جۇمھۇر رەئىس رەجەپ تاييىپ ئەردوغان بىلەن جەنۇبىي كورېيە دۆلەت رەئىسى لى جېميۇڭ، ھەمكارلىقنى كەڭ دائىرىدە كۈچەيتىشنى مەقسەت قىلغان ئەتراپلىق سۆھبەتلەر ئۈچۈن ئەنقەرەدە بىر يەرگە جەم بولدى.
ئەردوغان دۈشەنبە كۈنى رەھبەرلەرنىڭ سودا، مۇداپىئە، سۈنئىي ئەقىل، ئېنېرگىيە، يېرىم ئۆتكۈزگۈچلەر ۋە باشقا ساھەلەرنى ئۆز ئىچىگە ئالغان ئىككى تەرەپلىك مۇناسىۋەتلەرنى مۇزاكىرە قىلغانلىقىنى ئېيتتى.
ئىككى تەرەپ يەنە پلازما تېخنىكىسى ساھەسىدە بىر پىكىر بىرلىكى كېلىشىمى ئىمزالىدى.
ئەردوغان ئىككى تەرەپلىك سودىنىڭ ھازىر 10 مىليارد دوللاردىن ئاشقانلىقىنى، نىشاننىڭ بۇنى 15 مىليارد دوللارغا چىقىرىش ئىكەنلىكىنى بىلدۈرۈپ، تۈركىيەنىڭ بۇ دۆلەتتە مەبلەغ سالماقچى بولغان جەنۇبىي كورېيەلىك مەبلەغ سالغۇچىلارغا تولۇق ياردەمچى بولىدىغانلىقىنى ئېيتتى.
جۇمھۇر رەئىس ئەردوغان: «ئەنقەرە ۋە سېئۇل، ‹تەڭ پايدا يەتكۈزۈش› چۈشەنچىسى بىلەن مۇناسىۋەتلىرىنى نۇرغۇن ساھەدە كۈچەيتىشنى داۋاملاشتۇرىدۇ،» دېگەن سۆزلەرنى ئىشلەتتى.
مۇداپىئە ھەمكارلىقىنىڭ ئۆزئارا تەربىيەلەش ۋە مەبلەغ سېلىش ئارقىلىق چوڭقۇرلاشتۇرغىلى بولىدىغانلىقىنى تەكىتلىگەن رەجەپ تاييىپ ئەردوغان: «مۇناسىۋەتلىك ئورگانلار بىلەن پاكىز ئېنېرگىيە ئىستانسىسى قۇرۇلۇشىغا مۇناسىۋەتلىك سۆھبەتلىرىمىزمۇ داۋاملىشىۋاتىدۇ،» دېدى.
ئەردوغان مۇۋەپپەقىيەتلىك بىر مۇداپىئە ھەمكارلىقىنىڭ ھەر ئىككى دۆلەتنىڭ ئىقتىدارىنى ئاشۇرۇشقا ۋە رايونلۇق تىنچلىققا ھەسسە قوشۇشقا ياردەم بېرىدىغانلىقىنى ئۈمىد قىلىدىغانلىقىنى ئېيتتى.
جۇمھۇر رەئىس ئەردوغان، يەنە جەنۇبىي كورېيەنىڭ سۈرىيە بىلەن دىپلوماتىك مۇناسىۋەت ئورنىتىش قارارىنى مەمنۇنىيەت بىلەن قارشى ئالىدىغانلىقىنى بىلدۈرۈپ، بۇنىڭ «قۇتلاشقا تېگىشلىك ئىلگىرىلەش» ئىكەنلىكىنى ئېيتتى.
ئەردوغان غەززە مەسىلىسى ئۈستىدىمۇ توختىلىپ: «تۈركىيە ۋە جەنۇبىي كورېيە، غەززەدە ئۇرۇش توختىتىش كېلىشىمىنىڭ قوغدىلىشىنى، پۇقرالارنىڭ ئۆلتۈرۈلۈشىنىڭ ئالدىنى ئېلىشنى ۋە ئىككى دۆلەتلىك ھەل قىلىش چارىسى تىرىشچانلىقلىرىنى قوللايدۇ» دېدى.
ئۇكرائىنا مەسىلىسى ھەققىدىمۇ توختالغان ئەردوغان، تۈركىيەنىڭ مەڭگۈلۈك تىنچلىقنىڭ ئىشقا ئېشىشىغا قارىتىلغان بارلىق دىپلوماتىك تىرىشچانلىقلارنى، «بولۇپمۇ ئىستانبۇل سۆھبەتلىرى ئارقىلىق» قوللاشنى داۋاملاشتۇرىدىغانلىقىنى ئېيتتى.
ئەردوغان ئەنقەرەنىڭ ئىراق، ئافرىقا ۋە ئوتتۇرا ئاسىيانىمۇ ئۆز ئىچىگە ئالغان نۇرغۇن رايونلار بىلەن سۈرىيە، غەززە ۋە ئۇكرائىنانى قايتا قۇرۇش ئىشلىرىدا سېئۇل بىلەن بىرلىكتە خىزمەت قىلالايدىغانلىقىغا ئىشىنىدىغانلىقىنى ئىپادىلىدى.
جەنۇبىي كورېيە دۆلەت رەئىسى لى جېميۇڭ، يەكشەنبە كۈنى ئېلان قىلغان باياناتىدا، ئۆز دۆلىتىنىڭ ۋە تۈركىيەنىڭ «ئەركىنلىك ۋە دېموكراتىيەنى قوغداش ئۈچۈن يانمۇ-يان جەڭ قىلغان، قېرىنداشلىق رىشتىسى بىلەن باغلانغان قېرىنداش مىللەتلەر» ئىكەنلىكىنى ئېيتقان ئىدى.
