ئامېرىكا تاشقى ئىشلار مىنىستىرى ماركو رۇبىيو ئافغانىستاندىكى مۇۋەققەت تالىبان ھۆكۈمىتىنىڭ ئامېرىكا پۇقرالىرىنى ۋە باشقا چەت ئەل پۇقرالىرىنى قانۇنسىز ھالدا تۇتقۇن قىلىشنى داۋاملاشتۇرۇۋاتقانلىقى سەۋەبىدىن، ئامېرىكا پۇقرالىرىنىڭ ئافغانىستانغا ساياھەتكە بېرىشىنىڭ بىخەتەر ئەمەسلىكىنى بىلدۈردى.
ئامېرىكا تاشقى ئىشلار مىنىستىرى ماركو رۇبىيو ئافغانىستان ھۆكۈمىتىنىڭ داۋاملىشىۋاتقان قىلمىشلىرى سەۋەبىدىن ئافغانىستاننىڭ رەسمىي ھالدا «قانۇنسىز تۇتقۇن قىلىشنى قوللايدىغان دۆلەت» دەپ بېكىتىلگەنلىكىنى ئۇقتۇردى.
رۇبىيو دۈشەنبە كۈنى ئېلان قىلغان باياناتىدا مۇنداق دېدى:
«بۈگۈن مەن ئافغانىستاننى قانۇنسىز تۇتقۇن قىلىشنى قوللايدىغان دۆلەت دەپ ئېلان قىلىمەن. تالىبان تېررورلۇق تاكتىكىلىرىنى قوللىنىشنى داۋاملاشتۇرۇۋاتىدۇ، كىشىلەرنى تۆلەم ئۈچۈن ياكى سىياسىي مۇرەسسەلەرگە ئېرىشىش مەقسىتىدە تۇتقۇن قىلماقتا. بۇ رەزىل تاكتىكىلارنىڭ ئاخىرلىشىشى لازىم.»
مەزكۇر تۈرگە ئايرىش قارارى، ئامېرىكا پۇقرالىرىنىڭ ۋە باشقا چەت ئەل پۇقرالىرىنىڭ قانۇنسىز ھالدا تۇتقۇن قىلىنغانلىقىغا دائىر نۇرغۇن خەۋەرلەردىن كېيىن چىقىرىلدى.
رۇبىيو ئافغانىستاننىڭ ئامېرىكا پۇقرالىرى ئۈچۈن خەتەرلىك ئىكەنلىكى ھەققىدە يەنە بىر قېتىم ئاگاھلاندۇرۇش بېرىپ مۇنداق دېدى:
«ئامېرىكا پۇقرالىرىنىڭ ئافغانىستانغا ساياھەت قىلىشى بىخەتەر ئەمەس، چۈنكى تالىبان ھەم ئامېرىكا پۇقرالىرىنى ھەمدە باشقا چەت ئەل پۇقرالىرىنى قانۇنسىز ھالدا تۇتقۇن قىلىشنى داۋاملاشتۇرۇۋاتىدۇ. تالىبان دەرھال دەننىس كويلې، مەھمۇد ھەبىبى ۋە ئافغانىستاندا قانۇنسىز ھالدا تۇتقۇن قىلىنغان بارلىق ئامېرىكا پۇقرالىرىنى قويۇپ بېرىشى ھەمدە تۇتقۇن دىپلوماتىيەسى قوللىنىشنى پۈتۈنلەي ئاخىرلاشتۇرىدىغانلىقىغا ۋەدە بېرىشى كېرەك.»
