ھىندونېزىيەنىڭ جاۋا ئارىلىدا يانار تاغ پارتلىدى

ھىندونېزىيە تەبىئىي ئاپەتلەرگە تاقابىل تۇرۇش ئىدارىسى ئەمەلدارى يانار تاغ پارتلىغاندىن كېيىن 900 گە يېقىن ئادەمنىڭ مەكتەپلەر، مەسچىتلەر ۋە كەنت جامائەت زاللىرىغا ئورۇنلاشقانلىقىنى بىلدۈردى.

ھىندونېزىيەنىڭ چوڭ ئارىلى بولغان جاۋادىكى يانار تاغ پارتلىغاندىن كېيىن، يۈزلىگەن ھىندونېزىيەلىكلەرنىڭ ۋاقىتلىق پاناھجايلارغا ئورۇنلاشقانلىقى بىلدۈرۈلدى. مەسئۇل ئەمەلدارلار يانار تاغ ئېتەكلىرىدىن تەخمىنەن 190 ئادەمنى تارقاقلاشتۇردى.

شەرقىي جاۋادىكى سەمېرۇ (Semeru) يانار تېغى چارشەنبە (18-نويابىر) كۈنى چۈشتىن كېيىن پارتلاپ، 13 كىلومېتىردىن يىراقلىققا كۈل ۋە گاز پۈركۈدى ھەمدە ئاگاھلاندۇرۇش دەرىجىسىنىڭ ئەڭ يۇقىرى سەۋىيەگە كۆتۈرۈلۈشكە سەۋەب بولدى.

ھىندونېزىيە گېئولوگىيە ئىدارىسىنىڭ بىلدۈرۈشىچە، پەيشەنبە (19-نويابىر) كۈنى يانار تاغ ھەرىكىتى ئاساسلىقى پەسەيگەن بولسىمۇ، لېكىن تېخىچە تۇراقسىز ھالەتتە تۇرماقتا ئىكەن.

تەبىئىي ئاپەتكە تاقابىل تۇرۇش ئىدارىسىنىڭ ئەمەلدارى سۇلتان شافائەت  (Sultan Syafaat)نىڭ ئېيتىشىچە، پارتلاشتىن كېيىن 900 گە يېقىن ئادەم مەكتەپلەر، مەسچىتلەر ۋە كەنت جامائەت زاللىرىغا قۇرۇلغان پاناھجايلارغا ئورۇنلاشقان.

ئۇ: «ئۇلار كېچىسى (پاناھجايلاردا) تۇرىدۇ، بەلكىم ئۇلار تېخىچە ۋەھىمە ئىچىدە بولسا كېرەك» دېدى.

سەمېرۇ دۆلەت باغچىسىنىڭ باشلىقى رۇدىيانتو چاھجا نۇگراھا  (Rudijanto Tjahja Nugraha)دائىرىلەرنىڭ پەيشەنبە كۈنى يەنە يانارتاغ ئېتەكلىرىدىن 190 گە يېقىن ئادەمنى تارقاقلاشتۇرغانلىقىنى، ئۇلارنىڭ كۆپىنچىسىنىڭ پارتلاشتىن كېيىن لاگېردا قېپقالغان تاغقا چىققۇچىلار ئىكەنلىكىنى بىلدۈردى.

-2021يىلى سەمېرۇ يانار تېغى پارتلىغاندا، 50 دىن ئارتۇق ئادەم ئۆلگەن ۋە 5 مىڭدىن ئارتۇق ئۆي ۋەيران بولغان، 10 مىڭغا يېقىن ئادەم پاناھلىق ئىزدەشكە مەجبۇر بولغان ئىدى.

ھىندونېزىيە يانار تاغ ۋە كۈچلۈك يەر تەۋرەش ھەرىكەتلىرى كۆپ يۈز بېرىدىغان تىنچ ئوكيان «ئوت چەمبىرىكى» ئۈستىگە جايلاشقان بولۇپ، شەرقىي جەنۇبىي ئاسىيا تاقىم ئاراللىرى دۆلىتىدە 130 غا يېقىن ھەرىكەت ھالىتىدىكى يانار تاغ بار.