تۈركىيە جۇمھۇرىيىتى جۇمھۇر رەئىسى رەجەپ تاييىپ ئەردوغان ئەزا دۆلەتلەر ئارىسىدا تېخىمۇ پىشقان قاتناش گەۋدىسى ئورنىتىش چاقىرىقىنى ئوتتۇرىغا قويۇپ، ئۈنۈملۈك ۋە ئىشەنچلىك قاتناش تورلىرىنىڭ ئىسلام دۇنياسىنىڭ ئىقتىسادىي يوشۇرۇن كۈچىنى جارى قىلدۇرۇشتا ئاساسىي رول ئوينايدىغانلىقىنى تەكىتلىدى.
پەيشەنبە كۈنى ئىستانبۇلدا ئۆتكۈزۈلگەن «ئىسلام ھەمكارلىق تەشكىلاتى قاتناش مىنىستىرلىرى يىغىنى»غا سىنلىق ئۇچۇر ئەۋەتكەن ئەردوغان، مۇسۇلمان دۆلەتلەرنىڭ ئاسىيادىن ئافرىقاغىچە، ياۋروپادىن ئوتتۇرا شەرققىچە سوزۇلغان كەڭ جۇغراپىيەگە تارقالغانلىقىنى؛ ئىراتېگىيەلىك كارىدورلارغا، دىنامىك ياش نوپۇسقا ۋە تېز سۈرەتتە زورىيىۋاتقان بازارلارغا ئىگە ئىكەنلىكىنى تىلغا ئالدى.
جۇمھۇر رەئىس سۆزىدە: «بۇ زور يوشۇرۇن كۈچنى تولۇق رېئاللىققا ئايلاندۇرۇش ۋە جۇغراپىيەۋى ئۈستۈنلۈكلەرنى ئىستراتېگىيەلىك كۈچكە ئايلاندۇرۇش ئۈچۈن، بىر گەۋدىلەشكەن قاتناش تورىغا ئېھتىياجىمىز بار» دېدى. ئۇ يەنە تاشيول، تۆمۈريول، پورت ۋە ئايرودۇرۇملار ئارىسىدىكى ئالاقىنىڭ كۈچىيىشىنىڭ پەقەت سودىنىلا ئەمەس، بەلكى ئەزا دۆلەتلەر ئارىسىدىكى ئىجتىمائىي ۋە مەدەنىيەت ئالاقىسىنىمۇ كۈچەيتىدىغانلىقىنى قەيت قىلدى.
تۈركىيەنىڭ يېقىنقى يىللاردا ئىشقا ئاشۇرغان مارماراي سۇ ئاستى ئۆتۈش يولى، ياۋروئاسىيا تونېلى ۋە پۇت تىرەپ تۇرغان چوڭ كۆۋرۈكلەرگە ئىشارەت قىلغان ئەردوغان، تۈركىيەنىڭ دۇنيا سودا لىنىيەلىرىدىكى ئورنىنى كۈچەيتكەنلىكىنى ھەمدە دېڭىز، ھاۋا ۋە تۆمۈريول تىرانسپورتى ئىقتىدارىنى يېڭى بىر سەۋىيەگە كۆتۈرگەنلىكىنى ئېيتتى.
ئىسلام ھەمكارلىق تەشكىلاتى ئەزالىرىنى باغلايدىغان «يول خەرىتىسى» تەييارلاندى
جۇمھۇر رەئىس تۈركىيەنىڭ «تىرانس-ھازار (كاسپىي) شەرق-غەرب ئوتتۇرا كارىدورى» تۈرىنى قوللاش ئارقىلىق، تارىخىي يىپەك يولىنى زامانىۋى ئۇسلۇبتا جانلاندۇرغانلىقىنى تىلغا ئالدى. ئۇ نىشاننىڭ پەقەت مىللىي دائىرىدە ئەمەس، بەلكى بارلىق ئەزا دۆلەتلەر بىلەن بىرلىكتە چېگرا ھالقىغان كارىدورلارنى راۋاجلاندۇرۇش ۋە ئورتاق قوشۇمچە قىممەت يارىتىش ئىكەنلىكىنى تەكىتلىدى.
ئەردوغان يەنە: «ئەزا دۆلەتلەر ئارىسىدىكى قاتناش ئالاقىسىنى كۈچەيتىدىغان ۋە تۈركىيەنىڭ نۆۋەتچى رەئىسلىكىدە تەييارلىنىدىغان ‹قاتناش ئالاقىسى ئىستراتېگىيە ھۆججىتى› ئۈچۈن مۇھىم قارارلارنى ئالدۇق» دېگەنلەرنى سۆزلىرىگە ئىلاۋە قىلدى.
