ئۇكرائىنا چېگراسىغا يېقىن شەبېكىنو يېزىسىدىكى بىر ئاپتوبۇسقا قىلىنغان ھۇجۇمدا 19 كىشى يارىلاندى.
ئۇكرائىناغا تەۋە ئۇچقۇچىسىز ھاۋا ئاپپاراتلىرى بىلەن ئېلىپ بېرىلغان ھۇجۇملار رۇسىيەنىڭ چېگرا رايونى بېلگورودتا ئۈچ كىشىنىڭ ئۆلۈمىگە ۋە بىر ئاپتوبۇسقا قىلىنغان ھۇجۇمدا 19 كىشىنىڭ يارىلىنىشىغا سەۋەب بولدى. رۇسىيە تاشقى ئىشلار مىنىستىرلىقى ھۇجۇملارنى قاتتىق ئەيىبلىدى.
رايونلۇق دائىرىلەر سەيشەنبە كۈنى چېگراغا يېقىن كەنتتىكى بىر خىزمەت ئورنىغا قىلىنغان ئۇچقۇچىسىز ھاۋا ئاپپاراتى ھۇجۇمىدا ئىككى كىشىنىڭ ئۆلگەنلىكىنى بىلدۈردى.
رايوننىڭ مەركىزىي شەھىرى بولغان بېلگورودنىڭ سىرتىدىكى بىر يېزىغا قىلىنغان ھۇجۇمدا يەنە بىر كىشى ھاياتىدىن ئايرىلدى.
ئۇكرائىنا چېگراسىغا يېقىن شەبېكىنو يېزىسىدا بىر ئاپتوبۇسقا ئوق چىقىرىلغان بولۇپ، يارىلانغانلارنىڭ بىرىدىن باشقىسىنىڭ ھەممىسى داۋالىنىش ئۈچۈن دوختۇرخانىغا ئەۋەتىلدى.
موسكۋا ئۇكرائىنانى رۇسىيەنىڭ ئوخشىمىغان رايونلىرىدا ئاپتوبۇسلارغا سىستېمىلىق ھۇجۇم قىلىش بىلەن ئەيىبلىدى.
«تەلۋىلەرچە پوزىتسىيە»
رۇسىيە تاشقى ئىشلار مىنىستىرلىقى باياناتچىسى مارىيا زاخاروۋا، ئەڭ ئاخىرقى ھۇجۇمنىڭ ئۇكرائىنانىڭ ئاممىۋى قاتناش ۋاسىتىلىرىغا قارىتا «تەلۋىلەرچە پوزىتسىيە بىلەن، ئالدىنقى سەپتە بارغانسېرى كۆپىيىۋاتقان مەغلۇبىيەتلىرىنىڭ ئىنتىقامىنى ئادەتتىكى كىشىلەردىن ئېلىش» مەقسىتىدە ھۇجۇملارنى تەشكىللەۋاتقانلىقىنى كۆرسىتىپ بېرىدىغانلىقىنى ئىپادىلىدى.
رۇسىيە دائىرىلىرى، رۇسىيەنىڭ كونتروللۇقىدىكى ئۇكرائىنانىڭ شەرقىدىكى دونېتسك رايونىدا سەيشەنبە كۈنى بىر ئاپتوبۇسقا قىلىنغانلىقى ئىلگىرى سۈرۈلگەن ئۇكرائىنا ئۇچقۇچىسىز ھاۋا ئاپپاراتى ھۇجۇمىدا بەش كىشىنىڭ يارىلانغانلىقىنى بىلدۈرۈش بىلەن بىرگە، ئالدىنقى ئايدا بىر ئايالنىڭ ھاياتىدىن ئايرىلىشى ۋە ئالتە بالىنىڭ يارىلىنىشىغا سەۋەب بولغان، بېلارۇسىيەلىك بالىلارنى بىر دەم ئېلىش ئورنىغا ئېلىپ مېڭىۋاتقان ئاپتوبۇسقا قىلىنغان ھۇجۇم ئۈچۈن ئۇكرائىنانى ئەيىبلىدى.
ئۇكرائىنا ئارمىيەسى بولسا ئەيىبلەشنى ئاساسسىز دەپ رەت قىلدى.
