جەنۇبىي كورېيە پىرېزىدېنتى لې جاميۇڭ دۆلىتى بىلەن شىمالىي كورېيە ئوتتۇرىسىدىكى دىيالوگدىن باشقا يەنە پيوڭياڭ بىلەن ۋاشىنگتون ئوتتۇرىسىدىكى سۆھبەتنىڭ قايتا باشلىنىشىغا پايدىلىق دىپلوماتىك شارائىتلارنى يارىتىش ئۈچۈن بارلىق تىرىشچانلىقلارنى كۆرسىتىدىغانلىقىنى بىلدۈردى.
لې جاميۇڭ بىرازىلىيە زىيارىتى دائىرىسىدە دۆلەتنىڭ يەرلىك گېزىتلىرىدىن بىرى بولغان «ئو گلوبو» (O Globo) بىلەن ئۆتكۈزگەن سۆھبىتى جەريانىدا بەرگەن باياناتىدا، كورېيە يېرىم ئارىلىدىكى تىنچلىق مۇساپىسى ھەققىدە توختالدى.
ھۆكۈمىتىنىڭ جەنۇبىي ۋە شىمالىي كورېيەنىڭ توقۇنۇشنى ئارقىدا قالدۇرۇپ، تىنچلىق ئىچىدە بىرگە ياشىيالايدىغان ۋە ئۆزئارا تەرەققىياتنى نىشان قىلالايدىغان يېڭى بىر كورېيە يېرىم ئارىلى بەرپا قىلىش مەسىلىسىدە «قەتئىي» ئىكەنلىكىنى ئەسكەرتكەن لې جاميۇڭ، سېئۇل ھۆكۈمىتىنىڭ ئامېرىكا بىلەن دىيالوگنى قايتا باشلاش ئۈچۈن خىزمەتلىرىنى داۋاملاشتۇرۇۋاتقانلىقىنى ئىپادىلىدى.
لې جاميۇڭ دىيالوگنىڭ قايتا باشلىنىشىغا قارىتىلغان تىرىشچانلىقلاردا ھازىرغىچە كۆرۈنەرلىك ئىلگىرىلەش ھاسىل قىلىشقا مۇيەسسەر بولالمىغان بولسىمۇ، ئەمما جەنۇبىي كورېيەنىڭ دىيالوگ ۋە ھەمكارلىق ئىزدەشتىن ۋاز كەچمەيدىغانلىقىنى تەكىتلىدى.
ئۇ، خەلقئارا جەمئىيەت بىلەن، بولۇپمۇ ئامېرىكا بىلەن زىچ ھەمكارلىق ئىچىدە دىيالوگنى قوللايدىغان ئىزچىل ئۇچۇرلارنى بېرىشنى داۋاملاشتۇرىدىغانلىقىنى تەكىتلەپ مۇنداق دېدى:
«كورېيەلەر ئارا دىيالوگ بىلەن شىمالىي كورېيە-ئامېرىكا سۆھبىتىنىڭ قايتا باشلىنىشىغا پايدىلىق دىپلوماتىك شارائىتلارنى يارىتىش ئۈچۈن قولىمىزدىن كېلىشىچە تىرىشچانلىق كۆرسىتىمىز.»
