ئۈچۈن ئۆز ھالىمىزغا قويۇپ بېرىلىشنىلا خالايدىغان كىچىك بىر ئارال دۆلىتىمىز» دېدى.
مۇناسىۋەتلىك ئۇچۇرلارTRT World - Cuba mulls US offer of $100M in aid as CIA boss visits Havana
