ئامېرىكا مەركىزىي قوماندانلىق ئىشتاتى (CENTCOM)، تېررورچىلارنى بىخەتەر تۇتۇپ تۇرۇش مەركەزلىرىگە ياردەم بېرىش مەقسىتىدە، سۈرىيەنىڭ شىمالىي شەرقىدىكى دائېش تۇتقۇنلىرىنى ئىراققا يۆتكەش ۋەزىپىسىنى باشلىغانلىقىنى ئېلان قىلدى.
چارشەنبە كۈنى ئېلان قىلىنغان باياناتتا، ئامېرىكا قوشما ئىشتاتلىرى ئارمىيەسىنىڭ ھەسەكە ۋىلايىتىنىڭ شىمالىي شەرقىدىكى بىر تۈرمىدە تۇتۇپ تۇرۇلۇۋاتقان 150 دائېش تېررورچىسىنى ئىراقتىكى بىخەتەر بىر جايغا مۇۋەپپەقىيەتلىك يۆتكىشى بىلەن ۋەزىپىنىڭ باشلانغانلىقى بىلدۈرۈلدى. باياناتتا: «ئاخىرقى ھېسابتا 7000 غا يېقىن دائېش تۇتقۇنى سۈرىيەدىن ئىراقنىڭ كونتروللۇقىدىكى جايلارغا يۆتكىلىشى مۇمكىن» دېيىلدى.
ئامېرىكا مەركىزىي قوماندانلىق ئىشتاتى (CENTCOM) قوماندانى ئادمىرال براد كوپېر ئامېرىكانىڭ ئىراقنى ئۆز ئىچىگە ئالغان رايونلۇق شېرىكلىرى بىلەن «يېقىن» ماسلىشىش ئىچىدە ئىكەنلىكىنى ۋە دائېشنى مەغلۇپ قىلىشتىكى رولىغا يۇقىرى باھا بېرىدىغانلىقىنى ئېيتتى. كوپېر: «دائېش تۇتقۇنلىرىنىڭ تەرتىپلىك ۋە بىخەتەر ھالدا يۆتكىلىشىنى قولايلاشتۇرۇش، ھەم ئامېرىكا قوشما ئىشتاتلىرى ھەم رايون بىخەتەرلىكى ئۈچۈن بىۋاسىتە تەھدىت ئېلىپ كېلىدىغان تۈرمىدىن قېچىشلارنىڭ ئالدىنى ئېلىش جەھەتتىن ئىنتايىن مۇھىم» دېدى.
بۇ ھەرىكەت، شۇنىڭ بىلەن بىر ۋاقىتتا ئامېرىكانىڭ تۈركىيەدە تۇرۇشلۇق باش ئەلچىسى توم بارراك (Tom Barrack) نىڭ ۋاشىنگتوننىڭ سۈرىيەدىكى مۇھىم نۇقتىلىرىنىڭ ئەمدى «مۇرەسسەنى قوللاش، مىللىي بىرلىك ۋە مۇقىملىقنى ئىلگىرى سۈرۈش» كە مەركەزلەشكەنلىكىنى ئېيتقىنىدىن بىر كۈن كېيىن ئېلان قىلىندى. بارراك ئامېرىكانىڭ بۆلگۈنچىلىكنى قوللىمايدىغانلىقىنى ئېنىق بايان قىلىپ: «ۋاشىنگتوننىڭ ئالدىنقى نىشانلىرى بۆلگۈنچىلىك ياكى فېدېراتسىيە تۈزۈمىنى تەستىقلىماستىن مۇرەسسەنى قوللاشنى ۋە مىللىي بىرلىكنى ئىلگىرى سۈرۈشنى ئۆز ئىچىگە ئالىدۇ» دېدى.
