جەنۇبىي كورېيە پيوڭياڭ بىلەن موسكۋا ئوتتۇرىسىدىكى ھەربىي ھەمكارلىقنى يېقىندىن كۆزىتىۋاتقانلىقىنى جاكارلىدى،

يونخاپ ئاگېنتلىقىنىڭ خەۋىرىگە قارىغاندا، جەنۇبىي كورېيە تاشقى ئىشلار مىنىستىرلىقى تەرىپىدىن ئېلان قىلىنغان باياناتتا مۇنداق دېيىلگەن: «شىمالىي كورېيە بىلەن رۇسىيە ئوتتۇرىسىدىكى ھەربىي ھەمكارلىققا مۇناسىۋەتلىك ئۆزگىرىشلەر يېقىندىن كۆزىتىلمەكتە. بىرلەشكەن دۆلەتلەر تەشكىلاتى خەۋپسىزلىك كېڭىشىنىڭ قارارلىرىغا خىلاپ بولغان شىمالىي كورېيە-رۇسىيە ھەربىي ھەمكارلىقىنى دەرھال ئاخىرلاشتۇرۇش توغرىسىدا يەنە بىر قېتىم چاقىرىقتا بولىمىز.»

ھۆكۈمەت مەنبەلىرى بولسا، ھازىرغىچە شىمالىي كورېيەدىن قوشۇمچە ئەسكەر ئەۋەتىلگەنلىكىنى دەلىللەيدىغان ھېچقانداق ئالامەتنىڭ بايقالمىغانلىقىنى بىلدۈردى.

ئۇكرائىنا پىرېزىدېنتى ۋولودىمىر زېلېنسكىي 25-ئىيۇل ئېلان قىلغان باياناتىدا، شىمالىي كورېيەنىڭ رۇسىيەگە قوشۇمچە 30 مىڭ ئەسكەر ئەۋەتمەكچى بولغانلىقىنى، شۇنداقلا باللىستىك باشقۇرۇلىدىغان بومبا قويۇپ بېرىش سۇپىلىرىنىمۇ ئەۋەتىشكە تەييارلىق قىلىۋاتقانلىقىنى ئىلگىرى سۈرگەن ئىدى.

سېئۇل ھۆكۈمىتى، شىمالىي كورېيەنىڭ ھازىرغىچە رۇسىيەنى قوللاش مەقسىتىدە تەخمىنەن 20 مىڭ ئەسكەر ۋە ھەربىي ئىنژېنېر ئەۋەتكەنلىكىنى، بۇلارنىڭ ئىچىدە تەخمىنەن 14 مىڭىنىڭ ئالدىنقى سەپتە ۋەزىپە ئۆتەۋاتقانلىقىنى تەخمىن قىلماقتا.

يەنە بىر تەرەپتىن، شىمالىي كورېيە تاشقى ئىشلار مىنىستىرى چو سۆن خۇينىڭ 20-19-ئىيۇل كۈنلىرى موسكۋادا رۇسىيە پىرېزىدېنتى ۋلادىمىر پۇتىن ۋە تاشقى ئىشلار مىنىستىرى سېرگېي لاۋروۋ بىلەن كۆرۈشۈشى، ئىككى دۆلەت ئوتتۇرىسىدىكى ھەربىي ھەمكارلىقنىڭ تېخىمۇ كۈچىيىشى مۇمكىنلىكىگە بولغان قاراشلارنى كۈچەيتكەن ئىدى.