تۈركىيە جۇمھۇرىيىتى مۇھىت، شەھەرلەشتۈرۈش ۋە كىلىمات ئۆزگىرىشى ئىشلىرى مىنىستىرلىقى تەرىپىدىن ئېلان قىلىنغان باياناتقا ئاساسلانغاندا، مىنىستىر مۇرات قۇرۇم قىرغىزىستان بىنكارلىق، قۇرۇلۇش ۋە تۇرالغۇ مۇلازىمەت ئىشلىرى مىنىستىرى نۇردان ئورۇنتايېۋ ۋە ئۇنىڭ ھەمراھلىقىدىكى ۋەكىللەر ئۆمىكى بىلەن بىر يەرگە جەم بولغان.
مىنىستىرلىق بىناسىدا ئۆتكۈزۈلگەن سۆھبەتتە، ئىككى دۆلەت ئوتتۇرىسىدا «شەھەر پىلانلاش ساھەسىدە ھەمكارلىق ئورنىتىش كېلىشىمى» ئىمزالانغان.
مىنىستىر مۇرات قۇرۇم سۆھبەتكە مۇناسىۋەتلىك ئاممىۋى ئورتاقلىشىش تور بېتى NSosyal سەھىپىسىدە ئېلان قىلغان باياناتىدا، نۇردان ئورۇنتايېۋ بىلەن مىنىستىرلىقتا ئۇچرىشىپ، ئىنتايىن ئۈنۈملۈك سۆھبەت ئۆتكۈزگەنلىكىنى بىلدۈردى.
سۆھبەتتىن كېيىن شەھەرلەشتۈرۈش ۋە شەھەر پىلانلاش ساھەلىرىدە ئۇچۇر ۋە تەجرىبە ئالماشتۇرۇشنى كۈچەيتىدىغان كېلىشىمگە ئىمزا قويغانلىقىنى ئۇقتۇرغان مۇرات قۇرۇم: «بىخەتەر ۋە ياشاشقا قۇلايلىق شەھەرلەرنى تەرەققىي قىلدۇرۇشقا تۆھپە قوشىدىغان بۇ كېلىشىمنىڭ؛ ئىككى قېرىنداش دۆلەت ئوتتۇرىسىدىكى ئىستراتېگىيەلىك شېرىكلىك مۇناسىۋىتىنى تېخىمۇ كۈچەيتىدىغانلىقىغا، تۈركىيە ھۆددىگەرلىك ۋە مەسلىھەتچىلىك ساھەسىنىڭ رايوندىكى تەجرىبىلىرىنى تېخىمۇ گەۋدىلەندۈرۈشىگە ئىشىنىمەن» دېدى.
