جەنۇبىي كورېيە رەقەملىك پۇل سودا سۇپىسى-بىتامب شەنبە (2026-يىلى 7-فېۋرال) كۈنى تەشۋىقات مۇكاپاتى سۈپىتىدە خاتا ھالدا ئابونتلارغا قىممىتى 40 مىليارد دوللاردىن ئارتۇق بىت تەڭگىسىنى ئەۋەتىپ قويغانلىقىنى، بۇنىڭ بازارلاردا شىددەتلىك سېتىش دولقۇنىنى قوزغىغانلىقىنى بىلدۈردى.

بىتامب شىركىتى جۈمە (6-فېۋرال) كۈنى يۈز بەرگەن بۇ خاتالىق ئۈچۈن كەچۈرۈم سورىدى ۋە نۆۋەتتىكى باھاسى تەخمىنەن 44 مىليارد دوللارغا يېتىدىغان 620 مىڭ دانە بىت تەڭگىسىنىڭ %99.7 نى قايتۇرۇۋالغانلىقىنى ئېلان قىلدى. شىركەت جۈمە كۈنىدىكى خاتا تارقىتىشتىن كېيىنكى 35 مىنۇت ئىچىدە، خاتا ھالدا بىت تەڭگىسى ئەۋەتىلگەن 695 ئابونتىنىڭ سودا قىلىش ۋە پۇل چىقىرىش ھوقۇقىنى چەكلىگەن.

خەۋەرلەرگە قارىغاندا، مەزكۇر سودا سۇپىسى ئەسلىدە تەشۋىقات پائالىيىتىنىڭ بىر قىسمى سۈپىتىدە ھەر بىر ئابونتقا 2000 كورېيە ۋونى (تەخمىنەن 1.37 دوللار) ياكى ئۇنىڭدىن كۆپ مىقداردا كىچىك پۇل مۇكاپاتى بەرمەكچى بولغان، ئەمما مۇكاپاتقا ئېرىشكۈچىلەر ئۇنىڭ ئورنىغا ئاز دېگەندە 2000 دانە بىت تەڭگىسى تاپشۇرۇۋالغان.

بىتامب باياناتىدا: «بىز شۇنى ئېنىق ئېيتىمىزكى، بۇ ۋەقە سىرتقى خاككېرلىق ھۇجۇمى ياكى بىخەتەرلىككە خىلاپ ھەرىكەتلەر بىلەن مۇناسىۋەتسىز، سىستېما بىخەتەرلىكى ياكى ئابونتلارنىڭ مۈلكىنى باشقۇرۇشتا ھېچقانداق مەسىلە يوق» دېدى.

بىتامب دىياگراممىلىرىدا كۆرسىتىلىشىچە، جۈمە كۈنى كەچتە بىتامبتىكى بىت تەڭگىسىنىڭ باھاسى قىسقا ۋاقىت ئىچىدە %17 تۆۋەنلەپ 81.1 مىليون ۋونغا چۈشۈپ قالغان. كېيىن باھا ئەسلىگە كېلىپ، ئەڭ ئاخىرقى سودا باھاسى 104.5 مىليون ۋون بولغان.

بىتامب جەنۇبىي كورېيە كرىپتو ساھەسىدىكى ئەڭ چوڭ سۇپا بولغان ئاپبىت (Upbit) تىن كېيىنلا تۇرىدىغان ئىككىنچى چوڭ سۇپا ھېسابلىنىدۇ.

مۇناسىۋەتلىك ئۇچۇرلارTRT World - South Korea's Bithumb loses $32M in digital money heist, bitcoin falls