خەلقئارا ئولىمپىك كومىتېتى (IOC) 2036-يىللىق ئولىمپىك تەنھەرىكەت مۇسابىقىسىگە ساھىبخانلىق قىلىدىغان دۆلەتنى بېكىتىشكە مۇناسىۋەتلىك كۈنتەرتىپنى ئۇقتۇردى.
خەلقئارا ئولىمپىك كومىتېتى تەرىپىدىن ئېلان قىلىنغان باياناتقا قارىغاندا، 2036-يىللىق ئولىمپىك تەنھەرىكەت مۇسابىقىسىگە ساھىبخانلىق قىلىشنى خالايدىغان ۋە كومىتېت بىلەن «ئۇزۇن مۇددەتلىك دىيالوگ» مۇساپىسىنى داۋاملاشتۇرۇۋاتقان نامزات دۆلەتلەر تۈركىيە، گېرمانىيە، ۋېنگىرىيە، ھىندىستان، قاتار، جەنۇبىي كورېيە ۋە جەنۇبىي ئافرىقا بولغان.
31-ئۆكتەبىردىن كېيىن يېڭى نامزات قوبۇل قىلىنمايدىغان بۇ مۇساپىدە، نامزات شەھەرلەرنىڭ پىلان لايىھەلىرى نويابىر ئېيىدا خەلقئارا ئولىمپىك كومىتېتىغا تور ئارقىلىق سۇنۇلىدۇ.
باياناتتا بىلدۈرۈلۈشىچە، خەلقئارا ئولىمپىك كومىتېتى ئىجرائىيە كومىتېتى 2027-يىلى مارت ئېيىدا ئاخىرقى نامزاتلار تىزىملىكىنى ئېلان قىلىدۇ ۋە «ئىستراتېگىيەلىك دىيالوگ» باسقۇچىنى باشلايدۇ. نامزات شەھەرلەر بۇ باسقۇچتا قانۇنىي ۋە مالىيە جەھەتتىكى كاپالەتلىرىنى سۇنىدۇ، كومىتېت بولسا نامزات رايونلاردا نەق مەيدان تەكشۈرۈشى ئېلىپ بارىدۇ.
ساھىبخان شەھەر 2029-يىلىنىڭ ئوتتۇرىلىرىدا ئۆتكۈزۈلىدىغان خەلقئارا ئولىمپىك كومىتېتى يىغىنىدا ئەزالارنىڭ ئاۋاز بېرىشى بىلەن بېكىتىلىدۇ.
نامزات پىلان لايىھەلىرى؛ ئەسلىھە پىلانى، تەنھەرىكەتچىلەرنىڭ تەجرىبىسى، مەبلەغ سېلىش ئىستراتېگىيەسى، سىياسىي ۋە جەمئىيەتنىڭ قوللىشى، تەشكىللەش ئىقتىدارى ھەمدە ساھىبخان جەمئىيەتلەرگە ئۇزۇن مۇددەتلىك مەنپەئەت يەتكۈزىدىغان مىراس ئىستراتېگىيەسى قاتارلىق تېخنىكىلىق ئۆلچەملەر بويىچە كۆزدىن كەچۈرۈلىدۇ.
