تۈركىيە مىللىي ئىستىخبارات ئىدارىسى، ئەمەلدارلار «MONITUM» (مونىتۇم) دەپ نام بەرگەن مۇرەككەپ بىر قارشى جاسۇسلۇق ھەرىكىتى نەتىجىسىدە، ئىسرائىلىيە ئىستىخبارات تەشكىلاتى موسساد ئۈچۈن خىزمەت قىلغانلىقى ئىلگىرى سۈرۈلگەن ئىككى گۇماندارنى نازارەت ئاستىغا ئالدى.
تۈركىيە بىخەتەرلىك مەنبەلىرىنىڭ جۈمە كۈنى بىلدۈرۈشىچە، مەمەت بۇداك دەريا ۋە ۋەيسەل كەرىمئوغلۇ مىللىي ئىستىخبارات ئىدارىسى، ئىستانبۇل باش تەپتىش مەھكىمىسى ۋە ئىستانبۇل ساقچى ئىدارىسى تېررورلۇققا قارشى تۇرۇش بۆلۈمىنىڭ ماسلىشىشى ئاستىدا ئېلىپ بېرىلغان زەربە بېرىش ھەرىكەتلىرىدە قولغا ئېلىنغان.
تەكشۈرۈش نەتىجىلىرىگە قارىغاندا، كان ئىنژېنېرى بولغان دەريا 2005-يىلى بىر شىركەت قۇرۇپ، مەرسىن شەھىرىنىڭ سىلىفكە رايونىدا بىر مەرمەر تاش كېنى ئاچقان ۋە كېيىنچە خەلقئارا سودىغا كىرىشكەن. دەريانىڭ بىردىن ئارتۇق دۆلەتتە كېڭەيگەن سودا ئالاقىلىرى ئىسرائىلىيە ئىستىخباراتىنىڭ دىققىتىنى تارتقان.
مەنبەلەرگە قارىغاندا، 2012-يىلى سېنتەبىردە ئىسرائىلىيە تەرىپىدىن قۇرۇلغان بىر ساختا شىركەت نامىدا ھەرىكەت قىلىدىغان ۋە «ئەلى ئەھمەد ياسىن» تەخەللۇسىنى ئىشلەتكەن بىر شەخس، دەريانىڭ ئىشخانىسىنى زىيارەت قىلىپ ھەمكارلىق تەكلىپىنى سۇنغان.
دەريا 2013-يىلى يانۋاردا، ياۋروپادىكى بىر يىغىن جەريانىدا موسساد جاسۇسلىرى بىلەن تونۇشتۇرۇلغان.
ئۈچىنچى دۆلەتلەردىكى ئۇچرىشىشلار
بۇ ئۇچرىشىشلار جەريانىدا، «لۇئىس» (Luis) تەخەللۇسىنى ئىشلەتكەن بىر موسساد ئوفىتسېرى، تېگى پەلەستىنلىك تۈركىيە پۇقراسى كەرىمئوغلۇنى ئىشقا ئېلىشنى تەلەپ قىلغان. بۇ ئىككى كىشىگە بارلىق پائالىيەتلەر ۋە ئالاقىلەر ھەققىدە بىرلىكتە دوكلات تەييارلاش بۇيرۇقى بېرىلگەنلىكى ئىلگىرى سۈرۈلمەكتە.
بىخەتەرلىك مەنبەلىرى، دەريانىڭ ھەر قايسى ياۋروپا دۆلەتلىرىدە لۇئىس، جېسۇس/جوسې، دوكتور روبېرتو/رىكاردو، دان/دەننىس، مارك، ئېللى/ئەممى ۋە مايكىل قاتارلىق تەخەللۇسلارنى ئىشلەتكەن نۇرغۇنلىغان موسساد جاسۇسلىرى بىلەن ئۇچرىشىشلارنى ئېلىپ بارغانلىقىنى بىلدۈردى.
