ئىران خامەنېينىڭ ئوغلى مۇجتەبانى يېڭى دىنىي رەھبەر قىلىپ تەيىنلىدى

ئىران دۆلەت تاراتقۇلىرىنىڭ خەۋىرىگە قارىغاندا، ئىران مۇتەخەسسىسلەر كېڭىشى (Uzmanlar Meclisi) مۇجتەبا ھامەنىنى دادىسى ئەلى ھامەنىنىڭ ئورنىغا دۆلەتنىڭ يېڭى دىنىي رەھبىرى قىلىپ تەيىنلىدى.

ئىران ئىنقىلاب مۇھاپىزەتچىلىرى ئارمىيەسى بىلەن قويۇق مۇناسىۋىتى بارلىقى ۋە ئوتتۇرا دەرىجىلىك دىنىي زات ئىكەنلىكى بىلىنىدىغان مۇجتەبا خامەنېي، ئۇزۇندىن بۇيان ئىران ھاكىمىيەت قاتلىمىدىكى بەزى گۇرۇپپىلار تەرىپىدىن ئامېرىكا ۋە ئىسرائىلىيەنىڭ ئىرانغا قىلغان ھۇجۇمىدا ئۆلتۈرۈلگەن دادىسىنىڭ ئىزباسارى سۈپىتىدە كۆرۈلۈپ كېلىۋاتاتتى.

ئىراننىڭ ھاكىمىيەت ئىدېئولوگىيەسى تەختنىڭ دادىدىن ئوغۇلغا قېلىشىغا قارشى تۇرسىمۇ، ئەمما مۇجتەبا خامەنېي ئىنقىلابىي مۇھاپىزەتچىلەر ئارىسىدا ۋە ۋاپات بولغان دادىسىنىڭ يەنىلا تەسىر كۈچىگە ئىگە ئىشخانىسىدا كۈچلۈك قوللاشقا ئىگە.

مۇتەخەسسىسلەر كېڭىشى ئېلان قىلغان باياناتىدا، 56 ياشلىق مۇجتەبا خامەنېينىڭ «كېڭەشنىڭ ھۆرمەتلىك ۋەكىللىرىنىڭ قەتئىي ئاۋاز بېرىشى بىلەن ئىران ئىسلام جۇمھۇرىيىتى مۇقەددەس سىستېمىسىنىڭ ئۈچىنچى رەھبىرى بولۇپ تەيىنلەنگەنلىكى ۋە تونۇشتۇرۇلغانلىقى» نى بىلدۈردى.

باياناتتا يەنە، دىنىي زاتلار كېڭىشىنىڭ «جىنايەتچى ئامېرىكا ۋە رەزىل سىئونىست ھاكىمىيىتىنىڭ رەھىمسىز تاجاۋۇزچىلىقىغا» قارىماي، يېڭى بىر رەھبەرنى تاللاشتا «بىر مىنۇتمۇ ئىككىلەنمىگەنلىكى» تىلغا ئېلىندى.

جەڭ ئېلان قىلىش

بۇ قارار ئامېرىكا پىرېزىدېنتى دونالد ترامپنىڭ ئىلگىرى مۇجتەبانى «ئەھمىيەتسىز» دەپ ئاتىغانلىقى ۋە ئىراننى كىمنىڭ باشقۇرىدىغانلىقىغا ئۆزىنىڭمۇ قارار بېرىشى كېرەكلىكىنى ئېيتقاندىن كېيىن ئوتتۇرىغا چىقتى.

ترامپ بۇ ئۇقتۇرۇش ئېلان قىلىنىشتىن بۇرۇن ABC News تېلېۋىزىيەسىگە بەرگەن باياناتىدا: «بىزدىن تەستىق ئالمىسا، ئۇزۇن ۋاقىت ۋەزىپە ئۆتىيەلمەيدۇ،» دېگەن ئىدى.

ئىران دۆلەتلىك بىخەتەرلىك ئالىي كېڭىشىنىڭ كاتىپى ئەلى لارىجانى مۇجتەبانىڭ دۆلەتنى نۆۋەتتىكى خەتەرلىك شارائىتتا باشقۇرالايدىغانلىقىنى ئېيتىپ، يېڭى دىنىي رەھبەر ئەتراپىدا ئۇيۇشۇشقا چاقىردى.

ئىران ئىنقىلابىي مۇھاپىزەتچىلەر ئارمىيەسىمۇ يېڭى دىنىي رەھبەرگە ئەگىشىشكە تەييار ئىكەنلىكىنى بىلدۈردى.