يەرلىك گۇۋاھچىلارنىڭ بىلدۈرىشىچە، ئىسرائىلىيە ئارمىيەسى دۈشەنبە كۈنى يەنە غەززەنىڭ جەنۇبىدا، ھەربىي كونتروللۇق ئاستىدىكى «سېرىق لىنىيە» ئىچىدە قالغان بىر قانچە ئورۇنغا ھۇجۇم قىلغان.
رايون ئاھالىلىرى ئانادولۇ ئاگېنتلىقىغا، ئىسرائىلىيە زەمبىرەكلىرىنىڭ رەفاھنىڭ شەرق قىسىملىرىنى شىددەتلىك بومباردىمان قىلغانلىقىنى ۋە بومباردىمان قىلىنغان رايونلاردىن تۈتۈنلەرنىڭ كۆتۈرۈلگەنلىكىنى بىلدۈردى.
بۇنىڭدىن باشقا، ئىسرائىلىيە تىك ئۇچارلىرىنىڭ خان يۇنۇسنىڭ شەرقىنى شىددەتلىك ئوققا تۇتقانلىقى خەۋەر قىلىندى.
ھۇجۇملارغا ئالاقىدار ھازىرچە بىرەر ئادەم ئۆلۈش ياكى يارىلىنىش ئەھۋالى دوكلات قىلىنمىدى.
غەززە ھۆكۈمىتى ئاخبارات ئىشخانىسىنىڭ دوكلاتىغا قارىغاندا، ئىسرائىلىيە ئارمىيەسى ئۇرۇش توختىتىش كېلىشىمىگە 590 قېتىمدىن كۆپرەك خىلاپلىق قىلغان. كەم دېگەندە 357 پەلەستىنلىكنى ئۆلتۈرگەن ۋە 903 كىشىنى يارىلاندۇرغان.
تۈركىيە، مىسىر ۋە قاتارنىڭ مۇرەسسەچىلىكىدە ھەمدە ئامېرىكانىڭ قوللىشى بىلەن ھاسىل قىلىنغان ئۇرۇش توختىتىش كېلىشىمى 10-ئۆكتەبىردە كۈچكە ئىگە بولغان ئىدى، مەقسەت، 2023-يىلى ئۆكتەبىردىن بۇيان، يەنى ئىككى يىلدىن بېرى داۋاملىشىۋاتقان ئىسرائىلىيەنىڭ ئىرقىي قىرغىنچى ھۇجۇملىرىنى توختىتىش ئىدى.
بۇ ھۇجۇملاردا كۆپىنچىسى ئاياللار ۋە بالىلار بولۇپ 70 مىڭدىن ئارتۇق كىشى ھاياتىدىن ئايرىلدى ۋە 170 مىڭدىن ئارتۇق كىشى يارىلاندى.
ئۇرۇش توختىتىش كېلىشىمىنىڭ بىرىنچى باسقۇچى، پەلەستىنلىك ئەسىرلەر بەدىلىگە ئىسرائىلىيەلىك گۆرۈگە ئېلىنغانلارنىڭ قويۇپ بېرىلىشىنى شەرت قىلىدۇ.
پىلان يەنە غەززەنىڭ قايتا قۇرۇلۇشىنى ۋە ھاماس ئورۇن ئالمىغان يېڭى بىر باشقۇرۇش مېخانىزمىنىڭ قۇرۇلۇشىنىمۇ كۆزدە تۇتىدۇ.
غەربىي قىرغاقتا ئونلىغان كىشى نازارەت ئاستىغا ئېلىندى
ئىسرائىلىيە يەنە، ئىشغال ئاستىدىكى غەربىي قىرغاقتا پەلەستىنلىكلەرگە قاراتقان رەھىمسىز باستۇرۇش ۋە ھۇجۇملىرىنى كۈچەيتتى.
پەلەستىن خەۋەر ئاگېنتلىقى «Wafa» غا ئاساسلانغاندا، راماللاھنىڭ غەربىي شىمالىدىكى ئەل لۇببان ئەل غەربى ۋە رانتىس يېزىلىرىغا تاڭ سەھەردە قىلىنغان باستۇرۇشلاردا، كۆپىنچىسى سابىق مەھبۇسلار بولۇپ كەم دېگەندە 11 پەلەستىنلىك نازارەت ئاستىغا ئېلىنغان.
بۇ جەرياندا بەيتۇللاھىم ۋالىيلىقىغا قاراشلىق بەيت فاجار ۋە ئەل ئۇبەيدىيە بازارلىرىدا يەنە 44 پەلەستىنلىك نازارەت ئاستىغا ئېلىنغان. بۇ ئەھۋال كۈچىيىۋاتقان جىددىيچىلىكنى ۋە قورقۇنچنى تېخىمۇ چوڭقۇرلاشتۇرماقتا.
ئۆيلەر، يوللار ۋە ھاياتىي مۇھىم ئەھمىيەتكە ئىگە ئۇل ئەسلىھەلەر ئىسرائىلىيە كۈچلىرى تەرىپىدىن سىستېمىلىق ھالدا ۋەيران قىلىنىۋاتقان بولۇپ، خەلق ھۇجۇملارنىڭ تەسىرىدە تەمتىرەپ قالغان ئەھۋالدا تۇرماقتا.
