تاشقى ئىشلار مىنىستىرى خاقان فىدان، ئىستانبۇلدا ئۆتكۈزۈلگەن تۈركىيە-ئەزەربايجان-گىرۇزىيە ئۈچ تەرەپلىمىلىك تاشقى ئىشلار مىنىستىرلىرى يىغىنىدىن كېيىن ئۇيۇشتۇرۇلغان ئورتاق مەتبۇئات يىغىنىدا نۇتۇق سۆزلىدى.
خاقان فىدان يىغىنىڭ ئىستراتېگىيەلىك قەدەملەرنىڭ تاشلىنىشىغا مۇستەھكەم ئاساس ياراتقانلىقىنى تەكىتلەپ، ئۈچ تەرەپلىمىلىك ھەمكارلىق مېخانىزمىنىڭ پەقەت تەرەپلەرنىڭ ئورتاق مەنپەئەتلىرى بىلەنلا چەكلىنىپ قالماي، شۇنىڭ بىلەن بىرگە رايون تىنچلىقى ۋە پاراۋانلىقى ئۈچۈنمۇ ئىنتايىن ھالقىلىق بىر رولنى زىممىسىگە ئالغانلىقىنى بىلدۈردى.
خاقان فىدان دۇنيانىڭ جۇغراپىيەلىك-سىياسىي داۋالغۇشلار يۈز بېرىۋاتقان قىيىن بىر دەۋرنى بېشىدىن كەچۈرۈۋاتقانلىقى تەرەپكە دىققەتلەرنى تارتىپ يەنە مۇنداق دېدى:
«بۇنىڭدىن كېيىنكى نىشانىمىز؛ ئېنېرگىيە، قاتناش ۋە ئالاقە ئۇل ئەسلىھەلىرىدە تېخىمۇ بىر گەۋدىلەشكەن بىر رايون قۇرۇپ چىقىشتۇر. بۇ بىر گەۋدىلىشىش، ياۋروپا بىلەن ئاسىيا ئوتتۇرىسىدا تېخىمۇ بىخەتەر، تېخىمۇ تېز ۋە ئالدىن كۆرگىلى بولىدىغان بىر ئۆتۈش لىنىيەسى شەكىللەندۈرۈش نۇقتىسىدىنمۇ ئايرىم بىر ئىستراتېگىيەلىك ئەھمىيەتكە ئىگە. بۇ نىشاننىڭ بۈگۈنكى كۈندە يېتىپ كەلگەن ئەڭ ئېنىق ئەمەلىي نۇقتىسى، ئوتتۇرا كارىدورنىڭ كۈچىيىۋاتقان رولىدۇر. ئوتتۇرا كارىدور، ئۈچ تەرەپلىمىلىك ھەمكارلىقىمىزنىڭ ئىستراتېگىيەلىك ئومۇرتقىلىرىدىن بىرىگە ئايلاندى. بۇ رامكا دائىرىسىدە باكۇ-تىفلىس-قارس تۆمۈر يول لىنىيەسىنىڭ تولۇق ئىقتىدارغا ئىگە بولۇشى مۇناسىۋىتى بىلەن 2-ئىيۇن كۈنى لىنىيەنىڭ گىرۇزىيە بۆلىكىدە ئۆتكۈزۈلگەن مۇراسىم ئىنتايىن مۇھىم بىر بۇرۇلۇش نۇقتىسى بولدى. بۇ ئىستراتېگىيەلىك لىنىيەدىن ئەڭ يۇقىرى دەرىجىدە پايدىلىنىپ، رايونىمىزغا تېخىمۇ كۆپ قوشۇمچە قىممەت يارىتىشنى نىشانلاۋاتىمىز»
مىنىستىر فىدان، ئەزەربايجان بىلەن ئەرمېنىيە ئوتتۇرىسىدىكى تىنچلىق مۇساپىسى ئۈستىدىمۇ توختىلىپ: «سۆھبەتلىرىمىزدە يەنە، جەنۇبىي كاۋكازدا مۇقىملىق، تىنچلىق ۋە پاراۋانلىقنىڭ ئورنىتىلىشىنى سەمىمىي ۋە ئىجابىي ھەمكارلىق ئاساسىدا شەكىللەندۈرۈش كېرەكلىكى يۆنىلىشىدىكى ئورتاق چۈشەنچىمىزنى پۈتۈنلەي بىرلىكتە يەنە بىر قېتىم جەزملەشتۈردۇق. رايونىمىزنىڭ توقۇنۇشلارنىڭ ئورنىغا تەرەققىيات پىلانلىرى بىلەن، ئايرىلىشلارنىڭ ئورنىغا ئورتاق پاراۋانلىق ۋە باغلىنىشچان لايىھەلىرى بىلەن تىلغا ئېلىنىشىنى ئارزۇ قىلىمىز ۋە بۇ يۆنىلىشتە جىددىي خىزمەت ئىشلەۋاتىمىز. بۇ تەسەۋۋۇرنىڭ بۈگۈنكى كۈندىكى ئەڭ ئۈمىد بەخش ئەتكۈچى بېشارىتىنى ئەزەربايجان بىلەن ئەرمېنىيە ئوتتۇرىسىدىكى تىنچلىق مۇساپىسىدە كۆرۈۋاتىمىز» دېدى.
