ئاقساراي ۋەكىلى ستېۋ ۋىت كوف ۋە ئىران تاشقى ئىشلار مىنىستىرى ئابباس ئاراكچىنىڭ ھەر قايسى ئەرەب ۋە مۇسۇلمان دۆلەتلىرىنىڭ ۋەكىللىرى بىلەن ئىستانبۇلدا كۆرۈشۈشى كۈتۈلمەكتە.
تېھراننىڭ يادرو سۆھبەتلىرىنى قايتىدىن باشلاشنى تەلەپ قىلىشى ۋە ۋاشىنگتوننىڭ بىر كېلىشىم ھاسىل قىلىنمىسا ئاقىۋىتىنىڭ ياخشى بولمايدىغانلىقى ھەققىدە ئاگاھلاندۇرۇشىدىن كېيىن، بىر ئەرەب ئەمەلدارى AFP غا ئامېرىكا بىلەن ئىران ئوتتۇرىسىدا 6-فېۋرال كۈنى تۈركىيەدە سۆھبەت ئۆتكۈزۈلۈش ئېھتىمالى بارلىقىنى بىلدۈردى.
مەزكۇر ئەمەلدار ئىسمىنى ئاشكارىلىماسلىق شەرتى بىلەن: «ئامېرىكا سۆھبەتچىلىرى بىلەن ئىران يۇقىرى دەرىجىلىك ئەمەلدارلىرى ئوتتۇرىسىدا جۈمە كۈنى تۈركىيەدە بىر سۆھبەت ئۆتكۈزۈلۈشى مۇمكىن» دېدى.
مەزكۇر ئەمەلدار يەنە: «ئېھتىماللىق دائىرىسىدىكى بۇ ئۇچرىشىشنىڭ تۈركىيە، مىسىر، قاتار ۋە ئوماننىڭ ئارىغا چۈشۈشىدىن كېيىن ئورۇنلاشتۇرۇلغانلىقىنى» سۆزىگە ئىلاۋە قىلدى.
يەنە بىر تەرەپتىن، بىر ئامېرىكا ئەمەلدارى دۈشەنبە كۈنى، ئامېرىكا پىرېزىدېنتى دونالد ترامپنىڭ ئالاھىدە ئەلچىسى ستېۋ ۋىت كوف بىلەن ئىران تاشقى ئىشلار مىنىستىرى ئابباس ئاراكچىنىڭ جۈمە كۈنى ئىستانبۇلدا يادرو كېلىشىمى ۋە باشقا مەسىلىلەرنى مۇزاكىرە قىلىش ئۈچۈن جەم بولۇشنى پىلانلىغانلىقىنى ئىپادىلەپ: «جۇمھۇر رەئىس ئۇلارنىڭ بىر كېلىشىم تۈزۈشىنى خالايدۇ. بۇ ئۇچرىشىش ئۇلارنىڭ نېمە دەيدىغانلىقىنى ئاڭلاش ئۈچۈن» دېدى.
ئىران تاشقى ئىشلار مىنىستىرلىقىنىڭ بىر ئەمەلدارى ئىلگىرى ئېلان قىلغان باياناتىدا، ئىككى تەرەپنىڭ ئۇزۇندىن بۇيان داۋاملىشىپ كېلىۋاتقان يادرو ماجىراسى مەسىلىسىدە دىپلوماتىيەنى قايتىدىن جانلاندۇرۇشقا ۋە يېڭى بىر رايون خاراكتېرلىك ئۇرۇش قورقۇنچىنى تۈگىتىشكە تەييار ئىكەنلىكىنى بىلدۈرگەندىن كېيىن، تېھراننىڭ ئامېرىكا بىلەن بولغان سۆھبەتلەرنى پات يېقىندا قايتا باشلاش شەرتلىرىنى كۆزدىن كەچۈرۈۋاتقانلىقىنى ئېيتقان ئىدى.
جۈمە كۈنى پىلانلانغان بۇ ئۇچرىشىش تۇنجى بولۇپ Axios خەۋەر تورى تەرىپىدىن ئېلان قىلىندى. تور بېكەت تۈركىيە، پاكىستان، قاتار، مىسىر، ئومان، ئەرەب بىرلەشمە خەلىپىلىكى ۋە سەئۇدى ئەرەبىستان تاشقى ئىشلار مىنىستىرلىرىنىڭمۇ بۇ يىغىنغا قاتنىشىشىنىڭ كۈتۈلۈۋاتقانلىقىنى يازدى.
