ئامېرىكادا يۈز بەرگەن ئاپتوموبىل بومبا ھۇجۇمىدا ئۆلگەنلەرنىڭ سانى 15 كە يەتتى

نيۇ ئورلېيان شەھەرلىك ئەدلىيە دوختۇرى دۋايت ماككېننا بۇرۇن 10 كىشى ئۆلدى دەپ ئېلان قىلىنغان ھۇجۇمدا ھاياتىدىن ئايرىلغانلار سانىنىڭ 15 كە يەتكەنكىلىكىنى بىلدۈردى.

ماككېننا بۇ ھەقتە ئېلان قىلغان يازما باياناتىدا، بۇربون كوچىسىدا يۈز بەرگەن ئاپتوموبىل بومبا ھۇجۇمىدا قازا قىلغانلار سانىنىڭ 15 كە يەتكەنلىكىنى، جەسەت تەكشۈرۈش ئىشلىرى تاماملانغان ۋە ھاياتىدىن ئايرىلغانلارنىڭ ئۇرۇق - تۇغقانلىرى بىلەن كۆرۈشۈلگەندىن كېيىن قازا قىلغانلارنىڭ كىملىكىنىڭ ئېلان قىلىنىدىغانلىقىنى قەيت قىلدى.

نيۇ ئورلېيان شەھىرىنىڭ بۇربون كوچىسىدا تۈنۈگۈن كېچە سائەت 03:15 دە بىر ئاپتوموبىلنىڭ تېز سۈرئەتتە خەلق توپىغا ئېتىلىپ كىرىشى نەتىجىسىدە، دەسلەپكى مەلۇماتلارغا قارىغاندا 10 كىشىنىڭ ئۆلگەنلىكى، ئەڭ ئاز 35 كىشىنىڭ يارىلانغانلىقى ئېلان قىلىنغانىدى.

زوراۋان نەق مەيداندا ساقچىلار بىلەن بولغان قوراللىق توقۇنۇشتا ئۆلتۈرۈلگەنىدى.

ئامېرىكا دائىرىلىرى كېيىن زوراۋاننىڭ تېكساس ئىشتاتىدىن كەلگەن 42 ياشلىق ئامېرىكا پۇقراسى شەمسۇددىن جاببار ئىسىملىك سابىق ھەربىي ئىكەنلىكىنى ئاشكارىلىغانىدى.

ئالاقىدار تارماقلار بۇ ھەقتە ئېلان قىلغان باياناتىدا، تەكشۈرۈشنىڭ «تېررورلۇق ھۇجۇمى» سۈپىتىدە ئېلىپ بېرىلىۋاتقانلىقىنى ئۇقتۇردى.

ھۇجۇمچىنىڭ ماشىنىسىدىن دائېش تېررورلۇق تەشكىلاتىنىڭ ئاتالمىش بايرىقىنىڭ تېپىلغانلىقىنى ئاشكارىلىغان مەسئۇللار، بۇ كىشىنىڭ تېررورلۇق تەشكىلاتى بىلەن بولغان ئالاقىسىنىڭ تەكشۈرۈلۈۋاتقانلىقىنى بىلدۈردى.

ئامېرىكانىڭ سايلانغان پىرېزىدېنتى دونالد ترامپ ئاممىۋى ئورتاقلىشىش تور بېتى «Truth Social» سەھىپىسىدە ئېلان قىلغان  باياناتىدا، ھۇجۇمنىڭ «چەت دۆلەتتىن كەلگەن بىر جىنايەتچى» تەرىپىدىن ئېلىپ بېرىلغانلىقىنى ئەسكەرتىپ مۇنداق دېدى:

«مەن چەت دۆلەتتىن كەلگەن جىنايەتچىلەرنىڭ، دۆلىتىمىزدىكى جىنايەتچىلەردىن تېخىمۇ ئەشەددىي ئىكەنلىكىنى ئېيتقىنىمدا، بۇنىڭغا دېموكراتلار ۋە يالغان خەۋەر تارقىتىدىغان مەتبۇئاتلار قارشى چىققانىدى، ئەمما بۇنىڭ ھەقىقەت ئىكەنلىكى ئەمدى ھەممىگە ئايان بولدى. دەرۋەقە، ئامېرىكادىكى جىنايىي قىلمىشلار نۆۋەتتە بۇرۇن كۆرۈلۈپ باقمىغان دەرىجىگە بېرىپ يەتتى.»