ئامېرىكادا 10 مىڭدىن ئارتۇق قانۇنسىز كۆچمەن تۇتقۇن قىلىندى

ئامېرىكا ئىچكى بىخەتەرلىك ئىشلىرى مىنىستىرى يەرلىك رەھبەرلەرنى شەھەرنى قوغداشتا مەغلۇپ بولۇش بىلەن ئەيىبلىدى، ھەمدە كەڭ كۆلەملىك نارازىلىقلارغا قارىماي، كۆچمەنلەرگە قارىتىلغان تەدبىرلەر دائىرىسىدە ئېلىپ بېرىلغان تۇتقۇن قىلىش ھەرىكەتلىرىنىڭ توغرا ئىكەنلىكىنى ئىلگىرى سۈردى.

ئامېرىكا ئىچكى بىخەتەرلىك ئىشلىرى مىنىستىرى شەھەردە بىخەتەرلىكنىڭ كاپالەتكە ئىگە قىلىنالماسلىقىنىڭ جاۋابكارىنىڭ يەرلىك رەھبەرلەر ئىكەنلىكىنى ئىلگىرى سۈردى.

ئامېرىكا ئىچكى بىخەتەرلىك ئىشلىرى مىنىستىرى كرىستى نوم دۈشەنبە كۈنى ئېلان قىلغان باياناتىدا، مىننېسوتا ئىشتاتىنىڭ مىننېئاپولىس شەھىرىدە كۆچمەنلەرگە قارىتىلغان داۋاملىشىۋاتقان زەربە بېرىش ھەرىكەتلىرى دائىرىسىدە، مىنىستىرلىقىنىڭ 10 مىڭدىن ئارتۇق كۆچمەننى تۇتقۇن قىلغانلىقىنى ئەسكەرتىپ مۇنداق دېدى:

«مىننېئاپولىستا ئامېرىكالىقلارنى ئۆلتۈرگەن، بالىلارغا زىيان يەتكۈزگەن ۋە تېررورلۇق پائالىيەتلىرى بىلەن شۇغۇللانغان 10 مىڭدىن ئارتۇق جىنايەتچى قانۇنسىز چەت ئەللىك كۆچمەننى تۇتقۇن قىلدۇق.»

ئۇ، مىننېسوتا ئىشتاتىنىڭ باشلىقى تىم ۋالز بىلەن مىننېئاپولىس شەھەر باشلىقى جاكوب فرېينى شەھەر خەلقىنى قوغدىمىدى دەپ ئەيىبلىدى.

نوم يەنە، ئاخىرقى ئالتە ھەپتە ئىچىدە دۆلەت خەۋپسىزلىك كۈچلىرىنىڭ تەخمىنەن 3 مىڭ كۆچمەننى تۇتقۇن قىلغانلىقىنىمۇ سۆزلىرىگە ئىلاۋە قىلدى.

مىننېئاپولىس 7-يانۋار كۈنى ئامېرىكا كۆچمەنلەر ۋە تاموژنا ئىدارىسىنىڭ بىر خادىمىنىڭ 37 ياشلىق رېنى نىكول گودنى ئېتىپ ئۆلتۈرۈشىدىن كېيىن، كۆچمەنلەرگە قارىتىلغان تەدبىرلەر ھەققىدىكى تالاش-تارتىشلارنىڭ مەركىزىگە ئايلانغان ئىدى.

ئامېرىكالىق ئانا گودنىڭ ئۆلتۈرۈلۈشى جەمئىيەتتە ۋە سىياسىي ساھەلەردە كۈچلۈك ئىنكاس قوزغاش بىلەن بىرگە، يەرلىك، ئىشتات ۋە فېدېراتسىيە مىقياسىدا تەكشۈرۈش ئېلىپ بېرىش چاقىرىقلىرىنىمۇ بىرگە ئېلىپ كەلدى.