Axios بىر مەنبەنى تىلغا ئېلىپ تۇرۇپ، بۇ ئۇچرىشىشنى «ئەڭ ياخشى سېنارىيە» دەپ تەسۋىرلىگەن بولسىمۇ، ئەمما ئىش ئەمەلىيەتكە ئايلانمىغۇچە ھېچقانداق نەرسىنىڭ ئېنىق ئەمەسلىكى ھەققىدە ئاگاھلاندۇردى.
يەنە بىر تەرەپتىن ترامپ، ئىران بىلەن بولغان سۆھبەتلەر نەتىجە بەرمىسە پالاكەت ئېھتىماللىقىنى تىلغا ئېلىشنى داۋاملاشتۇرۇپ، دۈشەنبە كۈنى ئەگەر بىر كېلىشىم ھاسىل قىلىنمىسا «ئېھتىمال يامان ئىشلارنىڭ يۈز بېرىدىغانلىقىنى» ئەسكەرتىپ مۇنداق دېدى:
«ھازىر ئىرانغا قاراپ كېتىۋاتقان پاراخوتلىرىمىز بار، چوڭ پاراخوتلار، ئەڭ چوڭ ۋە ئەڭ ياخشىلىرى، بىزنىڭ ئىران بىلەن بولغان سۆھبەتلىرىمىزمۇ داۋاملىشىۋاتىدۇ. ھەممىسىنىڭ قانداق نەتىجىلىنىدىغانلىقىنى ھەممىمىز بىرلىكتە كۆرىمىز. لېكىن ھازىر ئىران بىلەن سۆھبەتلىشىۋاتىمىز، ئەگەر بىر نەرسىلەرنى ئورۇنلاشتۇرالىساق بەكمۇ ياخشى بولىدۇ. ئەگەر قىلالمىساق، ئېھتىمال يامان ئىشلار يۈز بېرىدۇ».
تېھران سۆھبەتكە تەييار ئىكەنلىكىنى ئېيتماقتا.
ئىران تاشقى ئىشلار مىنىستىرى ئابباس ئاراكچى تېھراننىڭ دىپلوماتىيەگە تەييار ئىكەنلىكىنى بىلدۈردى. دۈشەنبە كۈنى ئىراننىڭ 1979-يىللىق ئىنقىلابىنىڭ يېتەكچىسى رۇھۇللاھ خۇمەينىنىڭ مەقبەرىسىنى زىيارەت قىلىش جەريانىدا ئاراكچى مۇنداق دېدى: «دىپلوماتىيەنىڭمۇ ئۆزىگە خاس پرىنسىپلىرى بار. پات يېقىندا نەتىجىسىنى كۆرۈشنى ئۈمىد قىلىمەن. ئۆتكەن يىللىق 12 كۈنلۈك ئۇرۇش ياكى ئەڭ ئاخىرقى نامايىشلار ئارقىلىق مەقسىتىگە يېتەلمىگەن دۈشمەنلىرىمىز ئەمدى دىپلوماتىيەنى تاللىدى. قارشى تەرەپلەر بۈگۈن دىپلوماتىيەدىن سۆز ئېچىۋاتىدۇ. ۋەھالەنكى ئىران ھەر قاچان ئۆز-ئارا ھۆرمەت قىلىش ۋە مەنپەئەتلەرنى نەزەردە تۇتۇش شەرتى بىلەن بۇ تاللاشقا تەييار بولۇپ كەلگەن».
ئاراكچىنىڭ بۇ باياناتلىرى، ئىران بىلەن ئامېرىكا ئوتتۇرىسىدىكى كۈنسېرى كۈچىيىۋاتقان جىددىيچىلىك ۋە ئامېرىكا پىرېزىدېنتى دونالد ترامپ تەرىپىدىن ئېلان قىلىنغان، رايوندىكى ئامېرىكا ھەربىي كۈچلىرىنىڭ كۈچەيتىلىۋاتقان مەزگىلىگە توغرا كەلدى.
