خەلقئارا جىنايى ئىشلار سوت مەھكىمىسىنىڭ سابىق باشلىقى سوڭ ساڭخيۇننىڭ قارىشىچە، شىمالىي كورېيەنىڭ رۇسىيەگە قىلغان ھەربىي ياردىمى، ئۇكرائىنانىڭ شىمالىي كورېيە ئۈستىدىن سوتقا ئەرز سۇنۇشىنى قانۇنىي ئاساس بىلەن تەمىنلەيدىكەن.
خەلقئارا جىنايى ئىشلار سوت مەھكىمىسىنىڭ سابىق باشلىقىنىڭ باياناتىغا ئاساسلانغاندا، شىمالىي كورېيە رەھبىرى كىم جوڭئۇن، رۇسىيەنىڭ ئۇكرائىنا بىلەن بولغان ئۇرۇشىغا ھەربىي ياردەم بەرگەنلىكى سەۋەبىدىن، لاھەيدا تۇرۇشلۇق خەلقئارا جىنايى ئىشلار سوت مەھكىمىسىدە ئۇرۇش جىنايەتلىرى بويىچە تەكشۈرۈشكە دۇچ كېلىشى مۇمكىن ئىكەن.
يۆنخاپ خەۋەر ئاگېنتلىقىنىڭ خەۋىرىگە ئاساسلانغاندا، سوڭ ساڭخيۇن بۇ سۆزلەرنى جەنۇبىي كورېيەنىڭ پايتەختى سېئۇلدا ئۆتكۈزۈلگەن بىر مۇھاكىمە يىغىنىدا ئوتتۇرىغا قويغان. شىمالىي كورېيە ئۆتكەن ئايدا ئۇكرائىنا ئۇرۇشىدا رۇسىيەنى قوللاش ئۈچۈن ئەسكەر ئەۋەتكەنلىكىنى دەلىللىگەنىدى.
پيوڭياڭمۇ، موسكۋامۇ شىمالىي كورېيە ئەسكەرلىرىنىڭ ئۇكرائىناغا قارشى ئۇرۇشتا رۇسىيەگە ياردەم بەرگەنلىكىنى جەزملەشتۈردى.
سوڭ، كىمنىڭ شىمالىي كورېيەدىكى كىشىلىك ھوقۇق دەپسەندىچىلىكى سەۋەبىدىن خەلقئارا جىنايى ئىشلار سوت مەھكىمىسىگە تاپشۇرۇلمىغانلىقىنى، لېكىن ھازىر ئۇكرائىنانىڭ كىم جوڭئۇن ئۈستىدىن سوتقا ئەرز سونۇشى ئۈچۈن قانۇنىي ئاساسنىڭ مەۋجۇتلۇقىنى بىلدۈردى.
سو بۇ ھەقتە توختىلىپ، «كىم جوڭئۇننى خەلقئارا جىنايى ئىشلار سوت مەھكىمىسىگە ئېلىپ چىقىشنىڭ ۋاقتى كەلدى» دېدى.
ئۇ يەنە «ئەڭ ياخشىسى ئۇكرائىنا تەرىپىدىن شىكايەت قىلىنىشى، لېكىن خەلقئارا جىنايى ئىشلار سوت مەھكىمىسىنىڭمۇ مۇستەقىل تەكشۈرۈش باشلاش ھوقۇقى بار» دېگەنلەرنى سۆزلىرىگە ئىلاۋە قىلدى.
ئۇ يەنە، شىمالىي كورېيە رەھبەرلىكى ۋە ئۇنىڭ ئىتتىپاقداشلىرى تەرىپىدىن سادىر قىلىنىشى مۇمكىن بولغان ئۇرۇش جىنايەتلىرىگە قارشى خەلقئارا جىنايى ئىشلار سوت مەھكىمىسىنى تېخىمۇ كۈچلۈك تەدبىرلەرنى ئېلىشقا چاقىردى.
