ئامېرىكا پىرېزىدېنتى دونالد ترامپ، ۋاشىنگتوننىڭ سۈرىيەگە تەيىنلىگەن يېڭى ئالاھىدە ۋەكىلىنىڭ، دۆلەتنىڭ ئەسەد ئائىلىسىنىڭ نەچچە ئون يىللىق ھۆكۈمرانلىقىدىن كېيىنكى ئۆتكۈنچى باسقۇچىدا «بىرلىكتە خىزمەت ئىشلەشنىڭ زور يوشۇرۇن كۈچى»نى ھېس قىلغانلىقىنى ئېيتتى.
ترامپ چارشەنبە كۈنى ئىجتىمائىي تاراتقۇدىكى ئادرېسىدا ئۇچۇر ھەمبەھرىلەپ: «ئامېرىكا قوشما ئىشتاتلىرىنىڭ تۈركىيەدىكى باش ئەلچىسى توم بارراكنىڭ، بىزنىڭ سۈرىيە ئالاھىدە ۋەكىلىمىز سۈپىتىدە خىزمەت قىلىدىغانلىقىنى ئېلان قىلىشتىن تولىمۇ مەمنۇنمەن» دېدى.
ئۇ يەنە: «توم سۈرىيە بىلەن ھەمكارلىشىشنىڭ رادىكاللىقنى توختىتىش، مۇناسىۋەتلەرنى تەرەققىي قىلدۇرۇش ۋە ئوتتۇرا شەرقتە تىنچلىقنى ئىشقا ئاشۇرۇش ئۈچۈن زور يوشۇرۇن كۈچكە ئىگە ئىكەنلىكىنى بىلىدۇ. بىز بىرلىكتە ئامېرىكا ۋە دۇنيانى قايتىدىن بىخەتەر قىلىمىز!» دېگەنلەرنى سۆزلىرىگە ئىلاۋە قىلدى.
بۇ بايانات، ترامپ تەرىپىدىن «رەھىمسىز ۋە ۋەيران قىلغۇچى» دەپ سۈپەتلەنگەن ھەمدە ئەسەد دەۋرىدە يولغا قويۇلغان سۈرىيەگە قارشى ئېمبارگونىڭ بىكار قىلىنىشىدىن بىر نەچچە كۈن كېيىن ئېلان قىلىندى. پىرېزىدېنت بۇ قارارنىڭ جۇمھۇر رەئىس رەجەپ تاييىپ ئەردوغان ۋە سەئۇدى ئەرەبىستان تەخت ۋارىسى شاھزادىسى مۇھەممەد بىن سەلماننىڭ تەلەپلىرىگە ئاساسەن چىقىرىلغانلىقىنى بىلدۈردى.
ترامپ ئۆتكەن ئايدىكى سەئۇدى ئەرەبىستان زىيارىتى جەريانىدا، رىيادتا سۈرىيە پىرېزىدېنتى ئەھمەد شارا بىلەن ئۇچراشقان. بۇ تارىخىي ئۇچرىشىش ئامېرىكا ۋە سۈرىيە رەھبەرلىرى ئوتتۇرىسىدا 25 يىلدىن بۇيان ئۆتكۈزۈلگەن تۇنجى ئۇچرىشىش بولۇپ ھېسابلىنىدۇ. ئالدىنقى قېتىملىق ئۇچرىشىش 2000-يىلى سابىق پىرېزىدېنت بىل كىلىنتوننىڭ جەنۋە شەھىرىدە ھافىز ئەسەد بىلەن ئۆتكۈزگەن سۆھبىتى ئىدى.
ئامېرىكا تاشقى ئىشلار مىنىستىرى ماركو رۇبىيو ئۆتكەن ھەپتە پالاتا ئەزالىرىغا قىلغان سۆزىدە، ۋاشىنگتوننىڭ يېڭى سۈرىيە ھۆكۈمىتىنىڭ مۇۋەپپەقىيەت قازىنىشىغا ياردەم بېرىش يولىدىكى تىرىشچانلىقلارنى قوللايدىغانلىقىنى بىلدۈرۈپ، مەغلۇبىيەتنىڭ قايتىدىن توقۇنۇشلارغا ۋە رايون خاراكتېرلىك مۇقىمسىزلىققا سەۋەب بولىدىغانلىقى توغرىسىدا ئاگاھلاندۇرغانىدى.
