تۈركىيە جۇمھۇرىيىتى مەدەنىيەت ۋە ساياھەت مىنىستىرلىقى دۈشەنبە كۈنى، مىنىستىر مەھمەت نۇرى ئەرسوينىڭ ئامېرىكا قوشما ئىشتاتلىرىنىڭ ئەنقەرەدە تۇرۇشلۇق باش ئەلچىسى توم بارراكنى مەدەنىيەت ۋە ساياھەت ساھەلىرىدىكى ھەمكارلىقنى مۇزاكىرە قىلىش ئۈچۈن قوبۇل قىلغانلىقىنى بىلدۈردى.
يىغىندا تۈركىيە بىلەن ئامېرىكا ئوتتۇرىسىدىكى ساياھەتچىلىكنى جانلاندۇرۇش تىرىشچانلىقلىرى، مەدەنىيەت مىراسلىرىنى قوغداش ۋە مەدەنىيەت يادىكارلىقلىرىنىڭ قانۇنسىز سودىسىغا قارشى كۈرەش قىلىش مەسىلىلىرى مۇزاكىرە قىلىندى.
ئەرسوي تۈركىيە بىلەن ئامېرىكا ئوتتۇرىسىدا ئۇزۇن يىللاردىن بۇيان داۋاملىشىپ كېلىۋاتقان مۇناسىۋەتلەر دائىرىسىدە ھەمكارلىقنى يەنە بىر قېتىم كۆزدىن كەچۈرگەنلىكلىرىنى تەكىتلەپ مۇنداق دېدى:
«سۆھبىتىمىزدە تۈركىيە بىلەن ئامېرىكا قوشما ئىشتاتلىرى ئوتتۇرىسىدىكى يىلتىزى چوڭقۇر مۇناسىۋەتلەر ئاساسىدا، مەدەنىيەت ۋە ساياھەت ساھەلىرىدىكى ھەمكارلىقىمىزنى ئەتراپلىق مۇزاكىرە قىلدۇق.»
مىنىستىر ئەرسوي ساياھەت ھەرىكەتچانلىقىنى ئاشۇرۇش، مەدەنىيەت مىراسلىرىنى قوغداش ۋە مەدەنىيەت يادىكارلىقلىرى ئەتكەسچىلىكىگە قارشى تۇرۇش ساھەسىدە ئېلىپ بېرىلىۋاتقان ئورتاق خىزمەتلەرگە باھا بېرىپ، دۆلەتلەر ئوتتۇرىسىدىكى دىيالوگ ۋە مەدەنىيەت رىشتىسىنى تېخىمۇ كۈچەيتىدىغان ھەمكارلىقلارنىڭ مۇھىملىقىنى تەكىتلىدى.
باش ئەلچى بارراك تۈركىيەنىڭ تارىخىنى، مەدەنىيەت خىلمۇخىللىقىنى، مېھماندوستلۇقىنى ۋە جۇغراپىيەلىك ئەۋزەللىكىنى ماختىدى ھەمدە بۇلارنىڭ دۆلەتنىڭ دۇنياۋى ساياھەت ساھەسىدىكى ئورنىنى تېخىمۇ مۇستەھكەملەيدىغانلىقىنى ئېيتتى.
بارراك يەنە ئەرسوينىڭ تۈركىيەنىڭ ساياھەت يوشۇرۇن كۈچىنى ئاشۇرۇش تىرىشچانلىرىغا يۇقىرى باھا بەردى، ھەمدە داۋاملىشىۋاتقان ھەمكارلىقنىڭ ئەھمىيىتىنى تەكىتلەپ مۇنداق دېدى:
«مىنىستىر ئەرسوينىڭ بۇنداق كەسكىن خەلقئارالىق رىقابەت مۇھىتىدا تۈركىيەنىڭ ئورنىنى قوغداش ۋە تېخىمۇ ئىلگىرى سۈرۈشتىكى جاسارەتلىك رەھبەرلىكى ھەقىقەتەن ماختاشقا ئەرزىيدۇ.»
