پاكىستان پەيشەنبە كۈنى لىۋانغا قارىتىلغان ئىسرائىلىيە ھاۋا ھۇجۇملىرىنى قاتتىق ئەيىبلەپ، بۇ ھۇجۇملارنى خەلقئارا قانۇننىڭ ۋە تۈپ ئىنسانىي پىرىنسىپلارنىڭ ئوچۇق-ئاشكارا دەپسەندە قىلىنىشى، دەپ باھالىدى. پاكىستان تاشقى ئىشلار مىنىستىرلىقى تەرىپىدىن ئېلان قىلىنغان باياناتتا، لىۋانغا قارىتىلغان ۋە پۇقرالارنىڭ تالاپەتكە ئۇچرىشىغا، ئۇل ئەسلىھەلەرنىڭ كەڭ كۆلەملىك ۋەيران قىلىنىشىغا سەۋەب بولغان ئىسرائىلىيە «تاجاۋۇزچىلىقى» ئەڭ كۈچلۈك ئىبارىلەر بىلەن ئەيىبلەندى.
پاكىستان ھۆكۈمىتى خەلقئارا جەمئىيەتنى مەزكۇر تاجاۋۇزچىلىققا خاتىمە بېرىش ئۈچۈن جىددىي ۋە ئەمەلىي قەدەملەرنى تاشلاشقا چاقىرىش بىلەن بىرگە، لىۋان ھۆكۈمىتى ۋە خەلقى بىلەن بولغان «تەۋرەنمەس» ھەمكارلىقىنى يەنە بىر بار نامايان قىلدى. باياناتتا پاكىستاننىڭ بۇنداق قىيىن دەقىقىلەردە لىۋاننىڭ يېنىدا ئىكەنلىكى، دۆلەتنىڭ ئىگىلىك ھوقۇق، زېمىن پۈتۈنلۈكى، تىنچلىقى ۋە مۇقىملىقىنى تولۇق قوللايدىغانلىقى تەكىتلەندى.
ئىسرائىلىيەنىڭ مەزكۇر ھۇجۇملىرى دەل ئىران بىلەن ئامېرىكا قوشما ئىشتاتلىرىنىڭ ئۇرۇش توختىتىش قارارىدىن كېيىن يۈز بەردى. ئىككى تەرەپ سەيشەنبە كۈنى (28-فېۋرال) ئامېرىكا قوشما ئىشتاتلىرى ۋە ئىسرائىلىيە تەرىپىدىن ئىرانغا قارشى باشلىنىپ، رايوندا مىڭلارچە كىشىنىڭ ئۆلۈمى ۋە يارىلىنىشىنى كەلتۈرۈپ چىقارغان ئۇرۇشنى ئاخىرلاشتۇرۇش مەقسىتىدە، ئاخىرقى كېلىشىمگە يول ئېچىشنى نىشان قىلغان ئىككى ھەپتىلىك ئۇرۇش توختىتىشنى جاكارلىغانىدى.
بۇ قارار ئامېرىكا پىرېزىدېنتى دونالد ترامپنىڭ ئىرانغا ھورمۇز بوغۇزىنى قايتىدىن ئېچىشى ۋە كېلىشىمنى قوبۇل قىلىشى ئۈچۈن بەلگىلىگەن مۆھلىتى توشۇشقا ئىككى سائەتتىن ئاز ۋاقىت قالغاندا ئېلان قىلىنغان بولۇپ، ترامپ ئەگەر كېلىشىم ھاسىل قىلىنمىسا «پۈتۈن بىر مەدەنىيەتنى يوقىتىۋېتىش» بىلەن تەھدىت سالغان ئىدى.
