ياۋروپا ئىتتىپاقى بىلەن قازاقىستان ترانسپورت (قاتناش) ئالاقىسىنى كۈچەيتىش، ھالقىلىق خام ئەشيالار ساھەسىدىكى ھەمكارلىقنى ئاشۇرۇش ۋە مەبلەغ سېلىش تۈرلىرىنى تېزلىتىشنى كۆزدە تۇتقان تۈرلۈك كېلىشىملەرنى ئىمزالىدى.

ياۋروپا ئىتتىپاقى كومىتېتىنىڭ رەئىسى ئۇرسۇلا فون دېر لېيېن ياۋروپا ئىتتىپاقى كېڭىشىنىڭ رەئىسى ئانتونىئو كوستام ۋە قازاقىستان پىرېزىدېنتى قاسىم-جومەرت توقايېۋنىڭ بىريۇسسېلدا ئۆتكۈزگەن ئۇچرىشىشىدىن كېيىن، تەرەپلەر ئوتتۇرىسىدىكى ئىستراتېگىيەلىك شېرىكلىك مۇناسىۋەتنى كۈچەيتىشكە قارىتىلغان قارارلار توغرىسىدا قوشما بايانات ئېلان قىلىندى.

ياۋروپا ئىتتىپاقى بىلەن قازاقىستان ئوتتۇرىسىدا ئىمزالانغان «ئاۋىئاتسىيە كېلىشىمى»نىڭ ھاۋا قاتنىشى ئالاقىسىنى كۈچەيتىدىغانلىقى ۋە ياۋروپادىكى ئاۋىئاتسىيە شىركەتلىرىگە يېڭى سودا پۇرسەتلىرىنى يارىتىپ بېرىدىغانلىقى تىلغا ئېلىنغان باياناتتا يەنە، كېلىشىم دائىرىسىدە، قازاقىستان بىلەن ھاۋا ترانسپورت كېلىشىمى بولغان ياۋروپا ئىتتىپاقىغا ئەزا 17 دۆلەت ئوتتۇرىسىدىمۇ پۈتۈن ياۋروپا ئىتتىپاقى ئاۋىئاتسىيە شىركەتلىرىنىڭ ئۇچۇشلىرىغا يول ئېچىلغانلىقى قەيت قىلىندى.

باياناتتا يەنە، ياۋروپا قايتىدىن قۇرۇش ۋە تەرەققىيات بانكىسى (EBRD) بىلەن قازاقىستان ھۆكۈمىتىنىڭ، ئاستانا شەھىرىدە ھالقىلىق خام ئەشيالار ئۈچۈن خەلقئارالىق ئاككرېدىتاتسىيەگە (ئېتىراپنامىگە) ئىگە بىر خىمىيەۋى ئانالىز تەجرىبىخانىسى قۇرۇشقا يۈزلەنگەن ئىقتىسادىي ئۈنۈم تەتقىقاتىنى قوللاش مەقسىتىدە ئۆزئارا چۈشىنىش ئەھدىنامىسى ئىمزالىغانلىقى بايان قىلىندى.

ياۋروپا ئىتتىپاقىنىڭ ھالقىلىق خام ئەشيا ساھەسىدىكى ھەمكارلىقنى چوڭقۇرلاشتۇرۇشنى نىشان قىلغانلىقى تەكىتلەنگەن باياناتتا، مەزكۇر تەجرىبىخانىنىڭ سۈپەت ۋە بىخەتەرلىك سىناقلىرىنى خەلقئارالىق ئۆلچەملەر بويىچە ئېلىپ بېرىشقا تۆھپە قوشىدىغانلىقى ئۇقتۇرۇلدى.

باياناتتا، ياۋروپا ئىتتىپاقى كومىتېتى بىلەن قازاقىستان ئوتتۇرىسىدا ئېلىپ بېرىلىۋاتقان «ۋىزىنى ئاسانلاشتۇرۇش كېلىشىمى» ۋە «قايتۇرۇپ قوبۇل قىلىش كېلىشىمى» سۆھبەتلىرىنىڭ ئۇتۇقلۇق بىلەن تاماملانغانلىقى، كېلىشىملەر ئىجرا قىلىنىشقا باشلىغان تەقدىردە، قازاقىستان پۇقرالىرىنىڭ قىسقا مۇددەتلىك ياۋروپا ئىتتىپاقى ۋىزىسىغا ئىلتىماس قىلىش مۇساپىسىنىڭ ئاسانلىشىدىغانلىقى، «قايتۇرۇپ قوبۇل قىلىش كېلىشىمى»نىڭ بولسا ياۋروپا ئىتتىپاقىنىڭ كۆچمەنلەر قائىدە - قانۇنلىرىنى ئىجرا قىلىشىنى قوللايدىغانلىقى بىلدۈرۈلدى.