خىتاي تەرەپ شەنبە كۈنى ئامېرىكا ئاۋام پالاتاسىدا كۈنتەرتىپكە كەلگەن ئىلغار ئۆزەك ئىشلەپچىقىرىش ئۈسكۈنىلىرىگە تېخىمۇ قاتتىق ئېكسپورت چەكلىمىسى قويۇشنى مەزمۇن قىلغان يېڭى ئېكسپورت كونترول لايىھەسى ھەققىدە ئاگاھلاندۇردى. خىتاي خەۋەر ئاگېنتلىقى شىنخۇانىڭ مەلۇماتىغا ئاساسلانغاندا، ئامېرىكا ئاۋام پالاتاسى تاشقى ئىشلار كومىتېتى «تېخنىكا كونتروللۇقىنىڭ قاتتىق دېتال ساھەسىدە كۆپ تەرەپلىمە ماسلىشىشى»دىن دېرەك بېرىدىغان «MATCH» قانۇنى بىلەن بىر قىسىم ئېكسپورت كونترول قانۇن لايىھەلىرىنى مۇشۇ ئاينىڭ بېشىدا ماقۇللىغان.
خىتاي سودا مىنىستىرلىقىنىڭ باياناتچىسى «دۆلەت خەۋپسىزلىكى ئۇقۇمىنىڭ زىيادە كېڭەيتىۋېتىلىشىگە ۋە ئېكسپورت كونتروللۇقىنىڭ سۇيىئىستېمال قىلىنىشى»غا قارشى تۇرىدىغانلىقىنى يەنە بىر قېتىم تەكرارلىدى. ئۇ مۇناسىۋەتلىك لايىھەلەر قانۇنغا ئايلانغان تەقدىردە، خەلقئارا ئىقتىساد ۋە سودا تەرتىپىنى ئېغىر دەرىجىدە ئاجىزلىتىدىغانلىقىنى، يەر شارى يېرىم ئۆتكۈزگۈچ ساھەسى ۋە تەمىنلەش زەنجىرىنىڭ مۇقىملىقىغا زور زىيان يەتكۈزىدىغانلىقىنى ئاگاھلاندۇرۇپ: «خىتاي قانۇن تۇرغۇزۇش مۇساپىسىنى يېقىندىن كۆزىتىدۇ، خىتاينىڭ مەنپەئەتىگە كۆرسىتىدىغان تەسىرىنى ئەستايىدىل باھالايدۇ ھەمدە خىتاي كارخانىلىرىنىڭ قانۇنلۇق ھوقۇق-مەنپەئەتىنى قەتئىي قوغداش ئۈچۈن زۆرۈر ۋە كەسكىن تەدبىرلەرنى قوللىنىدۇ» دېگەنلەرنى قەيت قىلدى.
ئامېرىكا پىرېزىدېنتى دونالد ترامپنىڭ ماي ئېيىدا خىتاي دۆلەت رەئىسى شى جىنپىڭ بىلەن كۆرۈشۈشى كۈتۈلمەكتە. ئەسلىدە مارتنىڭ ئاخىرى ئۆتكۈزۈلۈشى پىلانلانغان باشلىقلار ئۇچرىشىشى ئىران ئۇرۇشى سەۋەبىدىن كېچىكتۈرۈلگەنىدى. ھازىرچە دۇنيادىكى ئەڭ چوڭ ئىككى ئىقتىسادىي گەۋدە بولغان ئامېرىكا بىلەن خىتاي؛ سودا ۋە تەيۋەن مەسىلىسىنى ئۆز ئىچىگە ئالغان بىر قاتار تېمىلاردىكى ئىختىلاپنى داۋاملاشتۇرماقتا.
