2025-يىلى 10-ئۆكتەبىردىن باشلاپ كۈچكە ئىگە بولغان ئۇرۇش توختىتىش كېلىشىمىگە قارىماي، ئىسرائىلىيەنىڭ شەنبە كۈنى غەززەنىڭ تۈرلۈك رايونلىرىغا ئېلىپ بارغان ھۇجۇملىرىدا ئىككى پەلەستىنلىك ھاياتىدىن ئايرىلدى، بەش كىشى يارىلاندى.
تىببىي مەنبەلەر ئانادولۇ ئاگېنتلىقىغا بەرگەن باياناتىدا، غەززەنىڭ شىمالىدىكى جىبالىيە رايونىغا ئىسرائىلىيەگە تەۋە بىر ئۇچقۇچىسىز ئايروپىلاننىڭ بومبا تاشلىشى نەتىجىسىدە ياشانغان بىر پەلەستىنلىكنىڭ قازا قىلغانلىقىنى ئۇقتۇردى.
تىببىي مەنبەلەر يەنە، بۇنىڭدىن سەل بۇرۇن غەززەنىڭ جەنۇبىدىكى خان يۇنۇسنىڭ جەنۇبىغا جايلاشقان كىزان ئەن-نەجار رايونىغا قىلىنغان ئىسرائىلىيە ھۇجۇمىدا 46 ياشلىق بىر پەلەستىنلىكنىڭ ھاياتىدىن ئايرىلدىغانلىقىنى ئۇقتۇردى.
تىببىي مەنبەلەر يەنە، غەززە شەھىرىنىڭ شەرقىدىكى شۇجائىييە مەھەللىسىدىمۇ 23 ياشلىق بىر پەلەستىنلىك ئايالنىڭ ئىسرائىلىيەگە تەۋە بىر ئۇچقۇچىسىز ئايروپىلاندىن ئېتىلغان ئوق نەتىجىسىدە بوينىدىن يارىلانغانلىقىنى بىلدۈردى.
بۇنىڭدىن ئىلگىرى شۇجائىييەدىكى ئۆمەر ئەل-مۇختار كوچىسىنىڭ شەرقىدە ئىسرائىلىيە ئەسكەرلىرى ئاتقان ئوق نەتىجىسىدە ئۈچ پەلەستىنلىكنىڭ يارىلانغانلىقى، يارىلانغانلاردىن بىرىنىڭ ئەھۋالىنىڭ ئېغىر ئىكەنلىكى قەيت قىلىندى.
مەنبەلەر غەززەنىڭ شىمالىدىكى جىبالىيە ئەل-بەلىد رايونىدىمۇ بىر پەلەستىنلىكنىڭ ئىسرائىلىيە ئەسكەرلىرى ئاتقان ئوق نەتىجىسىدە كۆكرىكى ۋە قولىدىن يارىلانغانلىقىنى سۆزىگە ئىلاۋە قىلدى.
ھۇجۇملارنىڭ ئۇرۇش توختىتىش كېلىشىمىدە بەلگىلەنگەن ئىسرائىلىيە ھەربىي ئىشغالىيىتى ۋە ئورۇنلىشىشى سىرتىدا قالغان رايونلاردا يۈز بەرگەنلىكى بىلدۈرۈلدى.
ئامېرىكا قوشما ئىشتاتلىرى قوللىغان ئۇرۇش توختىتىش كېلىشىمى 10-ئۆكتەبىردىن بۇيان غەززەدە كۈچكە ئىگە بولۇۋاتقان بولۇپ، ئىسرائىلىيەنىڭ 2023-يىلى ئۆكتەبىردىن باشلاپ ئىككى يىل داۋاملاشقان ھۇجۇملىرىنى توختاتقان ئىدى. مەزكۇر ھۇجۇملاردا كۆپىنچىسى ئاياللار ۋە بالىلار بولۇپ جەمئىي 72 مىڭدىن ئارتۇق كىشى ھاياتىدىن ئايرىلدى، 171 مىڭدىن ئارتۇق كىشى يارىلاندى.
بىراق غەززە سەھىيە مىنىستىرلىقىنىڭ بىلدۈرۈشىچە، ئۇرۇش توختىتىش كېلىشىمىگە قارىماي، ئىسرائىلىيە كۈچلىرى زەمبىرەك ئوقى ۋە قوراللىق ھۇجۇملار بىلەن يۈزلىگەن قېتىم كېلىشىمگە خىلاپلىق قىلغان. بۇ جەرياندا 612 پەلەستىنلىك ھاياتىدىن ئايرىلىپ، 1640 كىشى يارىلانغان.