بۇ ئىككىيلەننىڭ ئالدى بىلەن رايوندىكى ئىسرائىلىيە سىياسەتلىرىنى تەنقىد قىلغان پەلەستىنلىكلەر ھەققىدە ئىجتىمائىي ۋە سودا ئالاقىلىرى ئارقىلىق ئۇچۇر توپلىغانلىقى، شۇنداقلا كىشىلەر، ئورۇنلار ۋە ئالاقىلەر ھەققىدىكى تەپسىلاتلارنى ئىسرائىلىيە ئىستىخباراتىغا يەتكۈزۈپ بەرگەنلىكى ئىلگىرى سۈرۈلمەكتە.
دەريا يەنە غەززەگە كىرىش رۇخسىتى ئېلىشقا ئۇرۇنۇش، ئۇ يەردىكى ئىسكىلات ئەسلىھەلىرىدە رازۋېدكا قىلىش ۋە موسسادقا سۈرەت يوللاش بىلەنمۇ ئەيىبلەنمەكتە.
دېلودا يەنە، كەرىمئوغلۇنىڭ 2016-يىلى ئۇچقۇچىسىز ھاۋا ئاپپاراتى زاپچاسلىرى سودىسى بىلەن شۇغۇللىنىشنى تەكلىپ قىلغانلىقى، بۇ پىكىرنىڭ ئىسرائىلىيە ئىستىخباراتىغا يەتكۈزۈلگەنلىكى ۋە كېرەكلىك ماتېرىياللارنىڭ موسساد تەرىپىدىن تەمىنلەنگەنلىكى ئىلگىرى سۈرۈلمەكتە.
ئەمەلدارلار، ئۇچقۇچىسىز ھاۋا ئاپپاراتى سېتىش مەسىلىسىدە سۆھبەتلىشىلگەن مۇھەممەد زۇئارىنىڭ 2016-يىلى دېكابىردا تۇنىستا ئۆلتۈرۈلگەنلىكىنى ۋە بۇ ھەرىكەتنىڭ ئىسرائىلىيە تەرىپىدىن ئېلىپ بېرىلغانلىقىنى قەيت قىلدى.
ھەرىكەت بىخەتەرلىكى دائىرىسىدە، ئىسرائىلىيە ئىستىخباراتىنىڭ دەريانى مەخپىي ئالاقە سىستېمىلىرى بىلەن تەمىنلىگەنلىكى ۋە ئۇنى ئىككى قېتىم يالغان سۆزلەرنى تەكشۈرۈش سىنىقىدىن ئۆتكۈزگەنلىكى ئىلگىرى سۈرۈلمەكتە. بۇ سىناقلارنىڭ بىرى 2016-يىلى ئاسىيادىكى بىر دۆلەتتە، يەنە بىرى 2024-يىلى ئاۋغۇستتا ياۋروپادىكى بىر مېھمانخانىدا ئېلىپ بېرىلغان. دەريانىڭ ھەر ئىككى سىناقتىن ئۆتكەندىن كېيىن تېخىمۇ يۇقىرى بىر ھەرىكەت سەۋىيەسىگە ئۆستۈرۈلگەنلىكى ئوتتۇرىغا قويۇلماقتا.
تەكشۈرگۈچىلەر، گۇماندارلارنىڭ يەنە تۈركىيە ۋە باشقا دۆلەتلەردىن تەمىنلەنگەن SIM (سىم) كارتىلار، مودېملار ۋە يېتەكلىگۈچ(router) لەرنىڭ يۈرۈشلۈك نومۇرلىرى، MAC ئادرېسلىرى ۋە تېخنىكىلىق ئالاھىدىلىكلىرىنى ئۆز ئىچىگە ئالغان تېخنىكىلىق سانلىق مەلۇماتلارنى سۈرەتكە تارتىپ يوللىغانلىقىنى بىلدۈرمەكتە.
