سۈرىيە ئەرەب جۇمھۇرىيىتى پىرېزىدېنتى ئەھمەد شارا ھۆكۈمىتىنىڭ سابىق بەئس پارتىيەسى ھاكىمىيىتى رەھبىرى بەششار ئەسەدنىڭ جاۋابكارلىققا تارتىلىشى ئۈچۈن قولدىكى بارلىق قانۇنىي مېخانىزملاردىن پايدىلىنىدىغانلىقىنى، ئەمما ھازىر ئەسەدنى قوبۇل قىلىپ تۇرۇۋاتقان رۇسىيە بىلەن توقۇنۇشمايدىغانلىقىنى ئېيتتى.

شارا دۈشەنبە كۈنى CBS خەۋەرلەر قانىلىنىڭ زىيارىتىنى قوبۇل قىلغاندا مۇنداق دېدى: «پۈتكۈل بىر ئەۋلاد غايەت زور روھىي جاراھەتلەرگە ئۇچرىدى. شۇڭلاشقا، ئازادلىق دەۋرى كىشىلەرگە قايتىپ كېلىش ۋە قايتا قۇرۇش ئۈچۈن يېڭى ئۈمىد بېغىشلاش جەھەتتە ئىنتايىن مۇھىم.»

پىرېزىدېنتلىق مەنسىپىنى ئۈستىگە ئېلىشى ھەققىدە توختالغان شارا: «بۇ ئوردىغا كىرىش ئۇنچىۋالا ئىجابىي بىر كەچۈرمىش بولمىدى. بۇ ئوردا سېلىنغاندىن بېرى، بۇ يەردىن سۈرىيە خەلقىگە نۇرغۇن يامانلىقلار تارقالدى. بىز سۈرىيە زېمىنى سىرتىدا ھېچقانداق ھەرىكەت قىلمىدۇق، ھاكىمىيەتتىن باشقا ھېچكىمنى زەربە ئوبيېكتى قىلمىدۇق. خەلقنى جىنايەتچى ھاكىمىيەت تېڭىپ قويغان زۇلۇمدىن قۇتۇلدۇردۇق» دېگەنلەرنى قەيت قىلدى.

رۇسىيە بىلەن توقۇنۇش يوق

ئۇ ئەسەدنىڭ كېلەچىكى ھەققىدە توختىلىپ: «بەششار ئەسەدنىڭ ئادالەتكە تاپشۇرۇلۇشى ئۈچۈن مۇمكىن بولغان بارلىق قانۇنىي يوللارنى ئىشقا سالىمىز» دېدى.

ئۇ سۆزىنى داۋاملاشتۇرۇپ: «ئەمما رۇسىيە بىلەن توقۇنۇشۇش سۈرىيە ئۈچۈن ئىنتايىن ئېغىر بەدەل تۆلەشكە توغرا كېلىدىغان ئىش. بۇ دۆلەتنىڭ مەنپەئەتىگىمۇ ئۇيغۇن ئەمەس» دېگەنلەرنى سۆزلىرىگە ئىلاۋە قىلدى.

سېنتەبىرنىڭ ئاخىرىدا، دەمەشق تەكشۈرۈش سوتچىسى تەۋفىق ئەلئەلى، دېلونى خەلقئارا جىنايى ئىشلار ساقچى تەشكىلاتى (Interpol) ئارقىلىق خەلقئارا سەۋىيەگە چىقىرىشقا  تەييارلىق قىلىش خىزمەتلىرى دائىرىسىدە ئەسەد ئۈچۈن سىرتتىن قولغا ئېلىش بۇيرۇقى چىقارغانىدى.

ئۆتكەن يىلى دېكابىردا ئەسەد ئاغدۇرۇلۇپ بىر كۈندىن كېيىن، رۇسىيە ئۇ ۋە ئائىلىسىگە «ئىنسانپەرۋەرلىك پاناھلىقى» بەرگەنلىكىنى ئېلان قىلدى.

تەخمىنەن 25 يىل سۈرىيەگە ھۆكۈمرانلىق قىلغان ئەسەد، 2024-يىلىنىڭ ئاخىرىدا رۇسىيەگە قېچىپ، 1963-يىلى باشلانغان بەئس پارتىيەسىنىڭ نەچچە ئون يىللىق ھۆكۈمرانلىقىغا خاتىمە بەردى. يانۋاردا شارا رەھبەرلىكىدە يېڭى بىر ئۆتكۈنچى ھۆكۈمەت قۇرۇلدى.